මහර හිරගෙදර ඝාතනයෙදී ඔලුවට, පපුවට වෙඩි තබා ඇති බව උසාවියේදී තහවුරු වේ
මාරාන්තික කොරෝනා වසංගතය දරුණු ලෙස රට පුරා ව්‍යාප්ත වෙමින් තිබුන මොහොතක
එකොලොස් දෙනකු බන්ධනාගාරයක් තුල මරා දමමින් කරන ලද සමූලඝාතනය සම්බන්ධයෙන් යුක්තිය ඉටුකරගැනීම වෙනුවෙන් රාජ්‍ය මර්දනයට මුහුණ දෙමින් දිගටම අරගල කළ සිරකරු අයිතිවාසිකම් වෙනුවෙන් පෙනී සිටින මෙරට ප්‍රමුඛතම සංවිධානය ජයග්‍රහණයක් හිමිකරගෙන තිබේ.
“අධිකරණය දීපු මේ තීන්දුව සම්බන්ධව අපි අධිකරණයට මේ අවස්ථාවේදී ගරු කරනවා. මොකද අපි බලාපොරොත්තු උනා ඇත්ත වශයෙන්ම මේකට සාධාරණයක් ඉෂ්ඨ වෙයි කියලා. අද ඒ සාධාරණය ඉෂ්ඨ වෙමින් පවතිනවා.”
සිරකරු අයිතිවාසිකම් සුරැකීමේ කමිටුවේ ප්‍රධාන ලේකම් සුදේශ් නන්දිමාල් සිල්වා ඒ බව සදහන් කළේ, තුන් වසරකට ඉහතදී මහර බන්ධනාගාරයේ සිරකරුවන් 11 දෙනකු ඝාතනය කිරීමේ අපරාධයට සම්බන්ධ සියලුම බන්ධනාගාර නිලධාරීන් වහාම අත්අඩංගුවට ගෙන අධිකරණයට ඉදිරිපත් කරන ලෙස වැලිසර මහෙස්ත්‍රාත් තුසිත ධම්මික උඩිවවිදාන අප්‍රේල් 26 වැනිදා අපරාධ පරීක්ෂණ දෙපාර්තමේන්තුවට නියෝග කිරීම සම්බන්ධයෙන් මාධ්‍ය දැනුවත් කරමිනි.
රැඳවියන්ගේ මරණ සිදුකිරීම අපරාධයක් බව තීරණය කළ වැලිසර මහේස්ත්‍රාත් වරයා මරණකරුවන්ට වෙඩි වැදී ඇති ආකාරය අනුව කැරැල්ලක් මැඬපැවැත්වීම සඳහා හෝ මානුෂිය මෙහෙයුමක් සඳහා වෙඩි තැබූ බවක් පෙනෙන්නට නැතැයි ද තීන්දු කළ බව ජනමාධ්‍ය වාර්තා කර තිබේ.
ඝාතනයට ලක්වු සිරකරුවන් එකොලොස් දෙනාගේ සිරුරේ ඉහළ කොටසට වෙඩි වැදීමෙන් මරණ සිදුව ඇතැයි අධිකරණ තීන්දුවේ දැක්වෙන බවයි, මහර සමුහ ඝාතනය වෙනුවෙන් යුක්තිය ඉටු කර ගැනීම සදහා වින්දිතයන්ගේ පවුල් වල ඥාතීන් සමග එක්ව සටන් කළ සිරකරු අයිතිවාසිකම් සුරැකීමේ කමිටුවේ ප්‍රධාන ලේකම් සුදේශ් නන්දිමාල් සිල්වා පවසන්නේ.
“මේක කැරැල්ලක් මැඩ පැවැත්වීමට සිදු කරපු වෙඩි තැබීමක්නම් දනහිසෙන් පල්ලැහැට වෙඩි තබන්න ඕනේ. නමුත් මේක උදරයෙන් ඉහලට වෙඩි තබා මේ රැදවියන් 11 දෙනා ඝාතනය කරා කියන එක තමයි ඊයේ ගරු අධිකරණය විසින් නියෝගය ලබා දීලා තියෙන්නේ. අත්අඩංගුවට ගන්න කියලා. මොකද මේකේ පපුව ප්‍රදේශයට ඔළුව ප්‍රදේශයට තමයි මේ රැදවියන්ට වෙඩි තියලා තිබුනේ. ”
ඉහල පුටු වල සිටින පිරිස් බල පොරය වෙනුවෙන් ලබාදෙන අනීතික නියෝග ක්‍රියාත්මක කර තමන්ගේ ජීවිතය අදුරට පත් කර නොගන්නා ලෙස සිරකරු අයිතිවාසිකම් සුරැකීමේ කමිටුවේ ප්‍රධාන ලේකම් මාධ්‍ය හමුවේදී බන්ධනාගාර නිලධාරීන්ට උපදෙසක්ද ලබා දුන්නේය.
