ශ්‍රී ලාංකිකයන් 14 දෙනෙකුට සිර දඬුවම් නියම කල උතුරු ප්‍රංශ අධිකරණය
උතුරු ප්‍රංශයේ අධිකරණයක් විසින් ශ්‍රී ලාංකිකයින් 14 දෙනෙකුට සිර දඬුවමක් නියම කර තිබෙනවා.
යුරෝපය ඇතුළු රටවල් ගණනාවක මිනිස් ජාවාරම් වළල්ලක් ක්‍රියාත්මක කිරීම සම්බන්ධයෙන් චෝදනා ලබා සිටි පිරිසකට මෙලෙස දඬුවම නියම කර ඇති බවයි ආර්.එෆ්.අයි. ප්‍රවෘත්ති ඒජන්සිය උපුටා දක්වමින් පළ කර තිබූ වාර්තාවේ වැඩිදුරටත් දැක්වුණේ.
යුරෝපය ඇතුළු රටවල් ගණනාවක ක්‍රියාත්මක වන මිනිස් ජාවාරම සම්බන්ධයෙන් යුරෝපයේ ආරක්‍ෂක අංශ දැඩි අවධානයෙන් කටයුතු කිරීම හේතුවෙන් පසුගියදා මිනිස් ජාවාරමක තොරතුරු හෙළි ගැනීමට උතුරු ප්‍රංශයේ ආරක්‍ෂක අංශ සමත් වුණා.
ඒ අනුව පැරීසියේ සිට කිලෝ මීටර් 80 ක් උතුරින් පිහිටි සෙරිෆොන්ටේන් ගම්මානයේ වෙළඳසැළක් පවත්වාගෙන ගිය පුද්ගලයෙකු ආරක්‍ෂක අංශ භාරයට ගෙන ඇත.
එහිදී පුද්ගලයින් 14 දෙනෙකු අත්අඩංගුවට ගෙන ඇති අතර ඔවුන් ශ්‍රී ලාංකිකයින් බවයි ආර්.එෆ්.අයි. ප්‍රවෘත්ති ඒජන්සිය නිකුත් කළ වාර්තාවේ දැක්වුණේ.
ඔවුන් උතුරු ප්‍රංශයේ අධිකරණයකට ඉදිරිපත් කර ඇති අතර එහිදී සිර දඬුවම් නියම කර තිබෙනවා.
චෝදනා ලැබූ ප්‍රධාන සැකකරුට වසර 4 ක සිර දඬුවමක් හා වසරක අත්හිටවු සිර දඬුවමක්ද නියම කර ඇති බව ද එම පුවත් වාර්තා සඳහන් කළා.
එමෙන්ම නැගෙනහිර යුරෝපයේ දේශ සීමා බලධාරීන්ට අල්ලස් දීමෙන් යුක්ක්‍රේනයේ සිට යුරෝපය වෙත ශ්‍රී ලාංකික සහ බංග්ලාදේශ සංක්‍රමනිකයින් ගෙන යාම සඳහා මිල නියම කර ඇත්තේද මොහු විසින් බවයි සිදු කළ මූලික විමර්ශනවලදී අනාවරණය වී ඇත්තේ.
පසුගිය වසර කිහිපය තුළ යුරෝපය ගමන් කරන සංක්‍රමනිකයින්ගේ කැපී පෙනෙන වැඩිවීමක් දක්නට ලැබෙන අතර ඒ හා සම්බන්ධ ජාවාරම්ද විශාල වශයෙන් වර්ධනය වී තිබෙනවා.
මෙලෙස පැමිණෙන අනවසර සංක්‍රමනිකයින් බොහෝ දෙනෙක් බ්‍රිතාන්‍යට පැමිණීමට උත්සාහ කරන අතර එරට සංඛ්‍යා ලේඛන අනුව සංක්‍රමනිකයින් 45,000 කට වැඩි පිරිසක් 2022 දී යුරෝපයේ සිට බ්‍රිතාන්‍යට පැමිණ ඇති අතර එය පෙර වසරේ වාර්තා වූ 17,000 ක අගයට වඩා 60% ක ඉහළ යාමක් ලෙස නිරීක්‍ෂණය වන බවයි ආර්.එෆ්.අයි. ප්‍රවෘත්ති ඒජන්සිය නිකුත් කළ නිවේදනයේ වැඩිදුරටත් සඳහන් වුණේ.