ඇවන්ට් ගාර්ඩ් සභාපතිගෙන් රනිල් කෝටි ගණනින් ගත් බව චම්පික කියයි
පසුගිය වසරේ පැවැති ජනාධිපතිවරණයට පෙර හිටපු අග්‍රාමාත්‍යවරයා විසින් ඇවන්ට් ගාර්ඩ් සභාපති නිශ්ශංක සේනාධිපතිගෙන් මුදල් ලබා ගත් බව යහපාලන රජයේ හිටපු ප්‍රබල අමාත්‍යවරයකු විසින් හෙළි කර තිබේ.
ජනාධිපතිවරණය සදහා වියදම් කිරීම වෙනුවෙන් රනිල් වික්‍රමසිංහ එම මුදල් ලබා ගත් බවයි හිටපු අමාත්‍ය පාඨලී චම්පික රණවක පවසන්නේ.
“අපේ ලොක්කා මට කිව්වා ඡන්දේ කරන්න සල්ලි නෑ. ජනාධිපතිවරණය. අපේ ඉන්න සංවිධායකලාට ගෙවන්න සල්ලි නෑ. ඒ අනුව මම මේ ඇවන්ගාඩ් කාරයාව අදුන්වලා දුන්නා.එයා දුන්න සල්ලි සිරිකොතේදී ලක්ෂ පහ ගානේ බෙදුවා.මමත් නොදන්නවා වගේ ගිහිල්ලා ලක්ෂ පහ අරගෙන ආවා කියලා කිව්වා.එකසිය විසි දෙනෙකුට එහෙම දුන්නයි කිව්වා ”
තමන් නියෝජනය කළ කැබිනට් මණ්ඩලයේම සාමාජිකයකු වු වජිර අබේවර්ධන විසින් එකල තමන් සමග සිදු කළ එම ප්‍රකාශය පාඨලී චම්පික රණවක විසින් හෙළි දරව් කරන ලද්දේ ගාල්ලේ පැවැති මැතිවරණ රැස්වීමක් අමතමිනි.
ජනාධිපතිවරණයේදී පමණක් නොව අවසන් මහ මැතිවරණයේදීත් රනිල් වික්‍රමසිංහ විසින් නිශ්ශංක සේනාධිපතිගෙන් මුදල් ලබා ගෙන ඇති බවට එහිදී හිටපු අමාත්‍යවරයා ඉඟි පළ කළේය.
ඇවන්ගාඩ් සමාගම හරහා ඉතාම පැහැදිලි ලෙස නීති විරෝධි අවි ආයුධ ක්‍රියාවලියක් සිදුවු බවට චෝදනා කරන හිටපු අමාත්‍යවරයා එහිදී අවධාරණය කළේ එම පිරිස අත්අඩංගුවට ගන්නා ලෙස නීති උපදෙස් ලැබී තිබුනත් ඇවන්ගාඩ් සල්ලි වලට යටවී එක්සත් ජාතික පක්ෂය හැට දෙලක්ෂයක් ජනතාවගේ ජන වරම පාවා දුන් බවයි.
“අපේ කිසිම සම්බන්ධයකින් තොරව නීතිපති දෙපාර්තමේන්තුව කිව්වා ත්‍රස්තවාදය වැලැක්වීමේ පනත යටතේ, ඒ වගේම ගිනි අවි ආඥා පනත යටතේ මේ පිරිස් අත්අඩංගුවට ගන්නෙයි කියලා අර වසන්ත බණ්ඩාර කියන අතිරේක සොලිස්ටර් ජෙනරල් මේකට පරීක්ෂණ කරන්න ඇවිල්ලා කිව්වා. නීතිපති දෙපාර්තමේන්තුවේ සුහද ගම්ලත් රනිල් වික්‍රමසිංහ මහත්තයාට අපි ඔක්කොම ඉස්සරහා කිව්වා මේ පිරිස් මේක යටතේ අත්අඩංගුවට ගන්නවයි කියලා. සති මාස ගෙවුනා. අත්අඩංගුවට ගන්නේ නෑ. හේතුව දැන් අපිට පැහැදිලියි.”
හිටපු අගමැතිවරයා හා නිශ්ශංක සේනාධිපති අතර සම්බන්ධිකරණය ඇති කරමින් හොරුන් ලවා ආණ්ඩුව ඇල්ලීමට කටයුතු කිරීම සම්බන්ධයෙන් වජිර අබේවර්ධන හිටපු අමාත්‍යවරයා සම්පුර්ණයෙන්ම වග කිව යුතු බව පාඨලී චම්පික රණවක හිටපු අමාත්‍යවරයා වැඩි දුරටත් සදහන් කළේය.
නීති විරෝධී පාවෙන අවි ගබඩාවක් පවත්වාගෙන යාමේ චෝදනා නගා ඇවන්ට් ගාර්ඩ් මැරිටයිම් සර්විසස් සමාගමේ සභාපති යාපා හෙට්ටි පතිරැන්නැහැලාගේ නිශ්ශංක යාපා සේනාධිපති ඇතුළු දහතුන් දෙනකුට එරෙහිව චෝදනා 7573 ක් යටතේ පවරන ලද නඩුවක් කොළඹ මහාධිකරණයේ ත්‍රිපුද්ගල විනිශ්චය මණ්ඩලයක් හමුවේ විභාග වෙමින් පවතී.
තමන්ට එරෙහිව පසුගිය ආණ්ඩුව සමයේ පියවර ගන්නා ලද්දේ දේශපාලන පලිගැනීමකට යැයි චෝදනා කරමින් නිශ්ශංක සේනාධිපති ජනාධිපති කොමිසමක් හමුවට ගොස් සිටී.
Comments are closed.