දරුවන්ට, ගැහැනුන්ට ආණ්ඩුව අමාත්‍යාංශයක් නොදීම ගැන නීතිඥ කණගාටුව

දිනකට ස්ත්‍රී දුෂණ හතරක්, දෙපැයකට වරක් ළමා අපචාරයක් සිදු වන ශ්‍රී ලංකාවේ නව කැබිනට් මණ්ඩලය පත් කිරීමේදී දරුවන් සහ කාන්තාවන් වෙනුවෙන් අමාත්‍යාංශයක් වෙන් නොකිරීම සම්බන්ධයෙන් නීතිඥවරුන්ගෙන් සැදුම් ලත් සංගමයක කනස්සල්ල පළ වී තිබේ.

රටක ජාතික ආරක්ෂාව සම්බන්ධයෙන් සැලකීමේදී දරුවන් ප්‍රධාන තැනක් ගන්නා බවයි “ජනතා නීතිඥයෝ” සංවිධානය පවසන්නේ.

මෙතෙක් කල් පැවති කාන්තා හා ළමා කටයුතු අමාත්‍යාංශය අහෝසි කොට ඇති ආණ්ඩුව ළමා හා කාන්තා කටයුතු වෙනුවෙන් පත් කර ඇත්තේ පිරිමි රාජ්‍ය අමාත්‍යවරයෙකි.

“රටක ජාතික ආරක්ෂාව කියන දේ ප්‍රධාන තැනක් ගන්නේ දරුවෝ මේ රටේ. මොකද ජාතික ආරක්ෂාවක් වෙන්න බෑ දරුවන්ගේ ආරක්ෂාව නැත්නම්. ප්‍රථමික දේ තමයි දරුවන්. දැන් මේ වර්තමානයේ අමාත්‍යාංශ පත් කරපු අවස්ථාවේ දරුවන් සම්බන්ධයෙන්, කාන්තාවන් සම්බන්ධයෙන් මේ රටේ විශාල ආකාරයෙන් ලිංගික හිංසනයන්ට පත් වන අපයෝජනයන්ට පත් වන දරුවන් සහ කාන්තාවන් සිටින රටක ඒ හා සම්බන්ධ අමාත්‍යාංශයක්වත් ස්ථාපිත කරලා නෑ වෙනම.”

“ජනතා නීතිඥයෝ” සංවිධානයේ කැදවුම්කාර මණ්ඩලයේ සාමාජිකා නීතිඥ අචලා සෙනවිරත්න ඒ බව අවධාරණය කළේ අගෝස්තු 17 සඳුදා එම සංවිධානය විසින් පැවැත්වු පළමු මාධ්‍ය හමුවේදී අදහස් දක්වමිනි.

ශ්‍රී ලංකාවේ සෑම පැය දෙකකට වරක්ම කුඩා දරුවකු අපචාරයට ගොදුරු වන අතර දිනකට අඩුම වශයෙන් ස්ත්‍රී දූෂණ හතරක් සිදුවන බව අපරාධ සහ සංවිධානාත්මක අපරාධ දිසාව භාර නියෝජ්‍ය පොලිස්පති ප්‍රියන්ත ජයකොඩි 2019 වසරේ අපරාධ සංඛ්‍යා ලේඛන උපුටා දක්වමින් පහුගියදා හෙළි කර තිබුනි.

නියෝජ්‍ය පොලිස්පති වරයා එහිදී වැඩි දුරටත් පෙන්වා දී තිබුනේ පසුගිය වසරේ වාර්තා වී ඇති ළමා අපචාර ප්‍රමාණය 5292 ක් බවයි.

එම වසර තුළ ස්ත්‍රී දුෂණ 1642 ක් වාර්තා වී ඇති බව පවසන නියෝජ්‍ය පොලිස්පති ප්‍රියන්ත ජයකොඩිට අනුව සෑම පැය හයකට වරක්ම ශ්‍රී ලංකාව තුළ කාන්තාවක් දුෂණයට ලක් වේ.

