කමලා හැරිස්ගේ ශ්‍රී ලාංකික-ඇමරිකන් මාණ්ඩලික ප්‍රධානියා
ඇමරිකාවේ ඩිමොක්‍රටික් පක්ෂයේ උප ජනාධිපති අපේක්ෂිකා කමලා හැරිස්ගේ කාර්යය මණ්ඩල ප්‍රධානියා වන්නේ ශ්‍රී ලාංකීය දමිළ යුවළකගේ දියණියක වන රෝහිනී කොසොග්ලුයි.
රෝහිනීගේ පියා වෛද්‍ය විජයවේන්ද්‍රන් රවීන්ද්‍රන් නම් වන අතර මව ශෝබනා රවීන්ද්‍රන් නම් වනවා. ඔවුන් යාපනයේ වැසියන් වූ අතර 1980 දශකයේදී ඇමරිකාවට සංක්‍රමණය වී තිබෙනවා.
හාර්වර්ඩ් විශ්ව විද්‍යාලයට සම්බන්ධ කෙනඩි පාසැලේ දේශපාලන විද්‍යා විද්‍යාර්ථියකු වන රෝහිනී කොසොග්ලු මිචිගන් සරසවියෙන් සහ ජෝර්ජ් වොෂිංටන් සරසවියෙන් අධ්‍යාපනය ලැබූවෙක්. ඇය මුලින් මිචිගන් සෙනට් සභික ඩෙබී ස්ටැබ්නෝ යටතේ සේවය කර ඇති අතර පසුව කොලරාඩෝ සෙනට් සභික මයිකල් බෙනට්ගේ සෞඛ්‍ය සේවා උපදේශක ලෙස කටයුතු කළා. කමලා හැරිස් සෙනට් සභාවට තේරීපත් වූ පසු ඇගේ නියෝජ්‍ය මාණ්ඩලික ප්‍රධානියා ලෙසයි රෝහිනී කොසොග්ලු සේවයට එක් වී තිබෙන්නේ.
ඩිමොක්‍රටික් උප ජනාධිපති අපේක්ෂිකාව ලෙස කමලා හැරිස් පත්වීම ඓතිහාසික අවස්ථාවක් බවයි කොසොග්ලු සිය ට්විටර් ගිණුම ඔස්සේ සඳහන් කර තිබුණේ.
කමලා හැරිස් ද එක් අතකින් ඉන්දීය සම්භවයක් ඇති කාන්තාවක වන අතර අනෙක් අතින් කළු ජාතික සම්භවයක් ඇති කාන්තාවක්. එහෙයින් ඇමරිකාවේ ප්‍රධාන පක්ෂයක උප ජනාධිපති අපේක්ෂිකාව ලෙස ඇය පත්වීම ඓතිහාසිකයි.
ඇගේ පත්වීම තුළින් ජෝ බයිඩන්ට කළු ජාතික හා ඇමරිකන් ඉන්දියානු ඡන්ද ලැබීනේ වැඩි ඉඩක් ඇතැයි ඇතැම් විට අසන්නට ලැබෙන මතයක්. එහෙත් ඔවුන්ගේ ඡන්ද කොහොමටත් වැඩිපුර ලැබෙන්නේ ඩිමොක්‍රටික් පක්ෂයට බව 2016 දී ද පෙනීගිය කරුණක්. කමලා හැරිස්ව සිය උප ජනාධිපති අපේක්ෂක ලෙස බයිඩන් විසින් ආත් කරගත්තේ ඇය ඍජුබව හා දැඩි බව පිළිබඳ ප්‍රකට අයකු වීම හේතුවෙන් වීමට වැඩි ඉඩක් තිබෙනවා
Comments are closed.