ආදිවාසී නායකයාගේ පෙත්සම විභාගයට දින නියම වේ
සිය පාරම්පරික නිජබිම් එළිකොට බඩඉරිඟු වගාව සඳහා පෞද්ගලික සමාගම් වෙත එම ඉඩම් පවරාදීමට මහවැලි අධිකාරිය ගෙන තිබෙන තීරණය බලරහිත කරන ලෙස ඉල්ලා ආදිවාසී නායක ඌරුවරිගේ වන්නියලැත්තෝ විසින් ගොනුකර ඇති පෙත්සම සලකා බැලීම සඳහා ජූලි මස 13 වනදා කැඳවන ලෙස අභියාචනාධිකරණය නියම කළේය.
මෙම පෙත්සම අද (03) අභියාචනාධිකරණයේ සභාපති විනිසුරු අර්ජුන ඔබේසේකර සහ මායාදුන්නේ කොරයා යන මහත්වරුන්ගෙන් සමන්විත විනිසුරු මඩුල්ල ඉදිරියෙහි කැඳවනු ලැබීය.
එහිදී විනිසුරු මඩුල්ල පෙත්සම සලකා බැලීම ජූලි මස 13 වනදා සිදුකිරීමට ද නියම කළේය.
මෙම පෙත්සම මීට පෙර කැඳවනු ලැබූ අවස්ථාවේ දී නීතිපතිවරයා වෙනුවෙන් පෙනීසිටි නියෝජ්‍ය සොලිසිටර් ජනරාල් පාරින්ද රණසිංහ මහතා අධිකරණයට දන්වා තිබුණේ වැදි ජනතාවට අයත් පාරම්පරික ඉඩම් අත්පත්කර ගැනීමක් සිදුවී නොමැති බවය.
කෙසේ වෙතත් මෙලෙස පවරාගැනීමට සූදානම් වන ඉඩම් පිළිබඳ විස්තර ඇතුළත් සිතියමක් අධිකරණය වෙත ඉදිරිපත්කරන ලෙස විනිසුරු මඩුල්ල විසින් මීට පෙර නියෝග කර තිබුණි.
එම සිතියම සකස් කර ඉදිරිපත්කිරීම සඳහා දිනයක් ලබා දෙන ලෙස ද වගඋත්තරකාර පාර්ශවය අධිකරණය වෙත මෝසමක් ඉදිරිපත් කරමින් අධිකරණයෙන් ඉල්ලා තිබේ.