රජයේ විගණකාධිපතිවරයා විසින් මෑතදී නිකුත් කරන ලද වාර්තාවකට අනුව පසුගිය අවුරුදු නමයක කාලය තුල ජාතික ළමා රක්ෂණ අධිකාරියේ පොලිස් අංශයට ලැබී ඇති පැමිණිලි සංඛ්‍යාව 48,361 කි. ඒ අතරින් විමර්ශනය කොට නීතිපති වරයාට යොමු කර ඇත්තේ සිද්ධි 413 ක් පමණි. එයිනුත් මහාධිකරණයේ පවරා ඇත්තේ නඩු 185 ක් පමණි.

“ළමා අපචාර, අපරාධ සහ තුවාල සිදුකිරීම් පසුගිය අවුරුදු හත තුල ඉහළ යාමක් දකින්නට ලැබුනද, එවන් සිදුවීම් වලක්වා ගැනීම සඳහා දිස්ත්‍රික්/ ප්‍රාදේශීය ළමාරක්ෂක/ දිස්ත්‍රික් මනෝසමාජීය නිලධාරීන් නිසියාකාර මෙහෙයවා ගැනීමට ජාතික ළමා රක්ෂණ අධිකාරියේ ඉහල පරිපාලන අධිකාරිය පියවර ගෙන නොමැත,” යි විගණකාධිපතිවරයා සිය වාර්තාවේ සඳහන් කර ඇත.

නව රජයේ ආරම්භයේදීම මෙවැනි තත්වයන් දක්නට ලැබෙන අතර ඉදිරියේදී එවැනි දැ සිදු නොවීම වෙනුවෙන් හඩ නැගීමට “ජනතා නීතිඥයෝ” සංවිධානය හා සම්බන්ධවන ලෙස නීතිඥ අචලා සෙනවිරත්න එහිදී සියලු නීතිඥවරුන්ට විවෘත ආරාධනයක්ද කළේය.

” මේවා මේ මුල ආරම්භයේදී අපි දකින දේවල්. ඒ නිසා මේවා ඉදිරියට නොවෙන්නට ඒවා සම්බන්ධයෙන් හඩ නගන්නට, විවිධාකාරයෙන් එකක් නෙමෙයි, මානව හිමිකම් උල්ලංඝනය කිරීම්, බන්ධනාගාර රැදවියන් සම්බන්ධයෙන් වන අකටයුතුකම්, ඒ වගේම සමජයේ තිබෙන තවත් මානව හිමිකම් උල්ලංඝණය වීම් සම්බන්ධයෙන් හා ප්‍රජාතන්ත්‍ර විරෝධී සිදුවීම් සියල්ල සම්බන්ධයෙන් ජනතා නීතිඥයෝ කියන මේ සංවිධානය ඉතාමත්ම ශක්තිමත්ව ඉදිරියේදී ඒ සම්බන්ධයෙන් වැඩ පිළිවෙලක් ක්‍රියාත්මක කරනවා කියලා අපි කියනවා.”

19 ගැන අවධානයෙන් ඉන්න

ඉතා කඩිනමින් 19 වන ව්‍යවස්ථා සංශෝධනයක් පැමිණෙන බව දැනගන්නට ඇතැයි මාධ්‍ය හමුවේදී සඳහන් කළ නීතිඥ අචලා සෙනවිරත්න එහිදී වැඩි දුරටත් අවධාරණය කළේ මෙය ඉතා අවධානයෙන් සිටිය යුතු අවස්ථාවක් බවයි.

19 වන ව්‍යවස්ථා සංශෝධනය මගින් ලබා දුන් ස්වාධින කොමිෂන් සභා වල ඇති වැදගත් කම පහදා දුන් නීතිඥ අචලා සෙනවිරත්න එම කොමිෂන් සභා අහෝසි වුවහොත් රටේ ජනතාව මුහුණ දෙන අනතුරුදායක තත්වය සම්බන්ධයෙන්ද මාධ්‍ය හමුවේදී කරුණු පැහැදිලි කළේය.

මෙම මාධ්‍ය හමුව සදහා “ජනතා නීතිඥයෝ” සංවිධානයේ කැදවුම්කාර මණ්ඩලයේ සාමාජිකයන් වන නීතිඥ සේනක පෙරේරා, නීතිඥ නාමල් රාජපක්ෂ සහ නීතිඥ උපාලි රත්නායක ද එක්ව සිටියේය.