‘වෙනදා හැමදාම ජනතා විමුක්ති පෙරමුණේ සටන් පාඨය මොකක්ද? පුද්ගලිකකරණයට, රාජ්‍ය සම්පත් විකිණීමට එරෙහිව මහා රතු මැයි රැලිය. දැන් සටන් පාඨය ආර්ථික සංවර්ධනයට. දැන් ආණ්ඩුව කරන්නේ උන්නැහැලා. සටන් පාඨවල පද පෙරළියෙන් කියන්නේ මොකක්ද? ලයින් එක මාරුවෙලා නේද? වික්‍රමසිංහ උන්නැහේ මේක ඉන්දියානු කොලනියක් කරන්න යන වෙලාවේ ත්‍රිකුණාමල වරාය විකුණන් කන්න යන වෙලාවේ ‘අන්න රනිල් මහත්තයා යනවා ඉන්දියාවට, ඉන්දියාවට ගිහින් අස්සන් කරනවා අවබෝධතා ගිවිසුම්. මුළු ත්‍රිකුණාමල නගරයම භාරදෙනවා ඉන්දියාවට. තෙල් ටැංකි ටික විතරක් නෙවෙයි, හනුමන් පාලම හදන්න සාකච්ඡා කරනවා. අපේ අනන්‍යතාව මකලා මේක ඉන්දියානුවන්ගෙන් පුරවන්න තමයි ගිවිසුම් ගහන්න හදන්නේ. හතරවැනිදා එනවා ඉන්දීය අගමැති මෝදි. එන්නේ වෙසක් බලන්න තොරන් බලන්න නෙවෙයි. කියන්නේ එහෙම එහෙම තමයි. එන්නේ රට පාවල දෙන ඊළඟ ගිවිසුම් ටිකට අස්සන් ගහගෙන යන්න. අපි කියනවා ඒ පාවාදීමට එරෙහිව මෝදි අගමැතිට පේන්න මුළු රටම කළු කොඩිවලින් පුරවන්න ඕනෙ. ජාතියම අවදි වෙලා ඒ පාවාදීමට ඉඩ දෙන්නේ නැහැ කියලා පෙන්වන්න ඕනා. රනිලයා දන්සැල දමලා තියෙනවා. කන්න දෙන්නේ ඉන්දියාවට විතරයි. දන්සැලේ තියෙන්නේ මේ මව් පොළොව. මේ පින් බිම…’

විමල් වීරවංශ
2017.05.01
ගෝල්ෆේස් පිටිය
ඒකාබද්ධ විපක්ෂයේ මැයි රැලිය

විමල් වීරවංශ එදා 2017 පසුව පොදුජන පෙරමුණ බවට පත් වෙච්ච ඒකාබද්ධ විපක්ෂය ගෝල්ෆේස් පිට්ටනියේ රැස් කළ ඒ මහා ජන ගඟ කුපිත කරමින් කීවේ ත්‍රිකුණාමලයේ තෙල් ටැංකි ටික පවරාගන්න එන මෝදිට එරෙහිව කළු කොඩි ඔසවන්න කියාය.

‘එතකොට ඒ විමල් ප්‍රබල ඇමැති ධුරයක් දරන ගෝඨාභයගේ ආණ්ඩුව අද ත්‍රිකුණාමලයේ තෙල් ටැංකි පමණක් නොව තෙල් සපයන ඒකාධිකාරය ඉන්දියාවට භාරදෙන්න ගිවිසුම් හදනකොට විමල් උස්සන්නේ මොන කොඩියද…?

‘වෙනස් වෙන ජේ.වී.පී. ලයින් එක ගැන කතාකරපු විමල්ගේ ලයින් එක අද කට් වෙලාද…?’

‘රනිල්ගේ දන්සැල වගේද ගෝඨාගේ ආණ්ඩුවේ දන්සැල…?’

‘කොළඹ වරායේ බටහිර පර්යන්තය ඉන්දියාවට විකුණා, කෙරවලපිටිය විදුලි බලාගාරය ඇමෙරිකාවට විකුණා, ත්‍රිකුණාමලය තෙල් ටැංකි ඉන්දියාවට විකුණා තෙල් සපයන ඒකාධිකාරය ඉන්දියාවට දීලා කොළඹ වටිනා ඉඩම් මුස්ලිම් රටලට විකුණන දන්සැලෙන් විමලුත් කනවද…?’

එදා ගෝල්ෆේස් පිටියේ පැවැති ඒ මහා ජන ගංගාවට විමල් පමණක් නොව ගම්මන්පිල පමණක් නොව පොදුජන පෙරමුණත්, එහි නායක මහින්ද රාජපක්ෂත් කීවේ මෝදිට ත්‍රිකුණාමලයේ තෙල් ටැංකි පවරන ආණ්ඩුවේ දේශද්‍රෝහි කුමන්ත්‍රණයට එරෙහිව පෙරට එන්න කියාය.

