ඩයනා බ්‍රිතාන්‍ය පුරවැසියෙක්? CID පරීක්ෂණය නැවතිලා!
සමගි ජනබලවේගයේ පාර්ලිමේන්තු මන්ත්‍රී ඩයනා ගමගේ මහත්මිය බ්‍රිතාන්‍ය විදේශ ගමන් බලපත්‍ර හිමිකාරියක් වීම සම්බන්ධයෙන් 2020 නොවැම්බර් 1 වන දින අපරාධ පරීක්ෂණ දෙපාර්තමේන්තුවට (CID) කළ පැමිණිල්ලක් සම්බන්ධයෙන් විමර්ශන කඩිනම් කිරීම සඳහා සිවිල් සමාජ ක්‍රියාකාරිකයෙකු වන ඕෂල හේරත්, අගවිනිසුරු ජයන්ත ජයසූරිය මහතාගේ මැදිහත්වීම ලිඛිතව ඉල්ලා ඇත.
2015 දී පනවන ලද 19 වන ආණ්ඩුක්‍රම ව්‍යවස්ථා සංශෝධනයට අනුව විදේශ ගමන් බලපත්‍ර හිමියන්ට පාර්ලිමේන්තුවට පැමිණීමට සුදුසුකම් නොමැත.
තමාගේ පැමිණිල්ල විභාග කරන ලෙස පාර්ලිමේන්තුව ඇතුළු වගකිවයුත්තන්ට දැනුම් දී තිබුණද එය ඉටුවන බවක් පෙනෙන්නට නොමැති වීම පසු දෙසැම්බර් 09 වැනි දින අගවිනිසුරුවරයාට ලිඛිතව දැනුම් දුන් බව හේරත් පැවසීය.
2020 දෙසැම්බර් 26 වැනි දින අපරාධ පරීක්ෂණ දෙපාර්තමේන්තුව තම ප්‍රකාශය සටහන් කර ගත්තේ මහජන ආරක්ෂක අමාත්‍ය රියර් අද්මිරාල් සරත් වීරසේකර මහතා සම්බන්ධ කර ගැනීමෙන් පසුව බව හේරත් මහතා පැවසීය.
ඩයනා ගමගේ බ්‍රිතාන්‍ය ජාතිකයෙකු වීම සම්බන්ධයෙන් තමන් කළ පැමිණිල්ල නිවැරදි බව රහස් පොලිස් නිලධාරීන් උපුටා දක්වමින් හේරත් අගවිනිසුරු ජයසූරිය වෙත යැවූ ලිපියේ සඳහන් කර ඇත.
ඒ බව 2021 ජනවාරි 19 වැනි දින තමාට දන්වා සිටි බව රහස් පොලිසිය උපුටා දක්වමින් හේරත් වැඩිදුරටත් සඳහන් කළේ විමර්ශන අවසන් වීමෙන් අනතුරුව අදාළ වාර්තාව අපරාධ පරීක්ෂණ දෙපාර්තමේන්තුවේ අධ්‍යක්ෂවරයා වෙත ඉදිරිපත් කර ඇති බවයි.