දෙන්නෙක් එලවා දැමීමට සියලු ස්වාධීන කොමිසන් වසන බවට චෝදනා
දහ නම වැනි ආණ්ඩුක්‍රම ව්‍යවස්ථා සංශෝධනය හරහා ස්ථාපිත කළ ස්වාධීන කොමිෂන් සභාවල සිංහල නොවන නියෝජිතයන් දෙදෙනකු පලවා හැරීමේ අරමුණින් ස්වාධීන කොමිෂන් සභා සියල්ල හකුලා දැමීමට වෙර දරන බවට ආණ්ඩුවට චෝදනා එල්ල වී තිබේ.
සාමාජිකයන් 47 දෙනකුගෙන් යුත් ස්වාධීන කොමිෂන් සභා දහය අතුරින් පුද්ගලයන් දෙදෙනකු පමණක් ඉලක්ක කරගනිමින් ආණ්ඩුව චෝදනා නගන බවයි ජාතික වෘත්තීය සමිති පෙරමුණ පවසන්නේ.
අගෝස්තු 27 බ්‍රහස්පතින්දා කොළඹදී පැවැති මාධ්‍ය හමුවකදී එම පෙරමුණේ සම කැදවුම්කරු ජෝසප් ස්ටාලින් සදහන් කළේ 19 වැනි ව්‍යවස්ථා සංශෝධනය හරහා ස්වාධීන කොමිෂන් සභා පිහිටුවීම තුළ රාජ්‍ය සේවකයන්ට ස්වාධීනව වැඩ කිරීමේ අවස්ථාව හිමි වු බවයි.
කොමසාරිස් වරුන් දෙදෙනකුගේ ස්වාධීනත්වය සම්බන්ධයෙන් අමාත්‍ය මහාචාර්ය ජී.ඇල් පීරිස් නිරන්තරයෙන් ප්‍රශ්න කරන බව පෙන්වා දෙන වෘත්තිය සමිති නායකයා ආණ්ඩුවට අවධාරණය කළේ ඔවුන් සම්බන්ධයෙන් ප්‍රශ්න පවතී නම් ඔවුන් ඉවත් කිරීමේ බලයක් ආණ්ඩුව සතු බවයි.
“ආණ්ඩුව, මොකක්ද මේ පුද්ගලයෝ කියලා දෙන්නෙක් ගැන තමයි හැමදාම කතා කරන්නේ. කවුද මේ දෙන්නා? අපි දැක්කා ජී.ඇල් පිරිස් ඇමතිවරයා කියනවා ජාවිඩ් යුසෆ් ආණ්ඩුක්‍රම ව්‍යවස්ථා දායක සභාවේ. මෙයා සිවිල්ද කියලා අහනවා. අපිට නම් සිවිල් ඔවුන්ට සිවිල් නැත්නම් දැන් බලය තියනවා අයින් කරන්න පුළුවන්. ඊලගට කියන්නේ කවුද මහාචාර්ය රත්නජීවන් හූල්. හුල් හුල් කිය කිය බනිනවා.”
ස්වාධීන කොමිසන් සභා නියෝජිතයන් ස්වාධීන පුද්ගලයන් බැවින් ඔවුනට අවශ්‍ය ආකාරයෙන් ක්‍රියා කිරීමේ හැකියාව පවතින බව පෙන්වා දෙන වෘත්තිය සමිති නායක ජෝසප් ස්ටාලින් එහිදී වැඩි දුරටත් ආන්ඩුවෙන් ප්‍රශ්න කළේ නියෝජිතයන් දෙදෙනකු නිසා කොමිෂන් සභා සියල්ල අහෝසි කළ යුතුද යන්නයි.
ප්‍රජාතන්ත්‍රවාදී පත් කිරීම්
ජනාධිපති, අගමැති, කතානායක හා විපක්ෂ නායකගේ මැදිහත්වීමෙන් පත් කර ගනු ලබන ආණ්ඩුක්‍රම ව්‍යවස්ථාදායක සභාවේ සාමාජිකයන් විසින් ස්වාධීන කොමිෂන් සභා දහය සදහා නියෝජිතයන් පත් කරන බව ගුරු සමිති නායකයා වැඩිදුරටත් පෙන්වා දුන්නේය.
ඒ ආකාරයෙන් ප්‍රජාතන්ත්‍රවාදී ව්‍යුහයක් තුළ ස්වාධීන කොමිෂන් සභා දහය නියෝජනය වන්නේනම් පවතින ප්‍රශ්නය කුමක්දැයි ගුරු සංගම් නායක ජෝසප් ස්ටාලින් වැඩි දුරටත් ආන්ඩුවෙන් ප්‍රශ්න කළේය.
එම මාධ්‍ය හමුව සදහා එක්ව සිටි ජාතික වෘත්තිය සමිති පෙරමුණේ සම කැදවුම්කරු රවී කුමුදේශ් සදහන් කළේ රටක ආණ්ඩුක්‍රම ව්‍යවස්ථාව වෙනස් විය යුතුය, සංශෝධනය විය යුතුය යන ස්ථාවරයේ තමන් සිටින බවයි.
නමුත් සංශෝධනය යන වාක්‍ය වෙනුවට ඉවත් කිරීම හෝ අහෝසි කිරීම වැනි වාක්‍ය නිරන්තරයෙන් ඇසීමට ඇති අතර එම යෙදුම සම්මතයෙන් ඔබ්බට ගිය එකක් බව ඔහු වැඩි දුරටත් සදහන් කළේය.
“ඕනැම එකක් පරිනාමය වෙන්නේ ඉදිරියට. ආපස්සට නෙමෙයි. එතකොට අපිට යමක් වැඩිපුර මේ රටේ මිනිස්සුන්ට දෙන්න ඕනනම්, වැඩිපුර මේ රටේ මිනිසුන්ගේ අයිතිවාසිකම් රකින්න ඕන නම් කිසියම් සංවර්ධනාත්මක සිතුවිල්ලකින් අලුත් ආණ්ඩුවක් කටයුතු කරනවානම් කළ යුත්තේ තියන එකෙන් ඉදිරියට පරිවර්තනය කිරීම මිස තිබ්ච්ච ඒවා නැති කිරීම නෙමෙයි.”