வேகமாக பரவும் மர்ம நோய்… கொத்து கொத்தாக மருத்துவமனையில் அனுமதிக்கப்படும் மக்கள்!

By தமிழினி Last updated May 8, 2024

டெல்லியை ஒட்டியுள்ள காசியாபாத்தில் ஒருவர் பின் ஒருவராக மக்கள் மர்ம நோயால் பாதிக்கப்பட்டு வருகின்றனர். அதன்படி கடந்த 10 நாட்களில் 400 பேர் பாதிக்கப்பட்டுள்ளதாக தகவல்கள் தெரிவிக்கின்றனர். கடும் வயிற்று வலி, வாந்தி, தலைவலி மற்றும் காய்ச்சல் உள்ளிட்ட அறிகுறிகளுடன் அவர்கள் அனுமதிக்கப்பட்டுள்ளனர்.

இது குறித்து அப்பகுதி மக்கள் கவுன்சிலரிடம் புகார் அளித்த நிலையில், அவர் இந்த விவகாரம் குறித்து மருத்துவ அதிகாரிகளுக்கு தகவல் தெரிவித்துள்ளார். தகவல் அறிந்து சென்ற சுகாதாரத்துறை அதிகாரிகள், அந்த சுற்றுவட்டார பகுதிகளில் இருந்து 15 தண்ணீர் மாதிரிகளை சேகரித்துள்ளனர். தண்ணீர் பிரச்னை காரணமாக இந்த தொற்று பரவுகிறதா என்பதை கண்டுபிடிக்க இந்த நடவடிக்கை மேற்கொள்ளப்பட்டுள்ளது.

இது குறித்து கூறிய காசியாபாத் தலைமை மருத்துவ அதிகாரி, “சாயா கோல்ட் அவன்யூ மற்றும் அதனை சுற்றியுள்ள பகுதிகளில் இருந்து தண்ணீர் மாதிரிகளை சேகரித்துள்ளோம். அடுத்த 48 முதல் 72 மணி நேரத்திற்குள் அதன் பரிசோதனை முடிவுகள் வெளிவந்துவிடும்” என தெரிவித்துள்ளார்.

இது குறித்து தெரிவித்த அப்பகுதி மக்கள், “கடந்த சில நாட்களாக நிலமை மோசமாகிக்கொண்டே செல்கிறது. குறிப்பாக கடந்த 3 நாட்களில் மட்டும் ஏராளமான மக்கள் மர்ம நோயால் பாதிக்கப்பட்டுள்ளனர்” என்று தெரிவித்துள்ளனர். அதுமட்டுமன்றி, காலநிலை மாற்றம் மற்றும் வெப்பம் காரணமாக இந்த பாதிப்பு ஏற்படுவதாக தாங்கள் உணர்வதாக அப்பகுதி மக்கள் தெரிவிக்கின்றனர்.

தண்ணீர் காரணமாகவே இந்த தொற்று பரவுவதாக சிலர் கூறுகின்றனர். இது குறித்து அப்பகுதி வாசியான நிதின் கூறுகையில், “கழிவுநீர் குழாயில் கசிவு ஏற்பட்டு, தண்ணீருடன் கலந்துள்ளதாக நாங்கள் கருதுகிறோம். அதன் காரணமாகவே இத்தனை பேர் பாதிக்கப்பட்டுள்ளனர்” என்று அவர் தெர்வித்துள்ளார்.

இந்நிலையில் கடந்த வெள்ளி மற்றும் சனிக்கிழமைகளில் அப்பகுதில் மருத்துவ முகாம் நடத்தப்பட்டு நோய் எதிர்ப்பு சக்தி மாத்திரைகள் வழங்கப்பட்டுள்ளது குறிப்பிடத்தக்கது.