அதிமுக – பாஜக கூட்டணி அமைந்தால் திமுகவுக்கு பெரிய சிக்கல்!

எடப்பாடி பழனிசாமி அமைக்கும் மெகா கூட்டணியால், விஜய்யின் தமிழக வெற்றிக் கழகத்தாலும் திமுக கூட்டணிக்கு 2026 சட்டமன்றத் தேர்தலில் பெரிய பாதிப்பு உருவாகும் என்கிறார்கள்.

அதிமுக பொதுச் செயலாளர் எடப்பாடி பழனிசாமி நேற்று தனது கட்சியின் மூத்த நிர்வாகிகளோடு டெல்லி சென்று உள்துறை அமைச்சர் அமித் ஷாவை சந்தித்தது அரசியல் அரங்கில் விவாதத்தை கிளப்பியுள்ளது. முக்கியமாக திமுக தரப்பு எடப்பாடி பழனிசாமியின் இந்த காய் நகர்த்தலால் சற்று அதிர்ச்சியடைந்துள்ளதாக கூறுகிறார்கள்.

2026 சட்டமன்றத் தேர்தலில் பல அணிகள் அமைந்து போட்டியிட்டால் ஆளும் திமுக கூட்டணிக்கு சாதகமாக அமையும் என்று அரசியல் விமர்சகர்கள் கூறிவந்தனர். 2024 மக்களவைத் தேர்தலில் திமுக கூட்டணி அனைத்து தொகுதிகளிலும் வெற்றி பெற்றதற்கு முக்கிய காரணமாக கூறப்படுவது, எதிர்கட்சி வாக்குகள் பிரிந்தது தான் என்கிறார்கள்.

ஐந்தாண்டுகள் எந்த கட்சி ஆட்சியில் இருந்தாலும் ஆட்சிக்கு எதிரான வாக்குகள் என குறிப்பிட்ட வாக்குகள் மாறும், 2021 சட்டமன்றத் தேர்தலை பத்தாண்டு கால ஆட்சிக்குப் பின்னர் அதிமுக எதிர்கொண்டது. இருப்பினும் பாஜக, பாமக, தமாகா உள்ளிட்ட கட்சிகளை இணைத்துக் கொண்டு தேர்தலை சந்தித்து 75 இடங்களை எடப்பாடி பழனிசாமி கூட்டணிக்கு பெற்றுத்தந்தார்.

2021 சட்டமன்றத் தேர்தலில் திமுக கூட்டணி 2 கோடியே 09 லட்சத்து 82 ஆயிரத்து 088 வாக்குகள் பெற்றது. அதாவது 45.38 சதவீத வாக்குகளை அக்கூட்டணி பெற்றது.
அதிமுக தலைமையிலான கூட்டணி 1 கோடியே 83 லட்சத்து 63 ஆயிரத்து 499 வாக்குகளை பெற்றது. அதாவது 39.71 சதவீத வாக்குகள் அந்த கூட்டணிக்கு கிடைத்தது.

கிட்டதட்ட 5.5 சதவீத வாக்குகள் மட்டுமே அதிமுக கூட்டணிக்கு குறைவாக இருந்தது. மேலும் அமமுக, தேமுதிக ஆகிய கட்சிகள் இணைந்து தனி அணியாக களம் கண்டன. அந்த கட்சிகள் இணைந்து சுமார் 3 சதவீத வாக்குகளைப் பெற்றன. இந்த வாக்குகளையும் கழித்து பார்த்தால் 2021 தேர்தலில் திமுக கூட்டணிக்கும் தற்போது உருவாக உள்ள அதிமுக கூட்டணிக்கும் இடையேயான வித்தியாசம் என்பது 2 சதவீதம் தான்.

தற்போது அமமுக பாஜக கூட்டணியிலும், தேமுதிக அதிமுக கூட்டணியிலும் அங்கம் வகிக்கிறது. அதிமுக – பாஜக கூட்டணி அமைந்து இந்த கட்சிகளும் இணைந்து போட்டியிடும் போது திமுகவை எளிதாக வீழ்த்த முடியும் என்று புள்ளிவிவர கணக்குகளை சரிபார்த்து இரு கட்சிகளின் தலைமைகளும் கை குலுக்கியுள்ளன.

2021 தேர்தலை விட 2026 சட்டமன்றத் தேர்தல் சுவாரஸ்யம் நிறைந்ததாக மாறுவதற்கு முக்கிய காரணமாக இருப்பது விஜய் தொடங்கியுள்ள தமிழக வெற்றிக் கழக்த்தின் வரவு தான். பாஜக எதிர்ப்பு மற்றும் பெரியார், அம்பேத்கர் கொள்கைகளை பேசுவதை அக்கட்சி வாடிக்கையாகக் கொண்டுள்ளது. திமுக தான் இந்த அரசியலை தொடர்ச்சியாக பேசி சிறுபான்மையினர் வாக்குகளை தன் பக்கம் இழுத்து வந்தது. எனவே விஜய்யின் வருகை என்பது திமுகவின் வாக்குகளை வேட்டையாடும் வகையில் இருக்கும் என்று கணிக்கிறார்கள் அரசியல் வல்லுநர்கள்.

எடப்பாடி பழனிசாமியிடம் கூட்டணி குறித்து கடந்த சில மாதங்களாக கேள்வி எழுப்பப்படும் போதெல்லாம் பொறுத்திருந்து பாருங்கள், மெகா கூட்டணி அமைத்து ஆட்சி அமைப்போம் என்று கூறிவந்தார். அதற்கான அஸ்திவாரம் டெல்லியில் போடப்பட்டுவிட்டதாக நம்பிக்கை தெரிவிக்கிறார்கள்.