தடுப்பூசி போடாதவர்களுக்கு ரேஷன் பொருட்கள், கேஸ் சிலிண்டர், பெட்ரோல் கிடையாது – அரசு அதிரடி அறிவிப்பு!

கொரோனா தடுப்பூசி போடாதவர்களுக்கு ரேஷன் பொருட்கள், கேஸ் சிலிண்டர் மற்றும் பெட்ரோல் வழங்கப்படாது என மாவட்ட நிர்வாகம் அறிவித்துள்ளது பெரும் பரபரப்பை ஏற்படுத்தியுள்ளது.

மகராஷ்டிர மாநிலம் அவுரங்காபாத் மாவட்டத்தில் கொரோனா தடுப்பூசி போட்டுக்கொண்டவர்களின் விகிதம் மிகக் குறைவாகவே உள்ளது. தற்போது அவுரங்காபாத்தில் தடுப்பூசி போட்டவர்களின் விகிதம் 55.12% மட்டுமே.

அண்மையில் சுமார் 40 மாவட்ட கலெக்டர்களுடன் பிரதமர் நரேந்திர மோடி கலந்துரையாடியபோது, தடுப்பூசி போட்டவர்களின் விகிதத்தை உயர்த்தும்படி அவுரங்காபாத் கலெக்டருக்கு அறிவுறுத்தினார்.

இந்நிலையில், ஒரு டோஸ் தடுப்பூசி கூட இன்னும் போடாதவர்களுக்கு ரேஷன் பொருட்கள், கேஸ் சிலிண்டர் மற்றும் பெட்ரோல் வழங்கப்படாது என அவுரங்காபாத் மாவட்ட நிர்வாகம் தெரிவித்துள்ளது.

ரேஷன் கடை நிர்வாகிகள், சிலிண்டர் விநியோகர்கள், பெட்ரோல் நிலைய ஊழியர்கள் அனைவரும் வாடிக்கையாளர்களின் தடுப்பூசி சான்றிதழை பார்த்த பிறகே பொருட்களை வழங்க வேண்டும் என மாவட்ட நிர்வாகம் அறிவுறுத்தியுள்ளது.

இதுபோக ஹோட்டல்கள், ரிசார்டுகள், சுற்றுலா பகுதிகளில் உள்ள கடைகள் உள்ளிட்ட இடங்களில் தடுப்பூசி போட்டிருத்தல் கட்டாயம் என அறிவிக்கப்பட்டுள்ளது. தடுப்பூசி போட்டவர்களின் விகிதத்தை உயர்த்தவே இந்நடவடிக்கைகளை மேற்கொண்டுள்ளதாக அவுரங்காபாத் கலெக்டர் சுனில் சவன் தெரிவித்துள்ளார்.