රන්ජන්ට අවුරුදු 7ක් යනකම් ජන්ද තහනමක්!
හිටපු පාර්ලිමේන්තු මන්ත්‍රී රන්ජන් රාමනායක මහතාට ජනාධිපති රනිල් වික්‍රමසිංහ මහතා විසින් ලබා දී ඇති ජනාධිපති සමාව අනුව ඔහුට වසර 7ක් ඉක්ම යන තෙක් මැතිවරණයකට ඉදිරිපත් විය නොහැක.
“රංජන් රාමනායක 34 (1) වගන්තිය යටතේ ජනාධිපති රනිල් වික්‍රමසිංහ විසින් සමාව ලබා දී ඇති අතර එය කොන්දේසි සහිත සමාවක් වන අතර දේශපාලන අයිතිවාසිකම් සහිත පූර්ණ ජනාධිපති සමාවක් ලබා ගැනීමට ආණ්ඩුක්‍රම ව්‍යවස්ථාවේ 34 (2) වගන්තිය යටතේ සමාව දිය යුතුය” යනුවෙන් අධිකරණ අමාත්‍යාංශයේ නිලධාරියෙක් මාධ්‍ය වෙත පවසා තිබේ.
විපක්ෂ නායක සජිත් ප්‍රේමදාස මහතා රන්ජන් රාමනායක මහතා සමඟ ඊයේ පස්වරුවේ මාධ්‍ය හමුවකට එක්වෙමින් රන්ජන් රාමනායක මහතාට දේශපාලන අයිතිවාසිකම් සහිත පූර්ණ ජනාධිපති සමාවක් ලබාදෙන ලෙස ජනාධිපති රනිල් වික්‍රමසිංහ මහතාගෙන් ඉල්ලා සිටියේය.
රන්ජන් රාමනායක මහතාගේ ප්‍රජා සහ දේශපාලන අයිතිවාසිකම් ඇතුළත් පූර්ණ ජනාධිපති සමාවක් ජනාධිපතිවරයා සහ රජය විසින් ඔහුට ලබාදිය යුතු බව විපක්ෂ නායකවරයා පැවසීය.
ශ්‍රී ලංකාවේ නීතියට අනුව වසර දෙකකට වැඩි කාලයක් සිරගතව සිටින පුද්ගලයකුට පූර්ණ ජනාධිපති සමාවක් නොලැබුණහොත් වසර 7කට ඔහුගේ දේශපාලන සහ ප්‍රජා අයිතිය අහිමි වේ.
හිටපු ජනාධිපති මහින්ද රාජපක්ෂ මහතා මීට පෙර එස්.බී දිසානායක සහ සරත් ෆොන්සේකා සිරගතව සිටියදී ඔවුන්ට පූර්ණ ජනාධිපති සමාව ලබා දී තිබූ අතර, ඔවුන් නිදහස් වූ වහාම මැතිවරණයට ඉදිරිපත් වීමට අවස්ථාව ලබා දුන්නේය.
2019 වසරේ රන්ජන් රාමනායක මහතාට සමානව අධිකරණයට අපහාස කිරීමේ චෝදනාවකට සිරගත වූ අවස්ථාවේදී පූජ්‍ය ගලගොඩඅත්තේ ඥානසාර හිමියන්ටද හිටපු ජනාධිපති මෛත්‍රීපාල සිරිසේන මහතා විසින් පූර්ණ ජනාධිපති සමාවක් ලබා දුන්නේය.