நல்லைக் குமரன் நூல் வெளியீட்டு விழா

யாழ்ப்பாண மாநகர சபையின் சைவசமய விவகார குழுவின் நல்லைக்குமரன் மலர் வெளியீட்டு நிகழ்வு நாவலர் மண்டபத்தில் இடம்பெற்றது.

யாழ்ப்பாணம் மாநகராட்சி மன்ற சைவசமய விவகார குழுவினால் வருடந்தோறும் நல்லூர் முருகன் ஆலய உற்சவகாலத்தில் வெளியிடப்படும் “நல்லைக்குமரன்” நூல் வெளியீடும் வருடந்தோறும் யாழ்ப்பாண மாநகர சபையின் சைவ சமய விவகார குழுவினால் வழங்கப்படும் “யாழ் விருது” வழங்கும் நிகழ்வும் கொரோனா சூழ்நிலையைக் கருத்தில் கொண்டு சுகாதார நடைமுறையினை பின்பற்றி யாழ்ப்பாணம் நாவலர் மண்டபத்தில் இடம்பெற்றது.

யாழ்ப்பாண மாநகர சபையின் சைவசமய விவகார குழுவின் தலைவரும் யாழ்ப்பாண மாநகர சபையின் ஆணையாளருமான த.ஜெயசீலன் தலைமையில் நடைபெற்ற நிகழ்வில் நல்லை ஆதீன குரு முதல்வர் ஸ்ரீலஸ்ரீ சோமசுந்தர பரமாச்சாரிய சுவாமிகள், செஞ்சொற்செல்வர் ஆறு திருமுருகன், யாழ்ப்பாண மாநகர சபை உறுப்பினர்கள் மற்றும் சைவ சமய குழுவின் உறுப்பினர்கள் கலந்து கொண்டனர்.

இதன்போது சைவசமய விவகார குழுவினால் இவ்வருடத்திற்கான யாழ் விருது கவிஞர் சோ.பத்மநாதனுக்கு வழங்கப்பட்டது. அவருக்கான பொற்கிளியினை யாழ்ப்பாண மாநகர சபையின் ஆணையாளர் வழங்கி வைத்தார்.

தொடர்ந்து நல்லைக்குமரன் மலர் வெளியிடப்பட்டது. நல்லைக்குமரன் மலர் முதல் பிரதியினை தெல்லிப்பழை துர்க்காதேவி தேவஸ்தானத்தின் பிரதிநிதி பெற்றுக்கொண்டார்.