” ඉදිරියටවත් තමන්ගේ රැකියාව, රැකියාව විදියට කරන්න. එක එක කොන්ත්‍රාත් වලට මිනීමරණ කොන්ත්‍රාත්කාරුවෝ බවට පත් වෙන්න එපා. එහෙම උනොත් ජීවිත කාලයටම හිර ගෙවල් වල දුක්විදින්න වෙනවා”
2020 වසරේ නොවැම්බර් 30 සහ දෙසැම්බර් 01 යන දිනවල සියයකට වැඩි පිරිසකට තුවාල සිදු කරමින් මහර බන්ධනාගාරයේ සිදු කළ සමුලඝාතක ප්‍රහාරයෙන් මිය ගිය 11 දෙනා වෙනුවෙන්, ඔවුන්ගේ ඥාතීන්ට මරණ සහතික නිකුත් කිරීමට ද විනිසුරුවරයා නියෝග කර තිබේ.
මහර හිරගෙදර වෙඩි ප්‍රහාරයට ලක්ව මිය ගොස් තිබුනේ ඇරැව්වලගේ භවන්ත මහින්ද (25), අලංකාර දේවගේ අමිත් සුබසිංහ (30), වැලිකල විදානෙලාගේ කවිඳු සුළක්ෂණ විතානගේ (21), යකුපිටියගේ රසික හර්ෂණ කාරියවසම් (33), මාලන් ක්‍රේග් (27), විතානගේ අවිශ්ක මල්ශාන් (18) ,හෙට්ටිආරච්චිගේ ලහිරු නිමන්ත (29), සිංගක්කාර ලියනගේ සම්පත් පුෂ්පකුමාර (29), සුදු දේවගේ ප්‍රදීප් අතුල කුමාර (41),ඉන්දික පුෂ්ප කුමාර, සරණප්‍රිය ජයසේකර පටබැඳිගේ සුමිත් කුමාර ය.
සාක්කිකරුවන්ට වධබන්ධන
මහර සිරගෙදර සමුලඝාතන අපරාධය ඇසින් දුටු සාක්ෂිකරුවන්ට වධහිංසා පමුණුවමින් ඔවුන් බන්ධනාගාරය තුළ බලහත්කාරයෙන් සිරකොටගෙන සිටින බවටත් සිරකරු අයිතිවාසිකම් සුරැකීමේ කමිටුව පසුගිය කාලයේ බන්ධනාගාර පාලනාධිකාරියට එරෙහිව චෝදනා එල්ල කළේය.
මහර බන්ධනාගාරයේ ගැටුමට තුඩූදුන් උද්ඝෝෂණය හටගත්තේ කොරෝනා වෛරසය ආසාදිත රැඳවියන් පිරිසක් වැලිකඩ බන්ධනාගාරයේ සිට මහර බන්ධනාගාරයට මාරුකිරීම හේතුවෙන් බව ජාතික මානව හිමිකම් කොමිෂන් සභාව 2020 වසරේ දෙසැම්බර් මස මුලදී පවසා තිබුනි.
සිරකරු උද්ඝෝෂණය සහ ඉන් අනතුරුව හටගත් ගැටුමට ප්‍රධාන වශයෙන්ම එහි පැවති තදබදය ඇතුළු කරුණු තුනක් හේතු වී තිබෙන බව ද එවකට කොමිසමේ මූලික නිගමනය විය.
එකොලොස් දෙනකු මරා දමමින් සියයකට වැඩි පිරිසකට තුවාල සිදු කළ මහර බන්ධනාගාරයේ සමුලඝාතක ප්‍රහාරයෙන් පීඩාවට පත් වුවන් වෙනුවෙන් පෙනී සිටින නීතිඥයන් රාජ්‍ය නොවන සංවිධාන නියෝජිතයන් ලෙස නීතිපති දෙපාර්තමේන්තුව විසින් හෙලා දකින ලදී.
අගතියට පත් පිරිස් වෙනුවෙන් ඉදිරිපත් වන නීතිඥයන් පෙනී සිටින්නේ රාජ්‍ය නොවන සංවිධාන වල උවමනාවට යැයි රජයේ අධිනීතිඥ නිශාරා ජයරත්න විවෘත අධිකරණයේදී චෝදනා නැගූ බව මානව හිමිකම් නීතිඥ සේනක පෙරේරා 2020 වසරේ දෙසැම්බර් මාසයේදී හෙළි කර තිබුනි.
මහර හිරගෙදර ප්‍රහාරයෙන් අගතියට පත් පාර්ශවය වෙනුවෙන් එවකට පෙනී සිටියේ සේනක පෙරේරා, කේ.එස් රත්නවේල් , පාලිත බණ්ඩාරනායක, අචලා සෙනවිරත්න, චූලා අධිකාරී, තම්බයියා ජේ රත්නරාජා, නාමල් රාජපක්ෂ, ලුතීෆ් සයිනුල් යන නීතිඥයන්ය.
මෙම නීතිඥ මණ්ඩලයට අගතියට පත් පිරිස් වෙනුවෙන් පෙනී සිටිමට බලය පවරා දුන්නේ කවුද යන්නත් නීතිපති දෙපාර්තමේන්තුව වෙනුවෙන් පෙනී සිටි රජයේ අධිනීතිඥ නිශාරා ජයරත්න අධිකරණයේදී ප්‍රශ්න කර තිබු අවස්ථාවේ තමන් වෙනුවෙන් පෙනී සිටිමට නීතිඥයන්ට අවසර දුන් බව මහර ප්‍රහාරයෙන් පීඩාවට පත් සිව් දෙනකු එම මොහොතේම අධිකරණය හමුවේ දැනුම් දී තිබුනි.