ආර්ථික අර්බුදයට යහපාලනෙන් ගහපු බද්ද , බන්දුල ආයෙත් යෝජනා කරයි

මාසිකව රු. 100,000කට වැඩි ආදායමක් උපයන සියලු දෙනාගෙන් සියයට 5ක් බද්දක් අය කළ යුතු බව ඇමැති බන්දුල ගුණවර්ධන පවසයි
‘‘සමාජ සංරක්ෂණ දායක මුදල‘‘ යනුවෙන් මීට නමක් දෙන වෙළෙඳ ඇමැතිවරයා පවසන්නේ කොරෝනා ව්‍යසනය හමුවේ අධ්‍යාපන හා සෞඛ්‍ය වැනි පොදු පහසුකම් සැපයීම සඳහා මෙම බදු මුදල් යොදවා ගත යුතු බවය.

ආදායම් මට්ටම්වල වෙනස් නැතුව සාමාන්‍යයෙන් ලක්ෂයකට වඩා වැඩි මාසික ආදායමක් තිබෙන සියලු දෙනාට මෙම බදු පැනවිය යුතු බව රූපවාහිනී වැඩසටහනකට එක්වෙමින් හෙතෙම වැඩි දුරටත් පෙන්වා දෙනු ලැබීය.

පසුගිය මහින්ද රාජපක්ෂ යුගයේදී පැවැති උපයන විට බදු ගෙවීමේ ක්‍රම වේදයට (PAYE -pay as you earn) අසුවන පුද්ගලයනට සහනයක් ගෙන එමින් මාසිකව රුපියල් ලක්ෂයකට වඩා ආදායම් උපයන පුද්ගලයන්ගෙන් සියයට 4 සිට ක්‍රමිකව වැඩිවන ලෙස පසුගිය යහපාලන යුගයේදී පනවන ලද බදු සහනයට තවත් සහනයක් ලබා දෙමින් වත්මන් ආණ්ඩුව විසින් එම ලක්ෂයේ සීමාව රු දෙලක්ෂ පනස්දාහ වන තෙක් වැඩි කරනු ලැබීය.
2017 දී හිටපු මුදල් ඇමැති මංගල සමරවීර ගෙන ආ නව බදු පනත අනුව සෑම පුරවැසියකුම උපයන පළමු රුපියල් ලක්ෂය දක්වා මුදල බදුවලින් නිදහස් කෙරිනි. ඉන් පසු උපයන පළමු රුපියල් පනස් දහස දක්වා මුදලට වසරකට 4%ක බද්දක්ද ඉන් පසු උපයන පළමු රුපියල් පනස් දහස දක්වා මුදලට වසරකට 8%ක බද්දක් ද අය කෙරුණු අතර ඉන් පසු උපයන පළමු රුපියල් පනස් දහස දක්වා මුදලට වසරකට 12%ක්ද ඉන් පසු උපයන පළමු රුපියල් පනස් දහස දක්වා මුදලට වසරකට 16%ක්ද ඉන් පසු උපයන පළමු රුපියල් පනස් දහස දක්වා මුදලට වසරකට 20%ක්ද ඊට වැඩිවන සෑම මුදලකට 24%ක්ද වශයෙන් වෙනස් කෙරිණි.

ඒ කෙසේ නමුත් දැන් වෙළෙඳ ඇමැතිවරයා යළි යෝජනා කරන්නේ තම රජය විසින් අත්හිටුවන ලද යහපාලන යුගයේ උපයන විට බදු ක්‍රමයට ආසන්න අදහසකි. වත්මන් රජය විසින් සිදුකරන ලද බදු සංශෝධනය නිසා වාර්ශික රාජ්‍ය ආදායම රු බිලියන 600 කින් පමණ අහිමි වී ඇත. වත්මනෙහි රජය මුහුණ දෙමින් සිටින ආර්ථික අර්බුදයට මේ තත්වය සෘජුවම බලපා ඇති බව ආර්ථික විශේෂඥයන් පෙනවා දෙනු ලැබ තිබේ.