අතුරුදහන් වූවන්ට යුක්තිය සලසන ලෙස අලුත් ආණ්ඩුවට පෙත්සමක්
බලහත්කාරයෙන් අතුරුදහන් කරන ලද පුද්ගලයන් සම්බන්ධයෙන් උසවියේ ගොනු කර ඇති දකුණේ ප්‍රසිද්ධියට පත් නඩු අධිකරණමය බලයක් නොමැති ජනාධිපති කොමිසමක් හරහා යට ගැසීමට උත්සාහ දරන බවට මානව හිමිකම් සංවිධාන වෙතින් ආණ්ඩුවට චෝදනා එල්ල වී තිබේ.
නීතිපතිවරයාටත්, අධිකරණ අමාත්‍ය ජනාධිපති නීතිඥ අලි සබ්රි වෙතත් අගෝස්තු 28 සිකුරාදා පෙත්සමක් භාර දෙමින් අතුරුදහන්වුවන්ගේ පවුල් එකතුව ඉල්ලා ඇත්තේ “කොන්ද කෙළින් තබාගෙන” නීතියේ ආධිපත්‍ය රකින ලෙසයි.
අතුරුදහන් කරවීම් සම්බන්ධයෙන් සීමා සහිත නඩු කිහිපයක් පමණක් පසුගිය සමයේ අධිකරණයට ගෙන ඒමට හැකි වු බව පෙන්වා දෙන අතුරුදහන්වුවන්ගේ පවුල් එකතුවේ සභාපති මානව හිමිකම් ක්‍රියාධර බ්‍රිටෝ ප්‍රනාන්දු පවසන්නේ දේශපාලන පළි ගැනී‍ම් සොයා බැලීමේ ජනාධිපති කොමිසම හමුවට යන එම නඩු වලට අදාල විත්තිකරුවන්, ගෝඨාභය රාජපක්ෂ එම නඩු වලට පැටලීමට නොහැකි බව පැවසීම ඔවුන්ට චෝදනා නගා ඇතැයි පවසන බවයි.
” ඒ ජනාධිපති කොමිසමට මේ නඩු වලට අදාල විත්තිකාරයෝ ගිහිල්ලා කියන්න හදනවා ගෝඨාභය මහත්තයාව පටලවන්න බැහැයි කියපු හින්දා තමයි එයාලව මේ නඩු වලට පැටලුවේ කියලා. ඉතින් මේක විකාරයක්”
මාධ්‍යවේදී ප්‍රගීත් එක්නැලිගොඩ අතුරුදහන් වීම හා නාවික හමුදාව විසින් කප්පම් ලබා ගැනීම සදහා කොළඹ හා තදාසන්න ප්‍රදේශවල එකොලොස් දෙනකු අතුරුදහන් කිරීම ආදී නඩු දකුණේ අවධානයට ලක් වු නඩු දෙකක් බව බ්‍රිටෝ ප්‍රනාන්දු පවසයි.
එම නඩු වලට අදාලව පොලීසිය විසින් එකතු කරගත් සාක්ෂි මෙහෙයවා සැකකරුවන් අධිකරණයට ඉදිරිපත් කිරීමෙන් පසු, වත්මන් දේශපාලන වටා පිටාව පාවිච්චි කරමින් ජනාධිපති කොමිසම මාර්ගයෙන් අපරාධ පරීක්ෂණ දෙපාර්තමේන්තුවේ පොලිස් නිලධාරීන්ට චෝදනා එල්ල කරමින් විත්තිකරුවන් නිදහස් කිරීමට උත්සාහ කරන බවට මානව හිමිකම් ක්‍රියාධරයා චෝදනා කළේය.
රටේ අනාගතයේදී පවා දරුවන්ගේ ජීවිත ආරක්ෂා කිරීමටනම් නීතිය ක්‍රියාත්මක විය යුතු අතර අතුරුදහන් වීම් වැලැක්විය යුතු බව පෙන්වා දෙන මානව හිමිකම් ක්‍රියාධර බ්‍රිටෝ ප්‍රනාන්දු නීතිපතිවරයාගෙන් සහ , අධිකරණ අමාත්‍යවරයාගෙන් වැඩි දුරටත් ඉල්ලා සිටියේ “පුළුවන්නම් කෙළින් හිට ගන්නා” ලෙසයි.
