போலி கனடா விசாவைக் காட்டி நாட்டை விட்டு வெளியேற முயன்ற 11 பேர் , தரகருடன் விமான நிலையத்தில் கைது

போலியாக தயாரிக்கப்பட்ட கனடா விசாக்களைப் பயன்படுத்தி கனடாவுக்கு தப்பிச் செல்ல முயன்ற 11 இலங்கையர்களையும், அவர்களை விமான நிலையத்திற்கு அழைத்து வந்த தரகரையும் கட்டுநாயக்க விமான நிலையத்தில் குடிவரவு மற்றும் குடியகல்வு திணைக்கள அதிகாரிகள் கைது செய்தனர்.

கைது செய்யப்பட்டவர்களில் அரசு ஊழியர்கள், வணிகர்கள் மற்றும் வெளிநாடு சென்று திரும்பியவர்கள் அடங்குவர். இவர்கள் துபாய் வழியாக கனடா செல்ல திட்டமிட்டிருந்தனர். விசாரணையில், இவர்கள் ஒவ்வொருவரும் 45 லட்சம் ரூபாய் தரகர்களுக்கு செலுத்தியிருப்பது தெரியவந்தது. குடிவரவு மற்றும் குடியகல்வு திணைக்களம் இந்த மோசடி குறித்து விரிவான விசாரணை நடத்தி வருகிறது.

கைது செய்யப்பட்ட தரகரைத் தவிர, நாட்டில் உள்ள மற்றொரு தரகரும் இந்த நபர்களுக்கு போலி ஆவணங்களை தயாரித்து வழங்கியுள்ளார். கனடாவிலும் அவர்களுக்கு உதவ தரகர் இருக்கிறார். கைது செய்யப்பட்டவர்கள் கனடாவில் வேலைக்காக பணம் செலுத்தியதாக கூறினாலும், அவர்களிடம் வேலை ஒப்பந்தங்கள் இல்லை. கடந்த சில மாதங்களில் தரகர்களை சந்தித்து கனடாவில் நிரந்தர குடியுரிமை பெறுவதாக நம்பி பணம் செலுத்தியுள்ளனர்.

இந்த சம்பவம் தொடர்பாக மேலும் விசாரணை நடத்தப்பட்டு வருகிறது. இந்த மோசடியில் ஈடுபட்ட மற்ற நபர்களை கைது செய்ய நடவடிக்கை எடுக்கப்படும் என்று குடிவரவு மற்றும் குடியகல்வு திணைக்களம் தெரிவித்துள்ளது. இலங்கை காவல்துறையும் இது குறித்து விசாரணை நடத்தி வருகிறது.