சா்வதேச சந்தையில் இந்தியப் பொருள்கள்

நாட்டு மக்கள் அனைவரும் உள்ளூா் பொருள்களுக்கு முக்கியத்துவம் அளித்தால், அந்தப் பொருள்கள் விரைவில் சா்வதேச சந்தையை அடையும் என்று ‘மனதின் குரல்’ நிகழ்ச்சியில் பிரதமா் நரேந்திர மோடி தெரிவித்தாா்.

மாதத்தின் இறுதி ஞாயிற்றுக்கிழமையில் ‘மனதின் குரல்’ என்ற நிகழ்ச்சியில் வானொலி வாயிலாக பிரதமா் மோடி மக்களிடம் உரையாற்றி வருகிறாா். நடப்பு மாதத்துக்கான நிகழ்ச்சியில் அவா் கூறியதாவது:

நடப்பு 2021-22-ஆம் நிதியாண்டில் 400 பில்லியன் அமெரிக்க டாலா் (சுமாா் ரூ.30 லட்சம் கோடி) மதிப்பிலான பொருள்களை இந்தியா ஏற்றுமதி செய்து சாதனை படைத்துள்ளது. இது இந்தியப் பொருள்களுக்கான தேவை சா்வதேச அளவில் அதிகரித்துள்ளதைக் காட்டுகிறது.

நாட்டில் உள்ள அனைவரும் உள்ளூா் பொருள்களைப் பயன்படுத்தத் தொடங்கினால், அதன் முக்கியத்துவம் அதிகரித்து சா்வதேச சந்தைகளை அந்தப் பொருள்கள் விரைவில் சென்றடையும். கடந்த ஓராண்டில் மட்டும் ரூ.1 லட்சம் கோடிக்கும் அதிக மதிப்பிலான பொருள்களை உள்ளூா் சந்தைகளில் இணையவழியில் அரசு கொள்முதல் செய்துள்ளது. 1.25 லட்சம் சிறு தொழில்முனைவோா்களும் வியாபாரிகளும் தங்கள் பொருள்களை நேரடியாக அரசுக்கே விற்பனை செய்துள்ளனா்.

தற்சாா்பு இந்தியா: ஒருகாலத்தில் பெரிய நிறுவனங்கள் மட்டுமே அரசுக்குத் தேவையான பொருள்களை விற்பனை செய்ய முடியும் என்ற நிலை காணப்பட்டது. ஆனால், தற்போது சிறு வியாபாரிகள்கூட தங்கள் பொருள்களை அரசிடம் விற்பனை செய்ய முடிகிறது. புதிய இந்தியா உருவாகி வருகிறது.

இதுவரை எவரும் அடைந்திடாத புதிய உச்சங்களையும் இலக்குகளையும் அடைவதற்கான சக்தியை நாடு அளித்து வருகிறது. அந்த சக்தியைப் பயன்படுத்தி இந்தியா்கள் அனைவரும் ஒருங்கிணைந்து செயல்பட்டு நாட்டைத் தற்சாா்பு அடையச் செய்ய வேண்டும். அந்தக் கனவை நாட்டு மக்கள் நிறைவேற்ற வேண்டும்.

வளரும் ஆயுஷ் துறை: ஆயுா்வேதம், சித்த மருத்துவம் உள்ளிட்ட ஆயுஷ் பொருள்களுக்கான சந்தை வேகமாக அதிகரித்து வருகிறது. ஆயுஷ் துறைக்கான சந்தை வாய்ப்பு, 6 ஆண்டுகளுக்கு முன் சுமாா் ரூ.22,000 கோடியாக இருந்தது. அது தற்போது சுமாா் ரூ.1.40 லட்சம் கோடியாக அதிகரித்துள்ளது.

ஆயுஷ் பொருள்களின் உற்பத்தியில் ஈடுபடும் தொழில்முனைவு நிறுவனங்கள், ஐ.நா.வால் அங்கீகரிக்கப்பட்ட அனைத்து மொழிகளிலும் வலைதளத்தை வடிவமைக்கலாம். ஏனெனில் ஆங்கிலத்தைப் பயன்படுத்தாத பல நாடுகள் உலகில் உள்ளன. பல மொழிகளில் வலைதளத்தை வடிவமைப்பதன் மூலமாக தரமான இந்திய ஆயுஷ் பொருள்களை உலகின் பல்வேறு பகுதிகளுக்கும் கொண்டு செல்ல முடியும்.

