நிதி மோசடிகளைத் தடுக்க விளம்பர விதிமுறைகளை முடுக்கிவிட்ட மெட்டா

ஆஸ்திரேலியர்களைக் குறிவைக்கும் நிதி மோசடிச் செயல்களைத் தடுக்க இன்ஸ்டகிராம், ஃபேஸ்புக் சமூக ஊடகத் தளங்களை நடத்தும் மெட்டா நிறுவனம், நிதிச் சேவை விளம்பரங்களுக்குக் கடுமையான விதிமுறைகளை அறிமுகப்படுத்தியுள்ளது.

திங்கட்கிழமையன்று (டிசம்பர் 2) மெட்டா அத்தகவலை வெளியிட்டது.

கடந்த அக்டோபர் மாதம் போலியெனக் கூறப்படும் 8,000 விளம்பரங்களைத் தனது சமூக ஊடகத் தளங்களிலிருந்து அகற்றியது. ஆஸ்திரேலிய வங்கிகளுடன் இணைந்து மெட்டா அந்நடவடிக்கையை எடுத்தது. அந்த விளம்பரங்கள், பிரபலமானவர்களின் படங்களைக் கொண்டு மக்களைப் போலி முதலீட்டுத் திட்டங்களுக்கு ஈர்ப்பதாக நம்பப்படுகிறது.

அதனைத் தொடர்ந்து கடுமையான விதிமுறைகள் இப்போது அறிமுகப்படுத்தப்பட்டுள்ளன.

புதிய விதிமுறைகளின்கீழ் சம்பந்தப்பட்ட விளம்பரத்தால் பலனடைவோர், அதற்குக் கட்டணம் செலுத்தியவர்கள் ஆகியோரின் விவரங்கள் உறுதி செய்யப்பட வேண்டும். சம்பந்தப்பட்டவர்களின் ஆஸ்திரேலிய நிதிச் சேவைகள் உரிம எண் உள்ளிட்ட விவரங்கள் அவற்றில் அடங்கும்.

அதன் பிறகே அவர்கள் நிதிச் சேவை விளம்பரங்களை வெளியிட முடியும் என்று மெட்டா தெரிவித்தது. உறுதி செய்யப்பட்ட விவரங்கள் விளம்பரங்களில் இடம்பெறுவதும் புதிய விதிமுறைகளின்கீழ் கட்டாயமாகும்.