රුපියල් මිලියන 300ක කරුංකා CID භාරයට
නීතිවිරෝධීව මෙරටට ආනයනය කරන ලද රුපියල් මිලියන 300ක් වටිනා කරුංකා කන්ටේනර් 23ක් අපරාධ පරීක්ෂණ දෙපාර්තමේන්තුව විසින් සොයා ගෙන තිබේ.
අදාළ කරුංකා තොගය සමග 39 හැවිරිදි අවිස්සාවේල්ල ප්‍රදේශයේ පදිංචි පුද්ගලයෙක් ද අත්අඩංගුවට ගෙන ඇති බව පොලිස් මාධ්‍ය ප්‍රකාශක, නියෝජ්‍ය පොලිස්පති අජිත් රෝහණ මහතා පවසයි.
එම කරුංකා තොගය ඉන්දුනිසියාවේ සිටි මෙරටට ආනයනය කර ඇති ඇත්තේ ව්‍යාජ ලේඛන සකස් කරමින් ඉන්දියාවට ප්‍රතිඅපනයන කිරීමේ අරමුණින් බව පොලිස් මාධ්‍ය ප්‍රකාශකවරයා සඳහන් කළේය.
අත්අඩංගුවටගත් සැකකරු අද (10) කොළඹ ප්‍රධාන මහෙස්ත්‍රාත් අධිකරණය වෙත ඉදිරිපත් කිරීමට නියමිතය.
මේ පිළිබඳ වැඩිදුරටත් අදහස් දැක්වූ පොලිස් මාධ්‍ය ප්‍රකාශක, නියෝජ්‍ය පොලිස්පති අජිත් රෝහණ මහතා,
“ශ්‍රී ලංකාවත් ඉන්දියාවත් අතර ඇති විවිධ ආර්ථික ගිවිසුම් අනුව ශ්‍රී ලංකාවේ සිට ඉන්දියාවට අපනයනය කරන යම් යම් භාණ්ඩ සඳහා තීරුබුදු සහනයක් ලබා දෙනවා ඉන්දියාව විසින් එම සහනය උපයෝගී කර ගනිමින් මේ ආකාරයෙන් ශ්‍රී ලංකා රජයටත් ඉන්දියානු රජයටත් යම් පාඩුවක් සිදුකිරීමේ චේතනාවෙන් මෙවැනි වංචනික ක්‍රියා කරන බොහෝ කණ්ඩායම් සිටින බවට වාර්තා වී තිබෙනවා. එවැනි පුද්ගලයින් සමබන්ධයෙන්ද මේ වන විට විශේෂ විමර්ශන ආරම්භ කර තිබෙනවා. ඒ වාගේම මේ සිද්ධියට සම්බන්ධය පුද්ගලයින් කිහිපදෙනෙකු පිළිබඳව අපරාධ පරීක්ෂණ දෙපාර්තමේන්තුව පරික්ෂණ පවත්වනවා. “