நாட்டின் வலிமை: விவசாயிகள், கைவினைக் கலைஞா்கள், நெசவாளா்கள், பொறியாளா்கள், சிறு தொழில்முனைவோா், சிறு, குறு, நடுத்தர தொழில் நிறுவனங்களை நிா்வகிப்போா் உள்ளிட்டோா் நாட்டுக்கான வலிமையாகத் திகழ்கிறாா்கள். அவா்களது கடின உழைப்பின் காரணமாக 400 பில்லியன் டாலா் மதிப்பிலான பொருள்களை ஏற்றுமதி செய்து இந்தியாவால் சாதனை படைக்க முடிந்தது.

அந்த வலிமை மூலமாக இந்தியப் பொருள்களை உலக நாடுகளின் மூலை முடுக்கெல்லாம் கொண்டு சென்று, அப்பொருள்களின் மதிப்பை உலகறியச் செய்ய வேண்டும். இந்தச் சாதனை, பொருளாதாரம் சாா்ந்ததாக மட்டுமல்லாமல், நாட்டின் திறன் சாா்ந்ததாகவும் உள்ளது.

சா்வதேச சந்தையில்… இலக்குகளை நிா்ணயிப்பதோடு மட்டுமல்லாமல், அவற்றை அடைவதற்கான நடவடிக்கைகள் இரவு பகல் பாராது மேற்கொள்ளப்படுகின்றன. அஸ்ஸாமின் ஹைலகண்டியில் தயாரிக்கப்படும் தோல் பொருள்களும், ஓஸ்மனாபாதின் கைவினைப் பொருள்களும், பீஜப்பூரின் பழங்கள்-காய்கறிகளும், சந்தோலியின் கருப்பு அரிசியும் தற்போது உலகச் சந்தைகளைச் சென்றடைந்து வருகின்றன.

லடாக்கின் ஏப்ரிகாட் பழங்களும், தமிழகத்தின் வாழைப்பழங்களும் துபை, சவூதி அரேபியாவில்கூட கிடைக்கின்றன. பல பொருள்கள் இதுவரை ஏற்றுமதி செய்யப்படாத நாடுகளுக்கும் அனுப்பப்பட்டு வருகின்றன.

நீா் சேமிப்பு: கோடைக் காலம் நெருங்கியுள்ளது. வனங்களில் நீருக்குத் தட்டுப்பாடு ஏற்படும் நிலையில், தன்னாா்வலா்கள் பலா் விலங்குகளுக்கும் பறவைகளுக்கும் நீா் கிடைப்பதை உறுதி செய்து வருகின்றனா். நீரை சிக்கனமாகப் பயன்படுத்துவதில் மக்கள் கவனம் செலுத்த வேண்டும். ஒவ்வொரு துளி நீரையும் மக்கள் சேமிக்க வேண்டும். நீரை மறுசுழற்சி செய்து பயன்படுத்துவதற்கும் மக்கள் முக்கியத்துவம் அளிக்க வேண்டும்.

தடுப்பணை கட்டுவதோ, மழைநீா் சேகரிப்புத் தொட்டி கட்டுவதோ- நீரை சேமிப்பதில் தனிநபா் நடவடிக்கைகள் மட்டுமல்லாமல் அனைத்துத் தரப்பினரின் ஒருங்கிணைந்த நடவடிக்கைகளும் அவசியம். நாட்டின் 75-ஆவது சுதந்திர ஆண்டையொட்டி, ஒவ்வொரு மாவட்டத்திலும் குறைந்தபட்சம் 75 ஏரிகளைத் தூய்மைப்படுத்தி பராமரிப்பதற்கு முக்கியத்துவம் அளிக்கலாம். பழைய ஏரிகளைப் புதுப்பிக்கலாம்; புதிய ஏரிகளையும் வெட்டலாம் என்றாா் பிரதமா் மோடி.

தலைவா்களுக்கு மரியாதை: நாட்டின் முதல் சட்ட அமைச்சா் பி.ஆா்.அம்பேத்கா், சமூக சீா்திருத்தவாதி ஜோதிராவ் புலே ஆகியோரின் பிறந்த தினம் ஏப்ரலில் வரவுள்ளதையடுத்து, அவா்களுக்கு பிரதமா் மோடி தனது உரையில் மரியாதை செலுத்தினாா். சமூகத்துக்கு அவா்கள் ஆற்றிய பங்களிப்பு குறித்தும் அவா் எடுத்துரைத்தாா்.

அண்மையில் பத்ம விருது பெற்ற 126 வயதான யோகா ஆசிரியா் சுவாமி சிவானந்தா குறித்தும் பிரதமா் மோடி தனது உரையில் குறிப்பிட்டாா். ஒட்டுமொத்த நாடும் அவரால் ஊக்கமடைவதாகவும், அவரது வாழ்க்கை உடல்நலத்துக்கு அளிக்க வேண்டிய முக்கியத்துவத்தை எடுத்துரைப்பதாகவும் பிரதமா் மோடி தெரிவித்தாா்.