කටකතා බොරු! ඕන කෙනෙකුට ඕන තැනකින් බූස්ටර් එන්නත ගහගන්න පුලුවන්!
කොවිඩ්-19 බූස්ටර මාත්‍රාව ලබා ගත යුත්තේ පෙර එන්නත් ලබා ගත් ස්ථානයෙන් බවට පැතිර යන අසත්‍ය වාර්තා සම්බන්ධයෙන් ප්‍රතිචාර දක්වමින් ප්‍රධාන වසංගත රෝග විශේෂඥ වෛද්‍ය සමිත ගිනිගේ පැවසුවේ දිවයින පුරා පිහිටුවා ඇති ඕනෑම මධ්‍යස්ථානයකින් බූස්ටර එන්නත් ලබා ගත හැකි බවයි.
සෞඛ්‍ය ප්‍රවර්ධන කාර්යාංශයේ පැවති ප්‍රවෘත්ති සාකච්ඡාවකට එක්වෙමින් වෛද්‍ය ගිනිගේ කියා සිටියේ පෙර මාත්‍රාව ලබා ගත් මධ්‍යස්ථානයෙන් හෝ ලබන්නා සමීපව සිටින මධ්‍යස්ථානයකින් බූස්ටරය ලබා ගැනීමේ අවශ්‍යතාවයක් නොමැති බවයි.
“වයස අවුරුදු 20 ට වැඩි සියලුම සුදුසුකම් ලත් පුද්ගලයින්ට දෙවන මාත්‍රාවෙන් මාස තුනක් සම්පූර්ණ කර ඇත්නම්, දැන් ඔවුන්ගේ තුන්වන මාත්‍රාව ලබා ගත හැකිය,” යනුවෙන් ඔහු පැවසීය.
“සුදුසුකම් ඇති සෑම පුද්ගලයෙකුම ප්‍රමාදයකින් තොරව ඔහුගේ/ඇයගේ බූස්ටර මාත්‍රාව ලබා ගැනීමට අවශ්‍යයි. කෙසේ වෙතත්, එන්නත් මධ්‍යස්ථානවලින් පිටත අනවශ්‍ය ලෙස පෝලිම්වල නොසිටින ලෙස ජනතාවගෙන් ඉල්ලා සිටිනවා” යැයි වෛද්‍ය ගිනිගේ මහතා වැඩිදුරටත් පැවසීය.
එපමණක් නොව, දෙවන මාත්‍රාවෙන් පසු කොරොන වයිරස් ආසාදනය වී ඇත්නම් මාස හයකට පසුව පමණක් බූස්ටර එන්නත ලබා ගන්නා ලෙස ඔහු ජනතාවගෙන් ඉල්ලා සිටියේය.