உத்தரபிரதேச முதல்வர் யோகி ஆதித்யநாத்துக்கு கொலை மிரட்டல்

உத்தரபிரதேச முதலமைச்சர் யோகி ஆதித்யநாத்துக்கு மும்பையில் கொலைமிரட்டல் விடுக்கப்பட்டதால் பரபரப்பு நிலவியது.

மும்பை போக்குவரத்து காவல்துறையின் கட்டுப்பாட்டு அறைக்கு தொலைபேசியில் அழைத்த நபர், யோகி ஆதித்யநாத்தை கொலை செய்யப்போவதாக மிரட்டியுள்ளார். 10 நாட்களில் யோகி ஆதித்யநாத் பதவி விலக வேண்டும் என்றும் அப்படி யோகி பதவிவிலகவில்லை என்றால், தேசியவாத காங்கிரஸ் எம்எல்ஏ பாபா சித்திக் போல கொல்லப்படுவார் என்றும் மிரட்டல் விடுத்த நபர் தெரிவித்துள்ளார்.

கொலை மிரட்டலை அடுத்து யோகி ஆதித்யநாத்தின் பாதுகாப்பு பலமடங்கு பலப்படுத்தப்பட்டுள்ளது. கடந்த சில நாட்களாக பாலிவுட் பிரபலங்களுக்கு கொலை மிரட்டல் அதிகரித்து வரும் நிலையில், உத்தரபிரதேச முதலமைச்சருக்கு கொலை மிரட்டல் விடுக்கப்பட்டது சர்ச்சையை ஏற்படுத்தியுள்ளது.

இந்நிலையில் யோகி ஆதித்யநாத்துக்கு கொலை மிரட்டல் விடுத்ததாக 24 வயது பெண்ணை மும்பை போலீசார் ஞாயிற்றுக்கிழமை கைது செய்துள்ளதாக செய்தி நிறுவனம் பிடிஐ செய்தி வெளியிட்டுள்ளது குறிப்பிடத்தக்கது.

மகாராஷ்டிராவின் தானே பகுதியில் உள்ள உலாஸ்நகர் பகுதியைச் சேர்ந்த பாத்திமா கான் தான் அந்த பெண் என அடையாளம் காணப்பட்டுள்ளார். மேலும் அவர் தனது குடும்பத்துடன் வசித்து வரும் அவர் மனநிலை சரியில்லாதவர் என்று காவல்துறை மேற்கோள்காட்டி பிடிஐ செய்தி வெளியிட்டுள்ளது.