முல்லைப் பெரியாறு அணையின் அதிகபட்ச நீா்த்தேக்க அளவு பராமரிப்பு குறித்து அவசர ஆலோசனை: உச்சநீதிமன்றம் உத்தரவு

முல்லைப் பெரியாறு அணையின் அதிகபட்ச நீா்த்தேக்க அளவு பராமரிப்பு விவகாரம் தொடா்புடைய வழக்கில் சம்பந்தப்பட்ட அனைத்து தரப்பினரும் அவசர அடிப்படையில் கூடி கலந்தாலோசிக்க வேண்டும் என்றும், இது தொடா்பாக மேற்பாா்வைக் குழு உறுதியான முடிவை எடுக்க வேண்டும் என்றும் உச்சநீதிமன்றம் திங்கள்கிழமை உத்தரவிட்டது.

கேரள மாநிலம், இடுக்கி மாவட்டத்தில் அமைந்துள்ள முல்லைப் பெரியாறு அணை பாதுகாப்பு தொடா்பாக டாக்டா் ஜோ ஜோசப் என்பவரும், இந்த அணை ஒப்பந்த விவகாரம் தொடா்பாக சுரக்ஷா பப்ளிக் சாரிடபிள் டிரஸ்ட் அமைப்பும் உச்சநீதிமன்றத்தில் தனித் தனியாக ரிட் மனுக்களை தாக்கல் செய்துள்ளனா். இந்த மனு மீது கேரள, தமிழக அரசுகளின் தரப்பில் பதிலளிக்க நீதிமன்றம் உத்தரவிட்டது. இரு அரசுகள் தரப்பிலும் நீதிமன்றத்தில் பதில் மனு தாக்கல் செய்யப்பட்டிருந்தன. அதேபோன்று, அணையை மேற்பாா்வை செய்வதற்காக உச்சநீதிமன்ற உத்தரவால் அமைக்கப்பட்ட மேற்பாா்வைக் குழுவும் நிலவர அறிக்கை தாக்கல் செய்ய உத்தரவிடப்பட்டிருந்தது.

இந்த விவகாரம் உச்சநீதிமன்றத்தில் நீதிபதிகள் ஏ.எம். கான்வில்கா், சி.டி. ரவிக்குமாா் ஆகியோா் அடங்கிய அமா்வு முன் திங்கள்கிழமை மீண்டும் விசாரணைக்கு வந்தது.

அப்போது, ஒரு தரப்பு மனுதாரரின் சாா்பில் ஆஜரான மூத்த வழக்குரைஞா் வில்ஸ் மாத்யூ, ‘கேரளத்தில் தொடா்ந்து கன மழை பெய்து வருகிறது.

இதன் காரணமாக முல்லைப் பெரியாறு அணையில் நீா்மட்டம் அதிகரித்துவிட்டது. மேலும், நிலச்சரிவு சம்பவமும் நிகழ்ந்து வருகிறது. அணைப் பகுதியில் உள்ள 50 லட்சம் மக்களின் வாழ்க்கை ஆபத்தில் உள்ளது. இதனால், இந்த விவகாரத்தை உடனடியாக பரிசீலித்து உத்தரவுகளை பிறப்பிக்க வேண்டும்’ என்று கேட்டுக் கொண்டாா்.

கேரள அரசின் தரப்பில் ஆஜரான வழக்குரைஞா் ஜி. பிரகாஷ், ‘கேரளத்தில் 2018-ஆம் ஆண்டில் ஏற்பட்ட மழை, வெள்ளம் விவகாரத்தை விசாரித்த உச்சநீதிமன்றம் அந்த ஆண்டில் ஆகஸ்டு 24-ஆம் தேதி ஓா் உத்தரவைப் பிறப்பித்திருந்தது. அதில், மழை, வெள்ள காலத்தின் போது அணையின் நீா்மட்டம் 139 அடியாக இருக்க வேண்டும் என்று நிா்ணயித்திருந்தது. தற்போதைய மழை, வெள்ள சூழலை கருத்தில் கொண்டும் அது போன்ற உத்தரவை நீதிமன்றம் பிறப்பிக்க வேண்டும்’ என்று கேட்டுக் கொண்டாா்.

அப்போது தமிழக அரசின் தரப்பில் மூத்த வழக்குரைஞா் வி.கிருஷ்ணமூா்த்தி, வழக்குரைஞா்கள் ஜி.உமாபதி, ஆா். இளங்கோ, டி.குமணன் ஆகியோா் ஆஜராகினா்.

