பெட்ரோல், டீசல் விலையை எப்போ குறைப்பீங்க? ஸ்டாலினுக்கு எடப்பாடி கேள்வி!

திமுக அளித்த தேர்தல் வாக்குறுதியில் இன்னும் மீதமுள்ள பெட்ரோலுக்கு ரூ. 2 மற்றும் டீசலுக்கு ரூ. 4 விலை குறைப்பை திமுக அரசு முழுமையாக நிறைவேற்றுவது எப்பொழுது என்று எடப்பாடி பழனிச்சாமி கேள்வி எழுப்பியுள்ளார்.

திமுக தேர்தல் வாக்குறுதியில் பெட்ரோல் லிட்டருக்கு 5 ரூபாயும், டீசல் லிட்டருக்கு 4 ரூபாயும் குறைக்கப்படும் என குறிப்பிடப்பட்டது.

அதேபோல் முதற்கட்டமாக பெட்ரோலுக்கு மட்டும் லிட்டருக்கு 3 ரூபாய் குறைக்கப்பட்டது. இனி வரும் காலங்களில் அடுத்ததாக குறைக்கப்படும் என தமிழக அரசு சார்பில் தெரிவிக்கப்பட்டது.

தற்போது ஒன்றிய அரசு, பெட்ரோல் லிட்டருக்கு ரூ.5, டீசல் லிட்டர் ரூ.10 குறைத்து நேற்று முன் தினம் உத்தரவிட்டது. ஒன்றிய அரசின் கலால் வரியைக் குறைத்ததன் மூலம் இந்த விலை குறைப்பு செய்யப்பட்டது.

பெட்ரோல் டீசல் விலை தொடர்ந்து உயர்ந்து வந்த நிலையில் மக்கள் மனதில் அதிருப்தி ஏற்பட்டது. இந்த சூழலில் வரவுள்ள ஐந்து மாநில சட்டமன்றத் தேர்தல் பாஜகவுக்கு சாதகமாக இருக்காது என தகவல்கள் கிடைத்தன. அதை தொடர்ந்தே ஒன்றிய அரசு பெட்ரோல், டீசல் விலை குறைப்பை செய்துள்ளதாக கூறுகிறார்கள்.

அதிமுக இணை ஒருங்கிணைப்பாளர் எடப்பாடி பழனிச்சாமி ஒன்றிய அரசின் முடிவுக்கு வரவேற்பு தெரிவித்துள்ளார். அதே சமயம் திமுக அரசை விரைவில் வாக்குறுதியை முழுதாக நிறைவேற்ற வேண்டும் என வலியுறுத்தியுள்ளார்.

இதுதொடர்பாக அவர் வெளியிட்டுள்ள ட்விட்டர் பதிவில், “மக்கள் நலனுக்காக மத்திய அரசு தன் கலால் வரியை பெட்ரோலுக்கு ரூ.5 மற்றும் டீசலுக்கு ரூ.10 விலை குறைப்பு செய்துள்ளதற்கு என் நன்றிகளை தெரிவித்து கொள்கிறேன்.

பெட்ரோல் / டீசல் விலை குறைப்பதாக தேர்தல் வாக்குறுதி அளித்து விட்டு, பெயரளவில் பெட்ரோலுக்கு மட்டும் ரூ 3 விலை குறைப்பு செய்த திமுகவின் விடியா அரசே! தங்களின் தேர்தல் வாக்குறுதியில் இன்னும் மீதமுள்ள பெட்ரோலுக்கு ரூ. 2 மற்றும் டீசலுக்கு ரூ. 4 விலை குறைப்பை முழுமையாக நிறைவேற்றுவது எப்பொழுது?” என்று எடப்பாடி பழனிச்சாமி கேள்வி எழுப்பியுள்ளார்.