ටෙනීගේ අවසන් කටයුතු අද : අගමැති අවසන් ගෞරව දක්වයි
ප්‍රවීණ සිනමා, වේදිකා නාට්‍ය රංගන ශිල්පියෙකු හා අධ්‍යක්ෂවරයෙකු වූ ටෙනිසන් කුරේ මහතාගේ දේහයට අග්‍රාමාත්‍ය මහින්ද රාජපක්ෂ මහතා ඊයේ (30) අවසන් ගෞරව දැක්වූයේය.
මොරටුමුල්ල, විල්ලෝරාවත්තේ පිහිටි නිවසට ගිය අගමැතිවරයා, ටෙනිසන් කුරේ මහතාගේ දේහයට අවසන් ගෞරව දක්වමින් ඒ මහතාගේ පවුලේ සාමාජිකයින් සමඟ ශෝකය බෙදා ගත්තේය.
වර්ෂ 1986 දී සිනමාවට අවතීර්ණ වන ටෙනිසන් කුරේ මහතා, ඉතා කෙටි කාලයක් තුළ විකට නළුවෙකු ලෙසින් සිය ප්‍රතිභා පූර්ණ රංගන කෞෂල්‍ය තුළ සුවහසක් ප්‍රේක්ෂක ජනාදරයට පාත්‍ර වූ අයෙකි.
මෙරට ප්‍රහසන සිනමාවට නැතුවම බැරි චරිතයක් බවට පත්වූ, ටෙනිසන් කුරේ මහතා විශිෂ්ට විකට නළුවෙකු ලෙස ලාංකේය ප්‍රේක්ෂකයන් සිනහවෙන් මුසපත් කරමින් චිත්‍රපට රැසක ප්‍රහසන රංග ශිල්පියා ලෙස කළ අද්විතීය රංගන දායකත්වය සදා නොමැකෙන්නකි.
අවසන් කටයුතු
ඒ මහතාගේ දේහය පිළිබඳ අවසන් කටයුතු හෙට (01) පස්වරු 4ට මොරටුමුල්ල මෙතොදිස්ත දේවස්ථාන සුසාන භූමියේදී සිදු කිරීමට නියමිතය.
