குத்துச்சண்டை ஜாம்பவான் மைக் டைசன் , ‘யூடியூப்’ புகழ் ஜேக் பாலிடம் தோல்வி.

குத்துச்சண்டை ஜாம்பவனான மைக் டைசன், 58, நவம்பர் 15ஆம் தேதி வெள்ளிக்கிழமை இரவு நடைபெற்ற ‘ஹெவிவெயிட்’ குத்துச்சண்டை போட்டியில் ‘யூடியூப்’ புகழ் ஜேக் பாலிடம், 27 தோல்வியடைந்தார்.

டெக்சஸ், ஆர்லிங்டனில் உள்ள ‘ஏடிஅண்ட்டி’ அரங்கத்தில் போட்டி பரபரப்பாக நடைபெற்றது.

பாலியல் பலாத்காரம், போதைப் பழக்கம் என பல்வேறு சர்ச்சைகளில் சிக்கி புகழை இழந்த மைக் டைசன் இருபது ஆண்டுகளுக்குப் பிறகு தொழில்முறை போட்டிக்குத் திரும்பியிருந்தார்.

இதனால் குத்துச்சண்டை ரசிகர்கள் போட்டியைக் காண ஆவலுடன் காத்திருந்தனர்.

இரு வீரர்களையும் அறிமுகப்படுத்தும் நிகழ்ச்சியில் மைக் டைசன், ஜேக் பாலின் கன்னத்தில் இரு முறை அறைந்தது சமூக ஊடகங்களில் அதிகம் பேசப்பட்டது.

இந்த நிலையில் டெக்சஸ் மாநிலத்தில் மைக் டைசன், ஜேக் பால் குத்துச் சண்டை எட்டு சுற்றுகளாக நடைபெற்றது.

ஆரம்பத்தில் மைக் டைசன் ஆவேசமாக முன்னேறி வந்தாலும் அதை ஜேக் பால் தனது வேகமான நகர்வால் சமாளித்தார். வயதான டைசன் மீது 3வது, 7வது சுற்றில் பால் சரமாரியாக குத்துகளை வீசினார்.

மைக் டைசனை 80-72, 79-73, 79-73 என்ற வித்தியாசத்தில் ஜேக் பால் வீழ்த்தினார்.

எட்டாவது சுற்றின் இறுதி விநாடிகளுக்கு முன்பு ​மணி ஒலிப்பதற்கு முன்பு மைக் டைசனை நோக்கி ஜேக் பால் வணங்கினார்.

இந்தப் போட்டி மைக் டைசன் ரசிகர்களுக்கு ஏமாற்றமாக அமைந்தது.

அமெரிக்காவைச் சேர்ந்த குத்துச்சண்டை வீரரான மைக் டைசன், இதற்கு முன்பு 58 போட்டிகளில் மோதி 50ல் வெற்றி பெற்றுள்ளார். அவரது இடிபோன்று இறங்கும் குத்துகளால் நிலைகுலைந்து இதுவரை 44 பேர் ‘நாக்அவுட்’ ஆகி தோற்றுள்ளனர்.

கடந்த 2013ஆம் ஆண்டு முதல் தொழில்முறையிலான குத்துச்சண்டை போட்டியில் ஜேக் பால் பங்கேற்று வருகிறார். இதுவரை 11 போட்டிகளில் பங்கேற்று 10ல் வெற்றி பெற்றார். இதில் ஏழு போட்டிகளை ‘நாக்-அவுட்’ முறையில் வெற்றி பெற்றுள்ளார்.