මාධ්‍යයේ දරුවන්ට එරෙහි ප්‍රකාශන මර්දනයට තද නීති ගෙනෙන සැලසුම්
ළමුන් යොදාගෙන සිදුකරනු ලබන අශ්ලීල ප්‍රකාශන, තොරතුරු තාක්ෂණය සහ වෙනත් මාධ්‍ය ඔස්සේ පළ කිරීම මෑත කාලයේ දී සීග්‍රයෙන් ඉහළ ගොස් ඇති බව රජය පවසයි.
එවැනි කරුණු සම්බන්ධයෙන් කටයුතු කිරීමට අදාළ විධිවිධාන, දණ්ඩ නීති සංග්‍රහයේ සහ අශ්ලීල ප්‍රකාශන ආඥාපනතේ ඇතුළත් වන නමුත් වර්තමාන තත්වයන්ට එකී විධිවිධාන ප්‍රමාණවත් නොවන බව පෙනී ගොස් ඇති බවයි රජය පවසන්නේ.
එයට පිළියමක් වශයෙන් ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය සහ ශ්‍රී ලංකා පරිගණක හදිසි ප්‍රතිචාර ඒකකය විසින් නීතිපතිවරයාගේ උපදෙස් මත අලුතින් පනතක් කෙටුම්පත් කිරීම සඳහා අවශ්‍ය තොරතුරු ඇතුළත් ලේඛනයක් පිළියෙල කර තිබෙන බව රජයේ ප්‍රවෘත්ති දෙපාර්තමේන්තුව නිවේදනය කර තිබේ.
එකී ලේඛනය මත පදනම්ව නව පනත් කෙටුම්පතක් පිළියෙල කිරීම සඳහා නීති කෙටුම්පත් සම්පාදක වෙත උපදෙස් ලබා දීම සදහා අධිකරණ අමාත්‍යවරයා අමාත්‍ය මණ්ඩලයට පසුගියදා යෝජනා කර ඇත.
එම යෝජනාව 2020 සැප්තැම්බර් 21 සදුදා පැවැති අමාත්‍ය මණ්ඩල රැස්වීමේදී අනුමත කර තිබෙන බව රජය වැඩි දුරටත් දැනුම් දෙයි.
බාල ළමා දරුවන් වීරයන් කිරීම
බාල ළමා දරුවන් වීරයන් බවට පත් කිරීමට ගන්නා වෑයම මගින් දරුවන් ප්‍රචණ්ඩ ක්‍රියා වලට යොමු කරන බවට දෙමාපියන් සහ මාධ්‍ය ආයතන පසුගියදා ළමාරක්ෂක බලධාරීන්ගේ ද විවේචනයට ලක්ව තිබුනි.
ළමා අපයෝජන නිවාරණ කාර්යාංශය එම විවේචනය කර තිබුනේ බාල දරුවන් මැරකම් පාන වීඩියෝ පට පලකිරීම සම්බන්ධයෙන් පසුගිය මැයි මාසයේදී කිහිප දෙනකු අත් අඩංගුවට ගැනීමෙන් අනතුරුවයි.
විවිධ වැඩ සටහන් හරහා පුංචි දරු පැටවුන් “තාරකා” කිරීමට දෙමාපියන් ගන්නා උත්සාහය සම්බන්ධයෙන් කනගාටුව පල කරන ළමා අපයෝජන නිවාරණ කාර්යාංශයේ ඉහල පොලිස් නිලධාරියෙක් කුඩා දරුවන් වීරයන් හා දක්ෂයන් බවට පත් කළ යුත්තේ ශ්‍රී ලංකාවේ පවතින නීතියට අනුකූලව බව වැඩිහිටියන්ට අවධාරණය කර තිබුනි.
“විවිධ වැඩ සටහන් අපි දැක්කා පහුගිය කාලය පුරාවටම විවිධ තාරකා බිහිවෙනුවා. පුංචි දරු පැටවුන්ට දරා ගන්න බැරි දේවල් ඔවුන් ලවා කරවලා බොහෝ දරුනු විදිහට ඒක ප්‍රසිද්ධියට පත් කිරීම”
කුඩා දරුවන් අවි ආයුධ ගෙන ඉතා ප්‍රචණ්ඩ ලෙස හැසිරෙනු දැක්වෙන වීඩියෝ පසුගියදා සමාජමාධ්‍ය වල මුදාහැර තිබුනේ එවැනි වැඩසටහන් වල ප්‍රතිපලයක් ලෙස බව ළමා හා කාන්තා අපයෝජන නිවාරණ කාර්යාංශයේ මහජන සම්බන්ධතා අංශයේ ස්ථානාධිපති ප්‍රධාන පොලිස් පරීක්ෂක මනෝජ් සමරසේකර පසුගිය මැයි මාසයේදී අවධාරණය කර තිබුනි.
දරු පැටවුන් අන්තර්ජාලය සහ විවිධ තාක්ෂණික උපරණ භාවිත කිරීමේදී ඒ සදහා ප්‍රමිතියක් ඇති කරන ලෙස ළමා හා කාන්තා අපයෝජන නිවාරණ කාර්යාංශයේ මහජන සම්බන්ධතා අංශයේ ස්ථානාධිපතිවරයා වැඩි දුරටත් ඉල්ලා තිබුනි.