මුලතිව් වෛද්‍ය හිඟයට විසඳුම් ඉල්ලා පාර්ලිමේන්තුවට සන්දේශයක්
මුලතිව් මහ රෝහලේ පවතින වෛද්‍ය හිඟයට වහා විසදුම් ලබා දෙන ලෙස රජයට බලකරමින් මුලතිව් මහරෝහල ඉදිරිපිටදී උද්ඝෝෂණ ව්‍යාපාරයක් ආරම්භ කර තිබේ.
අගෝස්තු 18 අගහරුවාදා උදෑසන මුලතිව් මහ රෝහල ඉදිරිපිටදී දෙවැනි දිනටත් විරෝධතා පැවැති බවයි උතුරේ වාර්තාකරුවන් පවසන්නේ.
මුලතිව් මහ රෝහලේ සුභ සාධක සංගමය හා ප්‍රදේශවාසීන් ඒකාබද්ධව දියත් කළ උද්ඝෝෂණයේදී ඔවුන් රජයේ බලධාරීන්ට පෙන්වා දී ඇත්තේ මුලතිව් මහ රෝහලේ වෛද්‍යවරුන් 60 දෙනකුගේ අවශ්‍යතාවයක් පැවතියත් මේ වන විට රෝහලේ සේවයේ නිරතව සිටින්නේ වෛද්‍යවරුන් 27 දෙනකු පමණක් බවයි.
වෛද්‍ය හිඟය හේතුවෙන් රෝගීන්ගේ ජීවිතද දැඩි අවදානමකට පත්ව ඇති අතර සේවයේ නිරතව සිටින වෛද්‍යවරුන්ද දැඩි අපහසුතාවයකට පත්ව ඇති බව උද්ඝෝෂකයෝ පෙන්වා දී තිබේ.
අනතුරුව උද්ඝෝෂකයන් විසින් සිය ඉල්ලීම් ඇතුලත් සන්දේශයක් පාර්ලිමේන්තු මන්ත්‍රීවරුන් වන සෙල්වම් අඩෙයික්කලනාදන්ට හා විනෝ නෝහරාධලිංගම් වෙත බාර දී තිබේ.
රෝහලේ පවතින වෛද්‍ය හිඟයට විසඳුම් ලබා දීම සම්බන්ධයෙන් බලධාරීන් සමග කඩිනමින් සාකච්ඡා කරන බවටද පාර්ලිමේන්තු නියෝජිතයන් උද්ඝෝෂකයන්ට පොරොන්දු වු බව උතුරේ වාර්තාකරුවෝ වැඩි දුරටත් පවසති.
මුලතිව් මහ රෝහලේ පවතින වෛද්‍ය හිඟයට විසදුම් ඉල්ලා දැනට සේවයේ නිරතව සිටින වෛද්‍ය කාර්ය මණ්ඩලයත් මීට සති දෙකකට ඉහතදී වැඩ වර්ජනයක් දියත් කර තිබුනි.
රෝගීන්ගේ ජීවිත අනතුරට පත් නොකර මුලතිව් රෝහලේ වෛද්‍ය හිඟයට විසඳුම් ලබා දෙන ලෙස උද්ඝෝෂකයන් නව රජයේ බලධාරීන්ගෙන් ඉල්ලා සිටි බව උතුරේ වාර්තාකරුවෝ වැඩි දුරටත් සදහන් කරති.
Comments are closed.