බාල දරුවකුට ගුටි ඇන මුල්ගුරු හිරේ ලගී

සිසු දරුවකුට කුරිරු කම් කළ විදුහල්පතිවරයකුට අධිකරණය මගින් වසර දෙකක බරපතල වැඩ සහිතව සිර දඬුවම් නියම කර තිබේ.

වයස අවුරුදු 12 ක පිරිමි දරුවකුට 2013 වර්ෂයේදී පහරදී කෲරත්වයට පත් කිරීම සම්බන්ධයෙන් ජාතික ළමා ආරක්ෂක අධිකාරියට ලැබුණු පැමිණිල්ලකට අනුව, අධිකාරියේ විශේෂ පොලිස් විමර්ශන ඒකකය මගින් සිදු කළ විමර්ශනයකින් පසු, කොළඔ ප්‍රදේශයේ පදිංචි වයස අවුරුදු 52 ක් වන සැකකරු අත්අඩංගුවට ගෙන ඇත.

විමර්ශනයෙන් අනතුරුව, නීතිපතිතුමා විසින් සැකකරුට එරෙහිව කොළඹ මහාධිකරණයේ නඩු පැවරීමෙන් පසුව, චූදිතයා විසින් තමා වරදකරු බවට පිළිගෙන තිබෙන බවයි ජාතික ළමා ආරක්ෂණ අධිකාරිය පවසන්නේ.

එම අධිකාරියේ සභාපති මහාචාර්ය මුදිත විදානපතිරණ සැප්තැම්බර් 14 සදුදා නිකුත් කර තිබෙන නිවේදනයක සදහන්ව ඇත්තේ චූදිත විදුහල්පතිවරයා විසින් සිය වරද පිළිගැනීමෙන් අනතුරුව, අධිකරණය විසින් වසර 2ක බරපතල වැඩ ඇතිව සිර දඬුවම් නියම කර, වසර 5කට අත්හිටුවා, රුපියල් පන්දහසක දඩ මුදලක් ගෙවීමට ද නියම කර ඇති බවයි.

එම දඩ මුදල නොගෙවන්නේ නම්, මාස 3ක සිර දඬුවම් නියම කර ඇති අතර, මෙම නඩුවේ වින්දිත බාලවයස්කාර පිරිමි දරුවාට රුපියල් විසි පන්දහසක වන්දි මුදලක් ගෙවීමට ද අධිකරණය නියම කර තිබේ.

එම වන්දි මුදල වින්දිත දරුවාට නොගෙවන්නේ නම්, වසර 1ක සිර දඬුවම් ලබා දීමට ද අධිකරණය නියම කර තිබෙන බව ජාතික ළමා ආරක්ෂක අධිකාරිය නිකුත් කළ මාධ්‍ය නිවේදනයේ වැඩි දුරටත් සදහන්ය.