අදානිට එරෙහිව ජවිපෙ පාරට බහින්න තීන්දු කරයි!
ඩොලර් බිලියන 1කට වැඩි ආයෝජනයකින් ගිගාවොට් එකක සුළං බල ව්‍යාපෘතියක් සංවර්ධනය කිරීම සඳහා තලෙයිමන්නාරමේ ඉඩම ඉන්දීය සමූහ ව්‍යාපාරයක් වන අදානි සමූහ ව්‍යාපාරයට ලබාදීමට රජය ගත් පියවර පරාජය කිරීම සඳහා ජනතාව, පූජ්‍ය පක්ෂය, වෘත්තීය සමිති සහ සිවිල් සංවිධාන ඒකරාශී කර ගැනීමට ජනතා විමුක්ති පෙරමුණ තීරණය කර තිබේ.
ආණ්ඩු පක්‍ෂයේ දේශපාලනඥයින් කොමිස් ඉල්ලමින් ජාතික වත්කම් විදේශිකයන්ට ලබාදීමට රජය ගෙන යන වැඩපිළිවෙළට එරෙහිව නැගී සිටීමට සැලසුම් කර ඇතැයි ජනතා විමුක්ති පෙරමුණේ කළුතර දිස්ත්‍රික් හිටපු පාර්ලිමේන්තු මන්ත්‍රී වෛද්‍ය නලින්ද ජයතිස්ස මහතා පැවසීය.
“ජාත්‍යන්තර ශ්‍රේණිගත කිරීමේ ආයතන විසින් රට පහත හෙලීම නිසා රජයට ණය ලබා ගැනීමට නොහැකිව දැඩි අසීරුතාවයකට පත්ව ඇති බව අපි දන්නවා. එයට ණය ලබාගත හැක්කේ චීනයෙන් සහ ඉන්දියාවෙන් පමණයි. රටේ විදේශ සංචිත ගොඩකර ගැනීමේ තවත් මාර්ගයක් වන්නේ බාහිර ආයෝජන ගෙන ඒමයි. නමුත් මේ ආයෝජකයෝ ලංකාවට එන්නේ ලංකාවට තියෙන ආදරයට නෙවෙයි.
“මේ රටේ භූ දේශපාලනික වැදගත්කමක් ඇති ස්ථානවල තම පැවැත්ම තහවුරු කර ගැනීමේ දිගුකාලීන සැලැස්මක් ඔවුන්ට තිබෙනවා. අදානි සමූහ ව්‍යාපාරයට තලෙයිමන්නාරමේ ඉඩමක් ලබාදීම අලුත්ම පියවරයි. මේ ඩීල්වලින් සමහර දේශපාලනඥයන්ට කොමිස් ලැබෙනවා. අපි මෙය නතර කළ යුතුයි.”