කොරෝනා ව්‍යාප්තිය පාලනයෙන් ගිලිහිලා. සැබෑ තත්ත්වය ජනතාවට හෙළි කළ යුතුයි’ – PHI සංගමය
කොරෝනාවෛරස ව්‍යාප්තිය මේ වන විට පාලනයෙන් ගිලිහි ඇති බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා පවසයි.
මේ වන විට ලංකාවේ සියලු ප්‍රදේශ කරා කොරෝනා වසංගතය ව්‍යාප්ත වී ඇති අතර කොළඹ මහ නගර සභා සීමාවේ කොරෝනා තත්ත්වය තවමත් පාලනයක් සිදු වී නොමැති බව ද ඔහු පැවසීය.
කොළඹට අමතරව දිවයිනේ විවිධ ප්‍රදේශවලින් මේ වන විටත් කොරෝනා අනුපොකුරු වාර්තා වන අතර, විශේෂඥ වෛද්‍යවරුන් පවතින සැබෑ තත්ත්වය ජනතාවට හෙළි කළ යුතු යැයි ද ඔහු ප්‍රකාශ කළේය.
“කොරෝනා සමාජගත වී නැතැයි කරන ප්‍රකාශ කොතරම් වලංගු දැයි විශේෂඥ වෛද්‍යවරුන් සිතා බැලිය යුතුයි. අටළුගම ප්‍රදේශයේදී ආසාදිතයෙකු විසින් මහජන සෞඛ්‍ය පරීක්ෂකවරුන්ට කෙළ ගැසීමේ සිද්ධියක් පසුගිය දා වාර්තා වුණා. ඉන්පසුව මහජන සෞඛ්‍ය පරීක්ෂකවරුන් ආරක්ෂාව මධ්‍යයේ ප්‍රදේශ වාසීන්ගේ පී.සී.ආර්. කිරීමට ගිය අතර එහිදී පී.සී.ආර්. සාම්පල 400 ක් ලබා ගැනීමට සැලසුම් කර තිබුණ ද ප්‍රදේශ වාසින් 52 කට ආසන්න සංඛ්‍යාවක් පමණයි එයට සහභාගී වුණේ. අටළුගම ප්‍රදේශයේ ජනතාව විසින් පවතින තත්ත්වය තේරුම්ගෙන කටයුතු කළ යුතුයි.
කොරෝනාවෛරසය අපට ඕන විදියට හැසිරෙන්නේ නැහැ. වෛරසය හැසිරෙන ආකාරයට අපි වෛරසය පසුපස යන ආකාරයක් තමයි පේන්න තියෙන්නේ. කොරෝනා පාලනය සම්බන්ධව රජයේ කොවිඩ් කාර්ය සාධක බලකාය ඇතැම් හොඳ තීරණ ගන්නවා. නමුත් බිම් මට්ටමේ අත්දැකීම් සහ ඒවාට අවශ්‍ය විසඳුම් ගන්නේ නැහැ කියල පේන්න තියෙන්නේ.
නිරෝධායනය සම්බන්ධයෙන් චක්‍රලේඛ විශාල සංඛ්‍යාවක් නිකුත් කර තිබුණත් බිම් මට්ටමේ නිරෝධායන කටයුතු පවතින්නේ හරි ම ව්‍යාකූල තත්ත්වයක. බිම් මට්ටමේ අත්දැකීම් නැතිව සෞඛ්‍ය අමාත්‍යංශය විසින් චක්‍රලේඛ නිකුත් කිරීම නිසා ගැටලු රාශියක් ඇති වී තිබෙනවා,” යැයි ඔහු වැඩිදුරටත් පැවසීය.
මහල් නිවාස ඇතුළු සංචරණය සීමා කළ ප්‍රදේශ විවෘත කළ ද එම ප්‍රදේශවල කොරෝනා පාලනයක් සම්පුර්ණයෙන් සිදුව ඇති බව විශ්වාස කළ නොහැකි බව ද ඔහු ප්‍රකාශ කළේය.
“ප්‍රජාවට අවශ්‍ය පහසුකම් සැපයීම සඳහා සහ ඔවුන් තවදුරටත් සීමා කර තැබීම නිසා ගැටලු නිර්මාණය වීම පදනම් කරගෙන යම් කිසි පාලනයක් සහිත ප්‍රදේශ පමණක් විවෘත කරල තියෙන්නේ. අපි හිතනවා එම ප්‍රදේශ තවදුරටත් සංචරණ සීමා කරල, විශේෂයෙන් ම කොළඹ මහ නගර සභා බල ප්‍රදේශය ම කොරෝනාවලින් තොර කර ගත්තේ නැත්නම් වසංගතය ලංකාවේ අනෙකුත් ප්‍රදේශවලත් පැතිරීම පාලනය කළ නොහැකියි.
රට ලොක්ඩවුන් කළ යුතු මට්ටමක නොමැති බවත් නමුත් සෞඛ්‍ය අංශ සහ ජනතාව වගකීමෙන් කටයුතු නොකළහොත් නත්තල් සමය අවසන් වීමත් සමග අවාසනාවන්ත ලෙස කොරෝනා ව්‍යාප්ත විය හැකි බව උපුල් රෝහණ මහතා අවධාරණය කළේය.
කෙසේ වෙතත්, සෞඛ්‍ය අමාත්‍යංශයේ සෞඛ්‍ය සේවා නියෝජ්‍ය අධ්‍යක්ෂ ජනරාල් වෛද්‍ය හේමන්ත හේරත් මහතා මාධ්‍ය වෙත පැවසුවේ, කොරෝනා පාලනය ඉතා යහපත් මට්ටමක පවතින බවය.