පෙත්සම භාර දීමේ අවස්ථාවට එක්ව සිටි මානව හිමිකමි ක්‍රියාකාරිනී, සන්ධ්‍යා එක්නැලිගොඩ මාධ්‍යවේදීන් හමුවේ නීතිපතිවරයාට සහ අධිකරණ අමාත්‍යවරයාට පෙන්වා දුන්නේ රජය විසින් ස්ථිර ත්‍රිපුද්ගල මහාධිකරණයේ ගොනු කර තිබෙන නඩු වල විත්තිකරුවන් ජනාධිපති කොමිසම් හමුවේ යාම තුළ එම නඩු වලට අගතියක් සිදු වන බවයි.
“අවුරුදු ගණන් යුක්තිය වෙනුවෙන් මේ පොළවේ හැපි හැපි හිටපු මේ වින්දිතයන්ට මොකද වෙන්නේ? අනාගතයේ අපරාධවලට ගොදුරු වන වින්දිතයන්ගේ ආරක්ෂාව කවුද බලන්නේ? වින්දිතයන්ට යුක්තිය ඉටු කරන්නේ කවුද? ඒවට ඔබගේ වගකීම මැදිහත්වීම. කරුණාකර අපරාධකරුවන් ආරක්ෂා කරන්න එපා. අපරාධ කරුවන්ට නිසි දඩුවම් ලබා දෙන්න. ඒවා ඔබගේ වගකීම කියන එක මම පැහැදිලිවම මතක් කරනවා. කරුණාකර ඒ වගකීම වෙනුවෙන් පෙනී සිටින්න කියලා,” යි සන්ධ්‍යා එක්නැලිගොඩ නීතිපතිවරයාගෙන් සහ අධිකරණ අමාත්‍යවරයාගෙන් වැඩි දුරටත් ඉල්ලා සිටියාය.
විවිධාකාරයෙන් අහිමිවීම්, කඩවීම් හා වින්දිත භාවයන් තුල යුක්තිය ඉටුවීම් ප්‍රමාද වීමත් ඇතැම් බාධා හා වගවීම් නොමැති තත්ත්වයක් තුල දීර්ඝ කාලයක් පුරා වින්දිතයන් පීඩාවට පත්ව ඇති අතර යුක්තිය හා සාධාරණය පිලිබඳ අපේක්ෂාව පමණක් ශේෂව තබා ගනිමින් මෙම පෙත්සම ඉදිරිපත් කර ඇති බව අතුරුදහන්වුවන්ගේ පවුල් එකතුව පවසයි.
වැලිකඩ සිරකරුවන් ඝාතනය, කොළඹ හා තදාසන්න ප්‍රදේශයන්හී 11 දෙනකු කප්පම් ලබා ගැනීම සඳහා අතුරුදහන් කිරීම, මාධ්‍යවේදී ප්‍රගීත් එක්නැලිගොඩ ඝාතනය, මාධ්‍යවේදී ලසන්ත වික්‍රමතුංග ඝාතනය, රගර් ක්‍රීඩක වසීම් තාජුඩීන් ඝාතනය, මීතොටමුල්ල තරුණයෙකු පැහැර ගැනීම, කොටහේන ප්‍රදේශයේදී පුද්ගයන් දෙදෙනෙකු පැහැරගෙන යාම, සැකකරුවන් සඟවාගෙන ඔවුන්ට රැකවරණය ලබා දීමට හිටපු නාවික හමුදාපතිවරයෙකු ක්‍රියා කිරිම ආදී අපරාධ ක්‍රියාවන්ට ගොදුරුවුවන්ගේ සාමාජිකයන් පෙත්සම මගින් යුක්තිය ඉල්ලා තිබේ.