බස්නාහිර පළාතේ රාජ්‍ය සේවකයින්ට ජනාධිපති ලේකම්ගෙන් නිවේදනයක්
කොරෝනාවෛරසය ව්‍යාප්තිය පාලනය කරනු පිණිස “නිවසේ සිට වැඩ කිරීමේ ක්‍රමය” යළි ක්‍රියාත්මක කරන්නැයි බස්නාහිර පළාතේ සහ සෙසු ප්‍රධාන නගරවල රාජ්‍ය ආයතනවලට නියම කර තිබේ.
2020 අප්‍රේල් සිට මැයි දක්වා මාසවල ක්‍රියාත්මක කළ “නිවසේ සිට වැඩ කිරීමේ කාලය” තුළ ලැබූ අත්දැකීම් උපයෝගී කරගෙන අත්‍යාවශ්‍ය සහ වෙනත් සේවා සම්පාදනයට විකල්ප සැලසුම් සකස් කරන මෙන් ආයතන ප්‍රධානීන්ට දැනුම් දී ඇත.
ඊට අදාළ චක්‍රලේඛය ජනාධිපති ලේකම් පී.බී. ජයසුන්දර මහතා විසින් ඊයේ (29) සියලු අමාත්‍යාංශ සහ රාජ්‍ය අමාත්‍යාංශ ලේකම්වරුන්, පළාත් ප්‍රධාන ලේකම්වරුන්, දිස්ත්‍රික් ලේකම්වරුන්, දෙපාර්තමේන්තු ප්‍රධානීන් සහ රාජ්‍ය සංස්ථා, ව්‍යවස්ථාපිත මණ්ඩල සභාපතිවරුන් සහ සාමාන්‍යාධිකාරීවරුන් වෙත යොමු ඇති බව ජනාධිපති මාධ්‍ය අංශය නිවේදනය කළේය.
වෛරසය ව්‍යාප්තිය නිසා සංචරනය සීමා කර ඇති කොළඹ, ගම්පහ සහ කළුතර දිස්ත්‍රික්කවලට එය විශේෂයෙන් අදාළ වන අතර මේ දිස්ත්‍රික්ක සහ සෞඛ්‍ය සේවා අධ්‍යක්ෂ ජනරාල් විසින් අවධානම් කලාප ලෙස නම් කර ඇති ප්‍රදේශ හැර සෙසු දිස්ත්‍රික්කවල පිහිටා ඇති රාජ්‍ය ආයතන දැඩි සෞඛ්‍ය නීති රීති යටතේ සාමාන්‍ය පරිදි පවත්වාගෙන යා යුතු බව ජනාධිපති ලේකම්වරයා විසින් නිකුත් කළ නව චක්‍රලේඛණයේ සඳහන් වේ.
කොරෝනා වසංගතය පාලනය කිරීම සඳහා තම විෂය පථය යටතට ගැනෙන සියලු පහසුකම් සැලසීමට ආයතන ප්‍රධානීන් පෞද්ගලිකවම බැඳී සිටින බව ජනාධිපති ලේකම්වරයා සඳහන් කළේය.
එක් එක් ආයතනයට දුරස්ථව ඉටු කළ හැකි කාර්යයන් සහ නිවසේ සිට සේවය කළයුතු සේවකයන් තීරණය කිරීමේ බලය නව චක්‍රලේඛණය මගින් ආයතන ප්‍රධානියාට පැවරී ඇත.
එසේ නිශ්චය කිරීමෙන් පසු අදාළ ලිපි ගොනු සහ උපකරණ නිසි අවසරයක් ඇතිව සේවකයන්ගේ නිවෙස් වෙත ලබාදිය යුතු වන අතර නිවසේ සිට වැඩ කරන කාලය, උදේ 8.30 – සවස 4.15 දක්වා වේ. ඇඳිරි නීතිය පනවා නැති අවස්ථාවක අවශ්‍යතාව අනුව එය වෙනස් කිරීමට ආයතන ප්‍රධානියාට හැකිවේ. “නිවසේ සිට වැඩ” සැලැස්මට අයත් නොවන සේවකයන් අතිරේක මානව සම්පත් අවශ්‍ය ආයතන වෙත අනුයුක්ත කළ හැකිය.
“නිවසේ සිට වැඩ කිරීමේ ක්‍රමය” කාර්යක්ෂමව සහ සාර්ථකව ඉටු කිරීම සඳහා විකල්ප සන්නිවේදන මාධ්‍ය භාවිත කරන්නැයි චක්‍රලේඛය මගින් ආයතන ප්‍රධානීන්ට උපදෙස් දී තිබේ. කෙටි පණිවිඩ සේවය, විද්‍යුත් තැපෑල, දුරකථන, පරිශීලක හිතකාමී (User Friendly) යෙදවුම් වන Whatsapp, Skype ඒ සඳහා භාවිත කිරීමට උපදෙස් දී ඇති අතර නිවසේ සිට වැඩ කිරීමට අවශ්‍ය මුදල් ප්‍රතිපාදන සැපයීම, ගණන්දීමේ නිලධාරීන්ගේ වගකීමක් ලෙස චක්‍රලේඛණයේ සඳහන් බව ජනාධිපති මාධ්‍ය අංශය නිවේදනය කළේය.
නව චක්‍රලේඛයෙන් ප්‍රාදේශීය පරිපාලනය, අධ්‍යාපනය සහ උසස් අධ්‍යාපනය, සුබසාධන සේවා සම්පාදනය, ව්‍යවස්ථාපිත ආයතන සහ පොදු ව්‍යවසාය සහ සාමාන්‍ය පරිපාලනය යන ක්ෂේත්‍රවලට විශේෂිත මාර්ගෝපදේශ නියම කර ඇත.
පාසල් සිසුන් සඳහා අධ්‍යාපනික රූපවාහිනී සහ ගුවන් විදුලි නාලිකා ආරම්භ කිරීම, විද්‍යුත් මාධ්‍ය ඔස්සේ අධ්‍යාපන වැඩසටහන් විකාශනය, සුබසාධන සේවා අඛණ්ඩව සැලසීම, ආබාධිත සහ නිදන්ගත රෝගවලින් පෙළෙන අයගේ නිවෙස්වලටම අවශ්‍ය සේවා සැපයීම ඒ අතර වේ.
සියලු රාජ්‍ය ආයතන කෙරෝනාවෛරස ව්‍යාප්තිය මර්දනය සඳහා සෞඛ්‍ය බලධාරීන් නියම කර ඇති විධිවිධාන අවශ්‍යයෙන්ම පිළිපැදිය යුතු බව චක්‍රලේඛය මගින් සඳහන් කර ඇත. සෞඛ්‍ය ප්‍රමිතීන් අනුගමනය කිරීමට අදාළව “ආදර්ශ පරිශ්‍රයක්” (Role model) ලෙස එක් එක් සේවා ස්ථානය පවත්වාගත යුතු බව ද ඉන් නිර්දේශ කොට තිබේ.
වරාය හා ආශ්‍රිත කාර්යයන්, රේගුව, ජලය හා විදුලිය ඇතුළු අත්‍යාවශ්‍ය සේවා අඩාලවීමකින් තොරව අඛණ්ඩව පවත්වාගෙන යා යුතු බව ද චක්‍රලේඛය මගින් ආයතන ප්‍රධානීන්ට දැනුම් ඇත.