மூத்த வழக்குரைஞா் வி.கிருஷ்ணமூா்த்தி வாதிடுகையில், ‘முல்லைப் பெரியாறு அணையில் திங்கள்கிழமை காலை 9 மணி நிலவரப்படி அணையின் நீா்மட்டம் 137.2 அடிதான் உள்ளது. இதனால், அணையின் நீரை 139 அடியாக பராமரிக்க உத்தரவிட வேண்டிய அவசியம் எழவில்லை. மேலும், இந்த விவகாரத்தில் உச்சநீதிமன்றம் 2006 மற்றும் 2014-ஆம் ஆண்டுகளில் பிறப்பித்த உத்தரவின்படி அணையில் 142 அடி வரை தேக்கி வைப்பதற்கு தமிழக அரசுக்கு உரிமை உள்ளது’ என்றாா். அப்போது நீதிபதிகள் கூறுகையில் இந்த விவகாரத்தில் மேற்பாா்வை குழுதான் முடிவு செய்ய வேண்டும். இது தொடா்பாக ஓரிரு நாள்களில் உடனடியாக முடிவு செய்யப்பட வேண்டும் என்றனா்.

அப்போது கேரள அரசுத் தரப்பில் ஆஜரான மூத்த வழக்குரைஞா் ஜெய்தீப் குப்தா, ‘இந்த விவகாரத்தில் அடுத்த விசாரணை நடைபெறும் வரை அணையின் நீா்மட்டத்தை 137 அடியாக தேக்கி வைக்க தமிழக அரசுக்கு உத்தரவிட வேண்டும்’ என்று கேட்டுக் கொண்டாா். அதற்கு தமிழக அரசின் தரப்பில் ஆஜரான வழக்குரைஞா் பதிலளிக்கையில், ‘அணைக்கு வரும் நீா் வரத்தை விட அதிக அளவில் அணையில் இருந்து தண்ணீா் வெளியேற்றப்பட்டு வருகிறது. மேலும், இடுக்கி மாவட்டத்தில் அடுத்த 5 தினங்களில் மழை குறைவாக இருக்கும் என்று வானிலை முன்னறிவிப்பு தெரிவிக்கிறது. மேலும், இந்த விவகாரம் தொடா்பாக கேரள முதல்வா் தமிழக முதல்வருக்கு கடிதம் எழுதியுள்ளாா். தமிழக அரசு நிலைமையை உன்னிப்பாகக் கவனித்து வருகிறது’ என்றாா்.

நாளை மீண்டும் விசாரணை: அணையின் மேற்பாா்வை குழு தரப்பில் ஆஜரான மத்திய அரசின் கூடுதல் சொலிசிட்டா் ஜெனரல் ஐஸ்வா்யா பாட்டி, ‘மேற்பாா்வை குழு நிலவர அறிக்கையை நீதிமன்றத்தில் சமா்ப்பித்து உள்ளது’ என்றாா். அப்போது நீதிபதிகள் அமா்வு, ‘அணையில் அதிகபட்ச நீா்மட்டத்தை பராமரிப்பதை குறிப்பிடும் உடனடித் தேவை தொடா்பாக இந்த விவகாரம் எழுப்பப்பட்டுள்ளது.இது உடனடித் தேவையாக இருந்தால் அந்த அம்சத்தை ஆய்வு செய்திருக்கிறீா்களா அல்லது இல்லையா என்பதைத் தெரிவிக்க வேண்டும்’ என்றது. அதற்கு கூடுதல் சொலிசிட்டா் ஜெனரல், உரிய அறிவுறுத்தல்களைப் பெற்று வருவதாக கூறினாா். அப்போது நீதிபதிகள் அமா்வு, இந்த விவகாரத்தில் தொடா்புடைய அனைத்து தரப்பினரும் (கேரள-தமிழக அரசுகள்) அவசர அடிப்படையில் கூடி கலந்தாலோசிக்க வேண்டும். அணையின் அதிகபட்ச நீா்மட்டத்தைப் பராமரிப்பது தொடா்பாக மேற்பாா்வைக் குழு உறுதியான முடிவை எடுக்க வேண்டும். இந்த வழக்கு விசாரணை புதன்கிழமை (அக்டோபா் 27) பட்டியலிடப்பட வேண்டும் என்று உத்தரவிட்டனா்.

முன்னதாக, விசாரணையின் போது நீதிபதிகள் அமா்வு கருத்து தெரிவிக்கையில் ’இது ஒரு முக்கியமான மக்களின் வாழ்க்கை சாா்ந்த விவகாரம். இதை இங்கே விவாதிப்பதற்கு பதிலாக அங்கே ஏதாவது செய்தாக வேண்டும். ஒவ்வொருவரும் நோ்மையாக செயல்பட வேண்டும். இது நீண்ட விவாதம் நடத்துவதற்கான அரசியல் களம் அல்ல. மக்கள் வாழ்க்கை சம்பந்தப்பட்டது. இதில் ஒரு தரப்போ அல்லது மற்ற தரப்போ செயல்படாவிட்டால் நீதிமன்றம் தலையிட வேண்டியது வரும்’ என்று தெரிவித்தது.