දැරියට පහරදුන් කුඩම්මා 24 දා තෙක් රක්ෂිත බන්ධනාගාරගත කිරීමට නියෝග (Video) – New update
24 දා තෙක් රක්ෂිත බන්ධනාගාරගත කිරීමට නියෝග
කාන්තාවක් දැරියකට අතින් පයින් පහරදෙන ආකාරය දැක්වෙන සමාජ මාධ්‍ය ඔස්සේ සංසරණය වන වීඩියෝවට අදාළව එම පහර දීම සිදු කළේ යැයි කියන කාන්තාව අද(10) අත්අඩංගුවට ගත් බව රාගම පොලිසිය සදහන් කරයි.
මෙසේ අත්අඩංගුවට ගෙන ඇත්තේ පහරකෑමට ලක්වු දැරියගේ කුඩම්මා වන කරවිට ආරච්චිලාගේ දිනූෂා නමැති රාගම කුරුකුලාව ප්‍රදේශයේ පදිංචි 39 හැවිරිදි කාන්තාවකි.
පහරකෑමට ලක්වූ දැරිය රාගම පොලිසියේ පොලිස් නිලධාරීනියකගේ අධීක්ෂණය යටතේ රාගම ශික්ෂණ රෝහලේ 42 වන වාට්ටුවේ ප්‍රතිකාර ලබමින් සිටීයි.
දැරියගේ පියා විදේශගතව රැකියාවක් කරන බවත් පියාගේ දෙවන විවාහයේ බිරිව වන මෙම කාන්තාව සමග මෙම දැරිය ජීවත්වන බවත් පොලිසිය පවසයි.
වින්දිත දැරියගේ පියා විදේශගතව සිට නිවසේ සවි කර තිබෙන සීසීටීවී කැමරා වල දර්ශන සිය ජංගම දුරකථනය ඔස්සේ ලබාගෙන ඔහු විසින් මුහුණු පොත ඔස්සේ දැරියට පහරදෙන මෙම වීඩියෝව මුදා හැර ඇති බවට පොලිස් විමර්ශනවලින් කරුණු අනාවරණය වී ඇතැයි පොලිසිය සඳහන් කරයි.
දැරියගේ පියා සහ කුඩම්මා අතර යම් විරසකයක් තිබීම හේතුවෙන් මෙම වීඩියෝව මෙසේ සමාජ මාධ්යට මුදාහැරිය ඇති බවට පොලිසිය සැක කරයි.
අත්අඩංගුවට ගත් සැකකාරිය වත්තල මහේස්ත්‍රාත් අධිකරණයට ඉදිරිපත් කිරීමට නියමිතව ඇත.
බස්නාහිර පළාත් ජ්‍යෙෂ්ඨ නියෝජ්‍ය පොලිස්පති දේශබන්දු තෙන්නකෝන් මහතාගේ නියෝග අනුව කැලණිය කොට්ඨාස භාර ජ්‍යෙෂ්ඨ පොලිස් අධිකාරී බැසිල් ක්‍රිෂාන්ත මහතාගේ සහ කැලණිය සහකාර පොලිස් අධිකාරී පෙරමුණ මහතාගේ උපදෙස් මත රාගම වැඩබලන පොලිස් ස්ථානාධිපති අසේල පෙරේරා මහතාගේ අධීක්ෂණයෙන් කාන්තා පොලිස් පරීක්ෂක වත්සලා , කා. පො. කො.8230 කාංචනා යන නිලධාරීහු සිද්ධිය සම්බන්ධ විමර්ශන සිදුකරති.
17 හැවිරිදි දැරියකට අමානුෂික ලෙස පහර දුන් රාගම කුරුකුලාව ප්‍රදේශයේ කාන්තාව ලබන 24 දා තෙක් රක්ෂිත බන්ධනාගාරගත කිරීමට වැලිසර මහේස්ත්‍රාත් අධිකරණය ඊයේ (10) නියෝග කළේය
කුඩම්මා කෙනෙකු විසින් දරුවෙකුට අමානුෂික ලෙස සලකන ආකාරය දැක්වෙන වීඩියෝවක් මේ දිනවල සමාජ මාධ්‍ය කළඹමින් සංසරණය වෙමින් තිබේ.
එහි එම කුඩම්මා විසින් ගැහැණු දරුවාට ඉතා නින්දිත ලෙස පරුෂ වචනයෙන් බැන වදින ආකාරයත්, දරුවාට මරණ තර්ජන කරන ආකාරයත් එම වීඩියෝව තුළ අඩංගුව ඇත.
මෙම වීඩියෝ දර්ශන ප්‍රචාරය වූ විගසින් රාගම පොලිසිය මැදිහත් වී සුලු තුවාල සහිතව සිටි දැරිය ඊයේ (10) දිනයේ දී රෝහල් ගත කර තිබේ. අනතුරුව දැරිය අධිකරණ වෛද්‍ය නිලධාරියා වෙත ඉදිරිපත් කළ පොලිසිය, මෙම අමානුෂික ප්‍රහාරය සිදුකළ 39 හැවිරිදි කාන්තාව අත් අඩංගුවට ගෙන ඇත.
රාගම පොලිසිය පැවසුවේ දැරියගේ මව මියගොස් ඇති අතර ඇයට අමානුෂික ලෙස පහර දෙන්නේ ඇයගේ කුඩම්මා විසින් බවය.
දැරිය තරුණයින් සමග පවතින ප්‍රේම සබඳතාවලින් මුදාගැනීම සඳහා මෙලෙස ඇයට දඬුවම් කළ බව කුඩම්මා පොලිසියට පවසා ඇත.
මේ වනවිට දැරියගේ පියා සේවය කරන්නේ කොරියාවේ ය. ඔහු එහි සිට නිවසේ CCTV දර්ශන ඔස්සේ මේ අමානුෂික ප්‍රහාරය දැක ඒවා සමාජ මාධ්‍ය වෙත මුදාහැරීමට කටයුතු කර තිබෙන බව අනාවරණය වී තිබේ.
රාගම පොලිසිය වැඩිදුර පරීක්ෂණ පවත්වයි.