පෞද්ගලික රෝහල් වල PCR. පරීක්ෂණය RS. 15,000ක් ! ‘ පෞද්ගලික සෞඛ්‍ය අංශයේ’ ජාවාරමක් !
කොවිඩ් දෙවන රැල්ල ආරම්භවීමෙන් පසු පී.සී.ආර්. පරීක්ෂණ පෞද්ගලික රෝහල්වලට වැඩි වශයෙන් යොමු කිරීමේ ජාවාරමක් සෞඛ්‍ය අමාත්‍යාංශයේ ඇතැම් නිලධාරීන්ගේ මැදිහත්වීමෙන් සිදුවන බව පුවත්පතක් වාර්තා කර තිබෙනවා.
පෞද්ගලික රෝහල් හතරක පී.සී.ආර්. පරීක්ෂණ මේ වන විට සිදු කරනු ලබන්නේ සෞඛ්‍ය අමාත්‍යාංශයේ ඇතැම් නිලධාරීන් අවිධිමත්ව ලබාදුන් අවසරයක් යටතේ බව අමාත්‍යාංශ ආරංචි මාර්ග අනාවරණය කරන බවයි එහි සඳහන් වන්නේ.
එම රෝහල්වල පී.සී.ආර්. නිදර්ශක දාහක් පමණ දෛනිකව සිදු කරන අතර ඇතැම් පෞද්ගලික රෝහල් පෞද්ගලික ආයතනවලින් ලබා ගෙන ඇති පී.සී.ආර්. සාම්පල පරීක්ෂාවට ලක් නොකර රෝහල්වල ගබඩා කර ඇති බවද අනාවරණය වනවා.
පෞද්ගලික රෝහල් රැසක් පසුගිය දිනවල සිදු කරන ලද පී.සී.ආර්. පරීක්ෂණ පළමුව ධනාත්මක වී පසුව සෘණාත්මක වීම පිළිබඳවද රජයේ විශේෂ අවධානය යොමු වී තිබුණා. තවද පෞද්ගලික රෝහල්වලින් පී.සී.ආර්. පරීක්ෂණ සිදුකරගත් ඇතැම් රෝගීන් කෙටි කාලයකින් සුව අතටද පත්වීම පුදුමසහගත බව අනාවරණය වනවා.
කොවිඩ් පළමු රැල්ල ආරම්භ වූ අවස්ථාවේදී ද පෞද්ගලික අංශය පී.සී.ආර්. පරීක්ෂණ සිදුකිරීම සඳහා අවසර ඉල්ලා සිටියත් එය ප්‍රතික්ෂේප කෙරුණා.
දෙවන රැල්ල ආරම්භයේදී ඊට අවසර ලබා දීමට සෞඛ්‍ය අමාත්‍යාංශය ක්‍රියාකිරීම පිළිබඳව පරීක්ෂණයක් පවත්වන මෙන් වෛද්‍ය රසායනාගාර විද්‍යාඥ වෘත්තියවේදීන්ගේ විද්වත් සංගමයේ සභාපති රවි කුමුදේශ් ප්‍රකාශ කරනවා.
එසේම ඇතැම් පෞද්ගලික රෝහල්වල පී.සී.ආර්. පරීක්ෂණ සිදු කරන ආකාරය සහ රසායනාගාර පහසුකම් පිළිබඳව විධිමත් විමර්ශනයක් පවත්වන ලෙස වෛද්‍ය රසායනාගාර විද්‍යාඥ වෘත්තියවේදීන්ගේ විද්වත් සංගමය ජනාධිපතිවරයාගෙන් සහ සෞඛ්‍ය ලේකම්වරයාගෙන් ඉල්ලා සිටිනවා.
‘‘පෞද්ගලික රෝහල් විසින් කර්මාන්ත ශාලා සහ පෞද්ගලික ආයතනවලින් ලබාගත් සාම්පල මේ වන විට ගොඩ ගැසී තිබෙනවා. වෛද්‍ය සභාවේ පුහුණුව නොලත් පිරිසක් මේ පිළිබඳව පරීක්ෂණ පවත්වනවා. පරීක්ෂණ වාර්තාවක් දිනකින් ලබා දෙන්නේ නම් රුපියල් 15,000ක් ඔවුන් අය කරනවා. දින 3කින් ලබාදීම සඳහා අය කරන්නේ රුපියල් 7000යි. මිල නියාමනය කළ යුතුයි. සෞඛ්‍ය අමාත්‍යාංශයේ ඇතැම් නිලධාරීන් පෙන්වා දෙනවා මේ පෞද්ගලික අංශ නැතිව පී.සී.ආර්. පරීක්ෂණ කරන්න බෑ කියලා. ඒක මිත්‍යාවක්.’’ යැයි රවි කුමුදේශ මහතා පැවසීය.
ඒ අනුව පෞද්ගලික රෝහල් නියාමන පනත යටතේ සෞඛ්‍ය ලේකම්වරයාට මෙම විමර්ශනය සිදු කළ හැකි බව ඔහු වැඩිදුරටත් පෙන්වා දෙනවා.
කෙසේ වෙතත් දැනට පී.සී.ආර්. පරීක්ෂණ කළ හැකි මධ්‍යස්ථාන 24ක් ඇති අතර ඉන් දිනකට පරීක්ෂණ 6000ක් පමණ සිදු කළ හැකියි.එය 10,000 දක්වා ඉහළ දැමිය හැකි සඳහන්. පෞද්ගලික අංශයෙන් සිදු කළ පරීක්ෂණවලින් කොවිඩ් 19 ලෙසට ධනාත්මක වූ රෝගීන්ගේ සාම්පල රජයේ වෛද්‍ය පරීක්ෂණාගාරයට එවා ඇති අතර එසේ එවූ 100කින් 20ක් පමණ යළි සෘණාත්මක බවට සඳහන් වී ඇති බව රවි කුමුදේශ් මහතා සඳහන් කළා.