පොලිසියට තොරතුරු රැස්කරන නාඳුනන කණ්ඩායම් ගැන පොලිස්පතිට ප්‍රශ්න
කොළඹ දිස්ත්‍රික්කයේ බොහෝ ප්‍රදේශවාසීන්ගෙන් තොරතුරු එක්රැස්කිරීම සදහා එක් දේශපාලන පක්ෂයක ආධාරකරුවන් බවට සැකකෙරෙන නාඳුනන කණ්ඩායම් හවුල් කරගැනීම සම්බන්ධයෙන් පොලිස්පතිවරයා වෙත පැමිනිල්ලක් යොමු කර තිබේ.
වැඩ බලන පොලිස්පති සී.ඩී වික්‍රමරත්න වෙත ලිපියක් යොමු කරමින් මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය පෙන්වා දී ඇත්තේ පුර්ව මැතිවරණ ප්‍රචාරක සමයක ගෘහ ඒකක වෙතින් තොරතුරු එක්රැස් කිරීම සදහා නාදුනන පිරිස් එක් කර ගැනීම අපහැදිලි ක්‍රියාවක් බවයි.
තොරතුරු එක් රැස් කිරීමේ කාර්ය නියාමනය කරනු ලබන්නේ ඒ ඒ ප්‍රදේශවල පිහිටුවා ඇති පොලිස් ස්ථාන මගින් බව පෙන්වා දෙන මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය අවධාරණය කරන්නේ පොලිස් ආඥා පනතේ 76 වන වගන්තිය යටතේ එය පැහැදිලි කරුනක් වුවත් ඒ සදහා නාඳුනන පිරිසක් එක් කර ගැනීම ගැටළු සහගත බවයි.
මැතිවරණ ප්‍රචණ්ඩක්‍රියා නිරීක්ෂණ මධ්‍යස්ථානයේ ජාතික සම්බන්ධිකාරක මංජුල ගජනායකගේ අත්සනින් යුතුව යොමු කර තිබෙන ලිපිය මගින් ඔහු වැඩ බලන පොලිස්පතිවරයාගෙන් ප්‍රශ්න කර ඇත්තේ ගෘහ ඒකක වලින් එලෙස තොරතුරු එක් රැස් කිරීම පොලිස්පතිවරයාගේ දැනුම්වත් භාවය හා නිසි උපදෙස් මත ක්‍රියාත්මක වන්නක්ද යන්නයි.
ගෘහ ඒකක තොරතුරු ඉතා විධිමත්ව යාවත්කාලීන කරන රජයේ නිලධාරියකු වන ග්‍රාම නිලධාරී වරුන් සිටියදී ඔහුගෙන් එකී තොරතුරු එක් රැස් කර නොගෙන නිරෝධායන නීති දැඩිව බලපැවැත්වෙන සමයක මෙලෙස නිවෙස් කරා පැමිනෙන්නේ මන්දැයි මංජුල ගජනායක පොලිස්පතිවරයාගෙන් වැඩි දුරටත් ප්‍රශ්න කර සිටී.
“මෙකී වෑයම සදහා නාදුනන පිරිස් එක්කර ගැනීමේ අරමුණ කුමක්ද? එලෙස එක්කරගත් පිරිස් තෝරාගැනීමේ නිර්නායක කවරේද? පුර්ව මැතිවරණ ප්‍රචාරක සමයක එලෙස නාදුනන ( බොහෝ පාර්ශව වෙතින් නැගී ඇති චෝදනාවක් වන්නේ එක් දේශපාලන පක්ෂයකට පමණක් ලැදියාවක් සහිත පිරිස් මේ සදහා එක්කරගෙන ඇති බවයි.) පිරිස් එක් කර ගැනීම මැතිවරණ සමයක පැවැතිය යුතු සාමකාමී සහ නිදහස් වාතාවරණය බිද දැමීමට හේතුවිය හැකි කරුණක් නොවේද? ”
මංජුල ගජනායක සිය ලිපිය මගින් පොලිස්පතිවරයාට තව දුරටත් අවධාරණය කර ඇත්තේ මීට සමාන තොරතුර සහිත පෝරමයක් සදහා ශ්‍රී ලංකා පොලීසිය මීට සය මසකට පෙරද තොරතුරු එක් රැස් කළ බවයි.
ඉහත කරුණු සලකා බලා මෙම ක්‍රියාවලියේ අරමුණු හා මතුවී ඇති ගැටළුකාරී තත්වය පිළිබදව පැහැදිලි හා නිල ප්‍රකාශයක් සිදු කිරීමට ක්‍රියාකරන ලෙස මැතිවරණ ප්‍රචණ්ඩක්‍රියා නිරීක්ෂණ මධ්‍යස්ථානය පොලිස්පතිවරයාගෙන් ඉල්ලා තිබේ.
මැතිවරණ ප්‍රචණ්ඩක්‍රියා නිරීක්ෂණ මධ්‍යස්ථානය පොලිස්පතිවරයා වෙත යොමු කළ ලිපියේ පිටපත් මැතිවරණ කොමිෂන් සභාවේ සභාපති මහින්ද දේශප්‍රීය, ජාතික පොලිස් කොමිෂන් සභාවේ ලේකම් නිශාන්ත ඒ වීරසිංහ, බස්නාහිර පළාත් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් හා නියෝජ්‍ය පොලිස්පති මැතිවරණ ප්‍රියන්ත වීරසුරිය වෙතත් යොමු කර තිබේ.
Comments are closed.