‘ඉන්දියාව සමග ඒකාබද්ධව ලංකාව ත්‍රිකුණාමලයේ උපායික වැදගත්කමක් ඇති තෙල් ටැංකි සංකීර්ණය පාලනය කරන්න යෑම මහා පාවාදීමක්. ත්‍රිකුණාමලයේ තෙල් ටැංකි ජාතික සම්පතක්. එය විකිණීමට එරෙහි වීම ජාතිමාමකයන්ගේ යුතුකමක්…’

මහින්ද රාජපක්ෂ
2017.05.01
ගෝල්ෆේස් මැයි රැලිය
ලංකාදීප

එදා විමල් සමග තෙල් ටැංකි පවරාගන්න මෝදි එන ගමනට එරෙහිව කළු කොඩි ඔසවන්න කී උදය ගම්මන්පිල අද තෙල් ඇමැතිය. උදය කියන්නේ තමන් ඉන්දියාව සමග තෙල් ටැංකි පාලනයට සමාගමක් හදන්න සාකච්ඡා කරනවා කියාය. ඔහු ඒ ප්‍රකාශය කරන්නේ ලංකාවේ මාධ්‍යයට නොව, ‘ද හින්දු’ මාධ්‍යයටය.

ගම්මන්පිල තෙල් ඇමැති වූ වහාම කීවේ 2002 රනිල්ගේ ආණ්ඩුව ඉන්දියාවට වික්ක තෙල් ටැංකි ටික යළි පවරාගන්න මෙරට ඉන්දීය මහ කොමසාරිස් සමග සාකච්ඡා කරන බවය. එම සාකච්ඡා අතිසාර්ථක බවත් ඔහු කීවේය.

‘ඉන්දියාවට පවරපු ත්‍රිකුණාමලයේ තෙල් ටැංකි සංකීර්ණය යළි ලංකාවට ලබාගැනීමට ආරම්භ කළ සාකච්ඡා පසුගිය ඉරිදා අවසන් වුණා. මම සතුටුයි කියන්න ඉන්දීය මහ කොමසාරිස්වරයා දැඩිව නම්‍යශීලී වුණා. ඔහු 2017 රනිල්ගේ ආණ්ඩුව තෙල් ටැංකි ඉන්දියාවට පවරන්න අස්සන් කළ අවබෝධතා ගිවිසුමේ කොන්දේසි ඉවත දමන්න එකඟ වුණා, අපේ රටට උදව්වක් වශයෙන්. ඔහු අපේ කොන්දේසිවලට නම්‍යශීලීව එකඟ වුණා. මම ආඩම්බරයෙන් කියනවා 2003 අපට අහිමි වෙච්ච ත්‍රිකුණාමලයේ තෙල් ටැංකි යළිත් අපට හිමිවෙනවා. අපි ජාතියක් හැටියට සතුටු විය යුතුයි. මේ ටැංකි යළි ලංකාවට හිමිවීම ගැන…’

උදය ගම්මන්පිල
කොළොන්නාවේදී
2021.02.18
ඩේලි මිරර්

ගම්මන්පිල මේ කතාව රටටම ඇහෙන්න කීවේ හමුදාව, ප්‍රභාකරන්ගෙන් මව්බිම මුදාගත්තා වගේ තමන් ඉන්දියාවෙන් තෙල් ටැංකි මුදාගත්තා කියාය. ඒ වැඩේට මෙරට ඉන්දීය මහ කොමසාරිස් නම්‍යශීලී වූවා කියාත් ඔහු කීවේය. මෙහෙම කියපු ගම්මන්පිල හරියටම වසරක් යන්න කලින් ‘ද හින්දු’ පුවත්පතට මෙහෙම කීවේය.

‘අපි මාස 16ක් තිස්සේ මේ සම්බන්ධයෙන් අදහස් හුවමාරු කරගනිමින් සිටින්නේ. ඉන්දියාව සමග ත්‍රිකුණාමල තෙල් ටැංකි සංවර්ධන ගිවිසුම මාසයකින් අස්සන් කරනවා…’

උදය ගම්මන්පිල
‘ද හින්දු’
2021.12.27

‘හත් දෙයියනේ… මොන මළ ඉලව්වක්ද උදය ගම්මන්පිල එදා කිව්වේ තෙල් ටැංකි යළි අපට දෙන්න ඉන්දියාව එකඟ වුණා කියලා, ඉන්දීය මහ කොමසාරිස් නම්‍යශීලී වුණා කියලා…?’

දැන් බලාගෙන යනකොට නම්‍යශීලී වෙලා තියෙන්නේ ඉන්දීය මහ කොමසාරිස් නොව උදය ගම්මන්පිලය. එය නම්‍යශීලී වීමක් නොව දෙකට තුනට හතරට නැමිලා දීමකි. මේ 2017 රනිල් අස්සන් කළ අවබෝධතා ගිවිසුමටත් එහා ගොස් තෙල් සපයන ඒකාධිකාරය ඉන්දියාවට දීමකි.

‘කෝ බොල විමලයාගේ කළු කොඩිය…?’

මිනිසුන්ට අහන්න තියෙන්නේ එච්චරය.

උපුල් ජෝශප් ප්‍රනාන්දු     (ගුරුදා විග්‍රහය)