පළමු 20 – 20 තරගයේ ජය ඉන්දියාවට

ශ්‍රී ලංකා කණ්ඩායම සමඟ පැවැති පළමු විස්සයි විස්ස ක්‍රිකට් තරගය ලකුණු 38 කින් ජයගැනීමට ඉන්දිය කණ්ඩායම සමත් වුණා.

තරගයේ කාසියේ වාසිය දිනු ශ්‍රී ලංකා කණ්ඩායමේ ආරාධනාවෙන් ප්‍රථමයෙන් පන්දුවට පහර දුන් ඉන්දිය කණ්ඩායම නියමිත පන්දුවාර 20 තුළ කඩුලු 05ක් දැවි ලබා ගත් ලකුණු සංඛ්‍යාව 164ක්.

එහිදී ඉන්දිය කණ්ඩායම වෙනුවෙන් සූර්යකුමාර් 50ක් රැස්කරගැනීමටයි සමත් වුණේ.

එමෙන්ම නායක ශිකර් ධාවාන් ලකුණු 46 ක් ද, සංජු සැම්සන් ලකුණු 27 ක් ලබාගත්තා.

පන්දු යැවීමේදී ශ්‍රී ලංකා පිළ වෙනුවෙන් දුෂ්මන්ත චමීර සහ වනිඳු හසරංග කඩුලු දෙක බැගින් බිඳහෙළුවා.

ලකුණු 165ක ජයග්‍රාහී ඉලක්කයක් හඹා යාමට පිටියට පිවිසි ශ්‍රී ලංකා කණ්ඩායම පන්දුවාර 18 යි පන්දු තුනක් තුළ  සියලු දෙනා දැවි ලබාගැනීමට හැකි වූයේ ලකුණු 126ක් පමණයි.

එහිදී සටන්කාමී ඉනිමක් දියත් කළ චරිත් අසලංක පන්දු 26කට මුහුණදෙමින් ලකුණු 44ක් රැස්කරගත්තා.

ඊට හතරේ පහරවල් තුනක් සහ හයේ පහරවල් තුනක් ඇතුළත් වීම විශේෂත්වයක්.

පන්දු යැවීමේදී බුවනේෂ්වර් කුමාර් ලකුණු 22ක් ලබාදී බිඳ දැමු කඩුලු සංඛ්‍යාව 04ක්.

තරගය පැවැත්වුණේ, කොළඹ, ආර්. ප්‍රේමදාස ක්‍රිකට් ක්‍රීඩාංගණයේදීයි.

දෙරට අතර පැවැත්වෙන දෙවන විස්සයි විස්ස ක්‍රිකට් තරගය ලබන 27 වනදා පැවැත්වීමට නියමිතයි.