රනිල් හොඳයි කියපු වෙල්ගම, දැන් රනිල්ගේ නරක දකින්න පටන් අරන්!
රටේ මිනිස්සුන්ට පටි තදකරගන්න කියමින් වත්මන් ජනාධිපති රනිල් වික්‍රමසිංහ යන්නේත් මහින්ද රාජපක්ෂ ගිය පාරේ බව පාර්ලිමේන්තු මන්ත්‍රී කුමාර වෙල්ගම පවසයි.
ස්වාධීන මන්ත්‍රීවරුන් විසින් පැවැත්වූ විශේෂ මාධ්‍ය සාකච්ඡාවක් අමතමින් මන්ත්‍රිවරයා කීවේ මේ තරම් දුෂ්කර අවස්ථාවක ජනතාවගේ මුදල් වියදම් කරමින් දස දෙනකුට ආසන්න පිරිවරක් සමග එංගලන්තයේ මහ රැජනගේ අවමගුලට ගිය ජනාධිපතිවරයා, ඔහුට දේශපාලන අත්පොත් තැබූ ජේ.ආර්. ජයවර්ධනට වඩා මහින්ද රාජපක්ෂව සිහිගන්වන බවය.
මන්ත්‍රීවරයා මෙසේ ද පැවසුවේය.
”මහ බැංකු අධිපතිවරයා පවසනවා සහනාධාර දෙන්න බෑ කියලා. අපි ඉන්නෙ ඒ තරම් දුෂ්කර අවස්ථාවක කියලා. ඒක ඇත්ත. අපි ඉන්නෙ එහෙම තැනක තමයි. නමුත් සහනාධාර දුන්නෙ නැති වුණාට ජනාධිපතිතුමා රාජ්‍ය ඇමතිවරු 38ක් පත් කරල තියනවා. මේ 38 දෙනාට වරප්‍රසාද ලැබෙන්නෙ නෑ කිව්වට ඒ අයට වරප්‍රසාද ලැබෙන බවත් මම දන්නවා.”
”ජනාධිපතිතුමාත් එලිසfබත් මහ රැජනිගේ අවමංගල්‍යයට සහභාගී වෙන්න එංගලන්තෙට ගියා. සමාජ මාධ්‍යයෙ දකිනවා දහයකට වැඩි ප්‍රමාණයක් එතුමා සමග ගියා කියලා. එහෙනම් මේක වැරදියි. ඒ කාලෙ රාජපක්ෂ මහත්තුරු එතුමාගෙ බිරිය ෆස්ට් ලේඩි කියලා කිව්වෙ. පිටරට යනකොට ප්ලේන් පිටින් චාටර් කරන් ගියා. විශාල මුදලක් වැය කළා. ගිහින් නැවතුනේ අති සුඛෝපභෝගී කාමරවල. ඒකට මහජනතාව විරුද්ධ වුණු නිසා තමයි මේ රටේ මේ පෙරළිය ඇතිවුණේ.”
”මේ ජනාධිපතිතුමාටත් මා කියන්නෙ ඔබතුමා මේ වගේ තත්ත්වයකට වැටෙන්න එපා. ඔබතුමාට දේශපාලන අත්පොත් තිබ්බෙ ජේ.ආර්. ජයවර්ධන මහත්තයා. මේ රටේ හිටපු විශිෂ්ට නායකයෙක්. ඔබතුමා හරියට ඒක පාවිච්චි කරන්න. ඔබතුමා පිටරට යනකොටත් සෙනගක් අරන් ගිහින් අනෙක් අයට පටි තදකරගන්න කියන එක වැරදි ක්‍රියාවක්.”