13 හෝ ඉන්දු ලංකා ගිවිසුම වෙනස් කරන්නේ නෑ – ඇමැති සබ්රි ….මා රාජ ද්‍රෝහියෙකු වීමට සූදානම්..- ඇමති සරත් වීරසේකර
පාර්ලිමේන්තුවට ඉදිරිපත් කර ඇති 20 වන ආණ්ඩු ව්‍යවස්ථා සංශෝධන පනත් කෙටුම්පත මගින් 13 වැනි ව්‍යවස්ථා සංශෝධනය හෝ ඉන්දු ලංකා ගිවිසුම පිළිබඳව වෙනසක් සිදුනොකරන බව අධිකරණ ඇමැති සබ්රි මහතා සඳහන් කරයි.
නව ආණ්ඩුක්‍රම ව්‍යවස්ථාවක් සකස් කිරීම රටේ අභ්‍යන්තර කටයුත්තක් යයිද පවසන ඔහු දහතුන්වන සංශෝධනය ගැන අනවශ්‍ය සැලකිලිමත් වීමක් නැති බවද පවසයි.
මෙරට නීති ක්‍රියාවලියේ දී සිදුවන කාලය නාස්ති වීම ගැන අදහස් පළ කළ ඔහු නීති පද්ධතියේ කාර්යක්ෂමතාවය ඉහළ නැංවීමට උපායමාර්ගයන් ගැන සලකා බලමින් සිටින බවද සඳහන් කළේය.
රූපවාහිනී නාලිකාවක් සමග පැවති අදහස් දැක්වීමකදී ඔහු මෙම අදහස් පල කලේය.
මේ අතර තමන් රාජ ද්‍රෝහියෙකු වීමට සූදානම් නමුත් දේශද්‍රෝහියෙකු වීමට සූදානම් නැති බව රාජ්‍ය අමාත්‍ය සරත් වීරසේකර මහතා සඳහන් කරයි.
13 වන ආණ්ඩුක්‍රම ව්‍යවස්ථා සංශෝධනය සම්බන්ධයෙන් තමන් පෙර දැරූ ස්ථාවරය අදටද දරන බව ඔහු පවසයි.
එම සංශෝධනය වහාම අහෝසි කිරීමට අවශ්‍ය යැයිද ඔහු කියා සිටියේය.
සිංහල වීර විදහන සංවිධානය විසින් ‘පළාත් සභා අහෝසි කරමු’ මැයෙන් කොළඹදී පවත්වන ලද සම්මන්ත්‍රණයක් අමතමින් ඔහු මෙම අදහස් පළ කළේය.