වික්ටෝරියා ජලාශය අවට අධි සංවේදී භූ කම්පන මාන 10 ක් සවි කෙරේ
මෙරට සුළු භූ කම්පන තත්ත්වයන් වැඩි වශයෙන් සිදුවන ප්‍රදේශ ලෙස විශ්ලේෂණ මගින් හඳුනා ගැණුනු මහනුවර – වික්ටෝරියා ප්‍රදේශයේ ස්ථාන 10 ක ඉතා සුළු භූ කම්පනවලට අධි සංවේදී භූ කම්පන මාන 10 ක් ස්ථාපනය කිරීමට පියවර ගෙන තිබෙනවා.
ඒ, භූ විද්‍යා සමීක්ෂණ හා පතල් කාර්යංශය, ජර්මානු සමාගමක විශේෂඥයන් පිරිසක් සමග එක්ව සිදුකළ භූගෝලීය විශ්ලේෂණයකින් පසු ගත් තීරණයකට අනුවයි.
පසුගිය වසරේ ජූලි මස සිට දෙසැම්බර් මස දක්වා වන කාලය තුලදී මහනුවර – දිගන ප්‍රදේශයෙන් වරින්වර අවස්ථා කිහිපයකදීම සුළු භූ කම්පන තත්ත්වයන් වාර්තා වුණා.
ඒ පිළිබඳව විශ්ලේෂණය කර අවශ්‍ය පියවර ගැනීම සඳහායි භූ විද්‍යා සමීක්ෂණ හා පතල් කාර්යංශය, ජර්මානු සමාගමක විශේෂඥයන් සමග එක්ව මෙම විශේෂ විශ්ලේෂණ කටයුතු ආරම්භ කර ඇත්තේ.
එම විශ්ලේෂණයේදී වික්ටෝරියා ප්‍රදේශය මෙරට සුළු භූ කම්පන තත්ත්වයන් බහුල ලෙස කේන්ද්‍රගත වූ ප්‍රදේශයක් බවට හඳුනාගෙන තිබෙනවා.
ඒ අනුව ස්ථාපනය කර ඇති මෙම විදේශීය නිෂ්පාදිත නව අධි සංවේදී භූ කම්පන මාන යොදා ගනිමින් මාස 06 ක පර්යේෂණයක් සිදු කිරීමටයි මේ වනවිට කටයුතු යොදා ඇත්තේ.