சாமர சம்பத் வங்கி கணக்கிலிருந்து பணம் எடுத்தது எனது அறிவுறுத்தலின் பேரில் தான்.. அது சரியானது..- ரணிலின் சிறப்பு அறிக்கை (Video)

விளக்கமறியலில் வைக்கப்பட்டுள்ள நாடாளுமன்ற உறுப்பினர் சாமர சம்பத் தசநாயக்க தொடர்பில் முன்னாள் ஜனாதிபதி ரணில் விக்கிரமசிங்க சிறப்பு அறிக்கை ஒன்றை வெளியிட்டுள்ளார்.

சாமர சம்பத் எம்.பியின் குடும்ப உறுப்பினர்கள் என்னை சந்தித்தனர். பிரதமராக இருந்த காலத்தில், ஜனாதிபதி மைத்திரிபால சிறிசேனவுடன் எனது ஒப்புதலின் பேரில், அப்போதைய திறைசேரி செயலாளர் ஒரு சுற்றறிக்கை வெளியிட்டார்.

மாகாண சபை நிதியை வைப்பு கணக்குகளில் வைக்க முடியாது என்று அந்த சுற்றறிக்கையில் கூறப்பட்டிருந்தது. அரசாங்க நிதியையும் மற்ற நிதியையும் அந்த ஆண்டுக்குள் செலவிட வேண்டும். இல்லையென்றால், அந்த நிதியை நிதி அமைச்சுக்கோ அல்லது மாகாண சபையின் நிதி அமைச்சுக்கோ திருப்பி கொடுக்க வேண்டும்.

அந்த நிதியை சேமித்து வைப்பு கணக்குகளில் வைத்து பின்னர் வேறு திட்டங்களில் பயன்படுத்துவது சட்டவிரோதமானது என்பதால் நாங்கள் அந்த நடவடிக்கையை எடுத்தோம். அந்த நேரத்தில் முதலமைச்சர் சாமர சம்பத்தும் மற்றும் சில முதலமைச்சர்களும் என்னிடம் பேசினார்கள். அதை செய்ய முடியாத காரணத்தை தெரிவித்தனர். அதன்படி அவர்கள் அந்த நிதியை வைப்பு கணக்குகளில் இருந்து எடுத்தனர்.

ஊவா மாகாணத்தில் மட்டுமல்ல, மற்ற மாகாணங்களிலும் இந்த நடவடிக்கைகள் மேற்கொள்ளப்பட்டன. மேலும், அமைச்சர் சாமர சம்பத் அவ்வப்போது என்னிடம் பேசினார். கல்வி போன்ற விஷயங்களில் நான் உதவினேன். ஆனால் நாங்கள் அப்போது இரு வேறு பக்கங்களில் இருந்தோம். சாமர சம்பத் முதலமைச்சராக இருந்தபோது, தற்போதைய அமைச்சர் சமந்த வித்யாரத்ன ஒரு புகார் அளித்தார். இது எனது வேலை இல்லை என்றும், லஞ்ச ஊழல் விசாரணை ஆணையத்துடன் கலந்துரையாடும்படியும் நான் அந்த குழுக்களிடம் கூறினேன். முதலமைச்சர்கள் கட்சி அல்லது எதிர்ப்பு வேலைகளில் நான் தலையிட முடியாது என்றும் நான் கூறினேன்.

இது குறித்து ஆணையம் விசாரணை நடத்தியுள்ளது. அந்த விசாரணைகளில் ஒன்றில் கூட அவர் குற்றவாளி என்று நிரூபிக்கப்படவில்லை. அவர் சந்தேக நபர் என்று கூட அறிவிக்கப்படவில்லை. அந்த விஷயங்களின் அடிப்படையில்தான் இந்த விசாரணை நடந்து கொண்டிருக்கிறது. புதிய குற்றச்சாட்டுகள் அல்லது புதிய சம்பவங்கள் பற்றி அல்ல. மற்றொன்று என்னவென்றால், சாமர சம்பத் வாக்குமூலம் கொடுக்கும்போதே அவர் கைது செய்யப்பட்டதாக அறிக்கைகள் வெளியிடப்படுகின்றன. அப்படி எப்படி சொல்ல முடியும்?

சாமர சம்பத் எம்.பி நாடாளுமன்றத்தில் அடிக்கடி பேசுகிறார். அவர் வலுவாக எதிர்க்கட்சியின் குரலை ஒலிக்கிறார். இந்த நடவடிக்கை , நாடாளுமன்றத்தில் அவரது தலையீட்டுடன் தொடர்புடையதா என்பது ஒரு பெரிய கேள்வியாக தெரிகிறது. இது குறித்து நாடாளுமன்றத்திலும் அவர் விசாரணை கோர வேண்டும் என்று நான் நினைக்கிறேன். அது நாடாளுமன்ற சிறப்புரிமை மீறலா என்றும் விசாரிக்கப்பட வேண்டும் என முன்னாள் ஜனாதிபதி ரணில் விக்கிரமசிங்க சிறப்பு அறிக்கை ஒன்றை வெளியிட்டுள்ளார்.