අවම වශයෙන් සති 03 කට රට අගුළු දමන්න : ආණ්ඩුවේ හවුල් පක්ෂ ජනාධිපතිගෙන් ඉල්ලයි
අවම වශයෙන් සති 03 කට රට අගුළු දමන (Lockdown) ලෙස ආණ්ඩුවේ හවුල්කාර පක්ෂ 10ක් ජනාධිපති ගෝඨාභය රාජපක්ෂ මහතාගෙන් ලිඛිත ඉල්ලීමක් කර තිබේ.
ජනාධිපතිවරයා වෙත ලිපියක් යවන එම පක්ෂ 10 පෙන්වා දෙන්නේ, අවම වශයෙන් සති තුනක රට අගුළු දැමීමෙන් තොරව කොරෝනා රෝගීන් ගණන රෝහල් පද්ධතියට දැරිය හැකි මට්ටමට පහත හෙලීමට නොහැකි වන බව තමන්ගේ විශ්වාසය බවය.
අපේ ජනබල පක්ෂයේ පූජ්‍ය අතුරලියේ රතන හිමියන් සමග ප්‍රජාතන්ත්‍රවාදී වාමාංශික පෙරමුණේ අමාත්‍ය වාසුදේව නානායක්කාර මහතා, ලංකා සම සමාජ පක්ෂයේ මහාචාර්ය තිස්ස විතාරණ මහතා, ජාතික නිදහස් පෙරමුණේ අමාත්‍ය විමල් වීරවංශ මහතා, පිවිතුරු හෙළ උරුමයේ අමාත්‍ය උදය ගම්මන්පිල මහතා, ජාතික කොන්ග්‍රසයේ ඒ.එල්.එම්. අතාවුල්ලා මහතා, එක්සත් මහජන පක්ෂයේ ටිරාන් අලස් මහතා, ශ්‍රී ලංකා කොමියුනිස්ට පක්ෂයේ වෛද්‍ය ජී වීරසිංහ මහතා, ශ්‍රී ලංකා මහජන පක්ෂයේ අසංක නවරත්න මහතා සහ යුතුකම ජාතික සංවිධානයේ ගෙවිදු කුමාරතුංග යන මහත්වරුන් මේ ලිපියට අත්සන් කර තිබේ.
ආණ්ඩුවේ මෙම හවුල්කාර පක්ෂ 10 පෙන්වා දෙන්නේ, අවම වශයෙන් සති 3ක් රට අගුළු දැමීමෙන් දැනට ඉහළ යන ආසාදිත චක්‍රය බිද දැමීමට හැකිවන බවය.
වර්තමානයේ රට විවෘතව තිබුණත්, නිරෝධායනය වෙන සහ රෝගයට බියෙන් තැති ගත් අධික පිරිස හමුවේ රට අකර්මන්‍ය වී ඇතැයි ඔවුන් ජනාධිපතිවරයාට යැවූ ලිපියෙන් පෙන්වා දී තිබේ.
රෝගය පාලනය කළ විට ඔවුන් විශ්වාසයෙන් නැවත ආර්ථික ක්‍රියාවලිය සමග මුසුවනු ඇති බව ආණ්ඩුවේ හවුල්කාර පාර්ශව 10 ජනාධිපතිවරයාට යැවූ ලිපියේ සඳහන් ය.
එමෙන්ම ඔවුන් ජනාධිපතිවරයාට යෝජනා කරන්නේ , මෙය ජාතික ආපදාවක් බැවින් ඊට මුහුණ දීම සඳහා සර්ව පාක්ෂික යාන්ත්‍රණයක් සැකසිය යුතු බවය.
ඊට උපදෙස් දීම සඳහා සෞඛ්‍ය ක්ෂේත්‍රයේ වගේම ආර්ථික ක්ෂේත්‍රයේ විද්වතුන්ගෙන් සමන්විත කමිටුවක් සකස් කළ යුතු බවට ද ඔවුන් යෝජනා කර තිබේ .
ශ්‍රීලනිප මතය කියයි
මේ අතර, ඉහළ යන කොරෝනා ආසාදිතයන් සහ මරණ පාලනය කරගැනීම සඳහා යම් කාලයකට රට වැසීම හෝ ඇදිරි නීතිය පැනවීම සිදු කළහොත් හැකියාවක් ලැබෙනු ඇතැයි ශ්‍රී ලංකා නිදහස් පක්ෂය සඳහන් කරයි.
ඒ ගැන සාධනීය ලෙස කල්පනා කරන ලෙස රජයෙන් ඉල්ලා සිටින්නේ යැයි පක්ෂ මහ ලේකම් රාජ්‍ය අමාත්‍ය දයාසිරි ජයසේකර මහතා පැවසිය.
විශේෂඥ වෛද්‍යවරුන් විද්වතුන් මෙන්ම දේශපාලන පක්ෂ නායකයන් ගේ ද ඉල්ලීම වී ඇත්තේ සති දෙක තුනකට රට වසා දැමීම නිසා සෞඛ්‍ය බලධාරීන්ගේ උපදෙස් මත නිසි තීරණය කිරීම සුදුසු යැයි ද මහ ලේකම්වරයා කීය.
නමුත් රටේ පවතින ආර්ථික තත්ත්වය අනුව එය අසීරු කරුණක් බව තමන් පිළිගන්නා බවද ජයසේකර මහතා පැවසීය.
ඔහු මේ බව කියා සිටියේ ශ්‍රී ලංකා නිදහස් පක්ෂ මූලස්ථානයේ දී පැවති මාධ්‍ය හමුවක් අමතමිනි.
කෙසේ වෙතත් රට වසා දැමීම හෝ ඇඳිරි නීතිය පැනවීම ආදී ක්‍රියාමාර්ග ගත යුත්තේ දේශපාලකයන් විසින් නොව සෞඛ්‍ය විශේෂඥයන්ගේ අදහස අනුව යැයි ද පැවසූ ඔහු පවතින අවස්ථාවේ සර්වපාක්ෂික හමුවක් කැදවීම සුදුසු යයි ශ්‍රී ලංකා නිදහස් පක්ෂ සභාපති වරයා ඉල්ලා ඇතැයි ද සඳහන් කළේය.
