පාතාලයේ බූරු මූණා කටුනායක පොලිසියෙන් පැන්නීමට පැමිණි ශ්‍රමණයින් දෙදෙනා සොයයි!
කටුනායක ගුවන් තොටුපළින් විදේශගත වීමට උත්සාහ දරද්දී අත්අඩංගුවට ගැනුණු දරුණු අපරාධකරුවකු වන බූරු මූණා නැමති පාතාල සාමාජිකයා පොලිස් අත්අඩංගුවෙන් මිදී යාමට අවශ්‍ය පහසුකම් සැලසූ බව කියන භික්ෂූන් දෙනමක් පිළිබඳව කරුණු අනාවරණය වී ඇතැයි පොලිසිය කියයි.
රජරට ප්‍රදේශයේ වෙසෙන මෙම භික්ෂූන් අත්අඩංගුවට ගැනීම සඳහා මේ වනවිට පුළුල් විමර්ශනයක් දියත් වෙමින් පවතින බව ද පොලිස් ආරංචි මාර්ග පවසයි.
විදේශයක සිටි ක්‍රියාත්මකවන ප්‍රබල මත්ද්‍රව්‍ය ජාවාරම්කරුවෙක්වන හරක් කටා ගේ ප්‍රධානතම වෙඩික්කරුවා ලෙසින් සැලකෙන මෙම සැකකරුවා පැන යාම පසුපස විශාල මුදල් හුවමාරුවක් සිදුවී ද යන්න පිළිබඳව පොලිසියට දැඩි සැකයක් මතුව ඇති අතර මේ පිලිබඳව ද විමර්ශනය කෙරෙන බව මෙම පොලිස් ආරංචි මාර්ග තවදුරටත් අනාවරණය කරයි.
පසුගිය දෙසැම්බර් මාසයේ හංවැල්ල හරස් පාර මුස්ලිම් පල්ලිය අසල ආපන ශාලාවක හිමිකරුවකුට වෙඩි තබා අමානුෂික ලෙස ඝාතනය කිරීම සම්බන්ධයෙන් අවිස්සාවේල්ල උසාවියේ විභාගවන නඩුවකට අදාළ ව ඔහුට එරෙහිව විදේශ ගමන් තහනමක් ලබා ගැනීමට බස්නාහිර පළාත් දකුණු අපරාධ කොට්ඨාසය කටයුතු කර ඇත.
බෝපේ පොද්දල පදිංචි මෙම 27 හැවිරිදි මෙම සැකකරුවා පවති තර්ජන හේතුවෙන් රවිඳු වර්ණසිංහ යන ව්‍යාජ නමකින් විදේශගත වීමටයන බවට ලද තොරතුරු මත ඔහු සම්න්ධයෙන් කෙරුණු ආවේක්ෂණයන්හිදී අනාවරණය වී ඇති අතර ඔහු පසුගිය 24 වැනිදා පස්වරු 6.00ට පමණ විදේශගත වීමට සැරසෙද්දී කටුනායක ගුවන් කොටුපලේදී අත්අඩංගුවට ගැනුණේ ආගමන විගමන නිලධාරීන් විසිනි.
ඔහු අත්අඩංගුට ගැනීමෙන් අනතුරුව කටුනායක ගුවන්තොටුපළ පොලිසිය වෙත භාර තීබේ. ඒ මොහොතේ රත්නායක නැමැති පොලිස් කොස්තාපල්වරයා ඔහු බාරගෙන සිර මැදිරියට යොමු කර ඇත.
කෙසේ වුවද රාත්‍රී කාලයේ මෙම චීවරධාරීන් දෙදෙනා පොලිසිය ට පැමිණි බවට වාර්තා වේ. ඒ මොහොතේ ස්ථානය භාරව ක්‍රියාකර ඇත්තේ සේනාරත්න නැමැති පොලිස් සැරයන්වරයාය. අත්අඩංගුවට ගෙන කූඩුවට දැමූ බූරු මූණා නැමති මෙම සැකකාර අපරාධකරු රාත්‍රියේ සිර කුටියෙන් පිටතට පැමිණ පුටුවක වාඩි වී සිටියදී හදිසියේම පලා ගිය බව පොලිස් වාර්තාවල දැක්වේ.
ඊට සම්බන්ධ වූ බවට සැකපිට කටුනායක ගුවන් තොටුපළ පොලිසියේ ස්ථානාධිපති ප්‍රධාන පොලිස් පරීක්ෂක ජනක සේනාධීර, සැරයන් සේනාරත්න සහ පොලස් කොස්පතාපල්වරුන් වන රත්නායක සහ කුමාර අත්අඩංගුවට ගෙන ඊයේ පෙරවරුවේ අධිකරණයට ඉදරිපත් කොට ඉන් තිදෙනෙක් ඇප මත නිදහස් කිරීමටද කටයුතු කර තිබේ.
කෙසේ වුවද දරුණු ඝනයේ අපරාධකරුවකු මෙලෙස පොලිස් භාරයෙන් මිදී යාමට ඉඩ සැලැස්වීමත් ඊට සම්බන්ධ පොලිස් නිලධාරීන් තිදෙනෙක් අත්අඩංගුවට ගෙන පැය කිහිපයක් තුළ අධිකරණයට ඉදිරිපත් කර ඇප මත නිදහස් කිරීමත් සම්බන්ධයෙන් මේ වනවිට දැඩි අවධානයක් යොමුව ඇති බව සඳහන් වේ.