எத்தனை கோடி கொடுத்தாலும் விளம்பரத்தில் நடிக்கமாட்டேன்: சாய் பல்லவி.

இரண்டு கோடி ரூபாய் சம்பளமாகத் தருவதாகக் கூறி முன்னணி அழகுசாதன கிரீம் தயாரிப்பு நிறுவனம் ஒன்று விளம்பரத்தில் நடிப்பதற்கு சாய்பல்லவியை அணுகி உள்ளது.

ஆனால், எத்தனை கோடி கொடுத்தாலும் அதுபோன்ற விளம்பரங்களில் நடிக்கமாட்டேன் என அவர் மறுத்துவிட்டாராம்.

நான் விளம்பரப்படுத்தும் ஒப்பனைப் பொருள்களை நானே பயன்படுத்திப் பார்க்காதபோது அதனால் அதிக பயன் விளையும் என மக்கள் மத்தியில் பொய்யான தகவலைப் பரப்ப விரும்பவில்லை என தான் விளம்பரத்தில் நடிக்க மறுத்ததற்கான காரணத்தைக் கூறியுள்ளார் சாய் பல்லவி.

பொதுவாக சினிமா பிரபலங்கள் பலரும் படங்களில் நடிப்பதுடன் விளம்பரங்களிலும் நடித்து கோடி கோடியாய் சம்பாதித்து வருகின்றனர்.

அழகு சாதனப் பொருட்கள், குளிர்பானங்கள் முதல் புகையிலை வரை அனைத்து வகையான விளம்பரங்களிலும் நடித்து முன்னணி நடிகர், நடிகைகள் கல்லாகட்டி வருகின்றனர்.

மக்களுக்கு தீங்கு விளைவிக்கும் பொருள்களாக இருந்தாலும் கோடிக்கணக்கில் பணத்தை அள்ளிக் கொடுத்தால் அதில் நடிக்க பல நடிகர் நடிகைகள் ஆர்வம் காட்டி வரும் சூழலில், “பணம் முக்கியமல்ல, மக்களின் வாழ்க்கையோடு விளையாட விரும்பவில்லை,” என்று சாய் பல்லவி நாசூக்காக மறுத்துள்ளார்.

சுத்த சைவமாக இருக்கும் நடிகர், நடிகைகள்கூட அசைவ உணவுகளைப் பிரபலப்படுத்தும் விளம்பரங்களில் நடிக்கின்றனர்.

உடலுக்குத் தீங்கு விளைவிக்கும் புகையிலை விளம்பரத்தில் பாலிவுட் நடிகர்கள் பலர் போட்டி போட்டு நடிக்கின்றனர். இவர்களுக்கு மத்தியில் மக்களுக்கு தீங்கு விளைவிக்கும் பொருள்களை விளம்பரம் செய்யமாட்டேன் என்று தீர்க்கமாக இருந்து வருகிறார் நடிகை சாய் பல்லவி.

அத்துடன், சினிமாவிலும் சொந்த வாழ்க்கையிலும் அதிகம் முக அலங்காரம் செய்துகொள்ளாமல் இயல்பான தோற்றத்துடன் இருப்பதையே சாய் பல்லவி விரும்புகிறார்.

ஜார்ஜியாவில் மருத்துவப் படிப்பு முடித்த கையோடு அவர் திரைப்படங்களில் நடித்து வருகிறார். தான் ஒரு மருத்துவர் என்பதால் அழகு சாதனப் பொருள்களால் சருமத்துக்கு ஏற்படும் ஆபத்து குறித்தும் அவர் நன்கு அறிந்திருக்கிறார்.

அதனால்தான் அழகுசாதன விளம்பரத்தில் நடிக்க இவரை அணுகியபோது, முக அலங்காரம் செய்துகொள்ளாத நான் அது சம்பந்தமான விளம்பரத்தில் நடிக்கமாட்டேன் எனக் கூறியுள்ளாராம்.

இதனிடையே, கோலிவுட்டின் ரெளடி பேபியாக கலக்கி வரும் நடிகை சாய் பல்லவி தனது 32வது பிறந்தநாளை கொண்டாடி வரும் நிலையில், அவருக்கு சமூக ஊடகங்களில் வாழ்த்துகள் குவிந்த வண்ணம் உள்ளது.

இந்நிலையில், அவரின் சொத்து மதிப்பு, சம்பள விவரம் குறித்த தகவல்களும் தெரிய வந்துள்ளன. அதன்படி நடிகை சாய் பல்லவியின் சொத்து மதிப்பு ரூ.40 முதல் ரூ.50 கோடி இருக்கும் என கூறப்படுகிறது. இவருக்கு சொந்தமாக கோத்தகிரியில் சொகுசு பங்களாவும் ஏராளமான சொகுசு கார்களையும் வைத்திருக்கிறார் சாய் பல்லவி.

தற்போது ‘அமரன்’ திரைப்படத்தில் நடிகர் சிவகார்த்திகேயனுக்கு ஜோடியாக நடித்து வருகிறார் சாய் பல்லவி.

கடந்த ஆண்டு வரை ஒரு படத்துக்கு ரூ.3 கோடி வரை சம்பளம் வாங்கி வந்த சாய் பல்லவி தற்போது பாலிவுட்டுக்குப் போனதும் தன் சம்பளத்தை இரு மடங்காக உயர்த்தி இருக்கிறாராம். பாலிவுட்டில் உருவாகி வரும் ‘ராமாயணா’ படத்தில் சீதா கதாபாத்திரத்தில் நடிப்பதற்காக சாய் பல்லவிக்கு ரூ.6 கோடி சம்பளமாக வழங்கப்பட்டு உள்ளதாம்.