ராஜபக்ச குடும்பத்துக்குள் சலசலப்பு! – நிகழ்கால அரசியல் அலசல்

கடந்த காலங்களில் பல சந்தர்ப்பங்களில், ராஜபக்ச குடும்பத்திற்குள் ஏற்பட்டுள்ள பாரதூரமான அரசியல் நெருக்கடிகள் தொடர்பாக செய்திகள் வந்த வண்ணம் உள்ளது.

முன்னாள் ஜனாதிபதி கோட்டாபய ராஜபக்ச , ஜனாதிபதி பதவியை விட்டு நாட்டை விட்டு வெளியேறிய நிலையில், ராஜபக்ச குடும்பத்திற்குள் கருத்து வேறுபாடுகள் வெளியானது.

குறிப்பாக, ராஜபக்ச குடும்பத்தின் மூத்த உறுப்பினரான சமல் ராஜபக்ச, அரசில் தங்கியிருந்து கொண்டு தனது மகன் ஷசீந்திர ராஜபக்சவுடன் எப்படி தனி பயணத்தை ஆரம்பித்தார், பசில், மஹிந்த மற்றும் குழுவினரை பகிரங்கமாக திட்டினார் என்பதிலிருந்து , ராஜபக்ச குடும்ப உறுப்பினர்கள் நல்லுறவில் இல்லை என்பது பகிரங்கமாக தெரிய வந்தது.

எல்லோரையும் ஒரே மேசைக்குக் கொண்டுவரும் பணி!

எவ்வாறாயினும், திடீரென கடந்த வாரம், ராஜபக்ஷ குடும்பத்தைச் சேர்ந்த பலர் ஒரே மேசையில் ஒன்றாக இருக்கும் புகைப்படம் ஊடகங்களில் வெளியானது.

ராஜபக்ச குடும்பத்துக்கு இடையே கடும் அரசியல் கருத்து வேறுபாடுகள் இருப்பதாக நாட்டுக்குள் கருத்து நிலவி வருவதால், ராஜபக்ச குடும்பம் மீண்டும் இணைந்த புகைப்படம் வெளியான உடனேயே, ராஜபக்சே குடும்ப உறுப்பினர்கள் மீண்டும் ஒன்றிணைந்து புதிய அரசியல் தொடங்கினார்களா என்று பலரும் தேடத் தொடங்கினர். இந்த புகைப்படத்திற்கு ஊடகங்கள் மூலம் பெரும் விளம்பரம் கிடைத்துள்ளதால், ராஜபக்சவினர் ஒரே மேசைக்கு வந்ததற்கான பின்னணியில் உள்ள கதையை கண்டறிய வேண்டியதாயிற்று.

சகோதரரியும், மைத்துனரும் பின்னால்!

இலங்கை சென்றிருந்த ராஜபக்சே குடும்பத்தை மீண்டும் இணைக்கும் நடவடிக்கைகளை சமீபத்தில் வெளிநாட்டில் இருந்து இலங்கை திரும்பிய ராஜபக்சே குடும்பத்தின் சகோதரி ஒருவரும், அவரது திருமணமான கணவரும் மேற்கொண்டதாக அங்கு தெரிய வந்தது. இதனை ராஜபக்ஷ குடும்பத்தின் ரீயூனியன் என்று அறிமுகப்படுத்தியிருந்தனர். அதற்காக ராஜபக்ச குடும்பத்தினர் அனைவரையும் கொழும்பில் உள்ள அவர்களது தனிப்பட்ட வீட்டில் இரவு விருந்துக்கு அழைக்க ஏற்பாடு செய்திருந்தனர். அதற்காக, முன்னாள் ஜனாதிபதி கோட்டாபய ராஜபக்ச மற்றும் அவரது மனைவி, மஹிந்த ராஜபக்ஷவின் குடும்பத்தினர் மற்றும் பசில் மற்றும் சமல் குடும்பத்தினர் அனைவரையும் அழைக்க நடவடிக்கை எடுக்கப்பட்டது.

கடைசி நிமிடத்தில், குழப்பிக் கொண்டு மகிந்த-ஷிரந்தி-நாமல் தங்கல்லை பயயணம்!

எனினும் இந்த இரவு விருந்திற்கு அனைவரும் சம்மதம் தெரிவித்த போதிலும் கடைசி நிமிடத்தில் இடையூறு ஏற்பட்டதையே காணமுடிந்தது. அதற்குக் காரணம் திடீரென மகிந்த, ஷிரந்தி, நாமல் ஆகியோர் தங்கல்லை மஹகெதரவுக்குப் (பண்ணை வீட்டுக்கு) புறப்பட்டுச் சென்றனர். இது தற்செயல் நிகழ்வாகத் தோன்றினாலும், ஷிராந்தி மற்றும் நாமலின் பலமான வேண்டுகோளின் பேரில் மஹிந்த இந்த விருந்தில் கலந்து கொள்ளவில்லை என்றும் அவர்களது அழுத்தத்தாலேயே தங்கல்லைக்குப் புறப்பட்டுச் சென்றுள்ளார் என்றும் அரசியல் வட்டாரத்தில் பல்வேறு வதந்திகள் பரவின.

அதன்படி மகிந்த, ஷிரந்தி, நாமல் இல்லாமல் இரவு விருந்தும் இடம்பெற்றது. எவ்வாறாயினும், இரவு விருந்தில் முன்னாள் ஜனாதிபதி கோட்டாபய ராஜபக்ஷ மற்றும் அவரது மனைவி அயோமா ராஜபக்ஷ ஆகியோர் கலந்துகொண்டமை அங்கு காணக்கூடிய மிகவும் சிறப்பு வாய்ந்த நிகழ்வாகும்.

மீண்டும் ஒரு டின்னர் தயார்!

ராஜபக்ச குடும்பத்தை மீண்டும் இணைக்கும் முதல் முயற்சி முறியடிக்கப்பட்டாலும், ராஜபக்ச குடும்பத்தின் சகோதரியும் அவரது கணவரும் அவர்களது முயற்சியை கைவிடவில்லை. அதன்படி மஹிந்த, ஷிரந்தி, நாமல் ஆகியோர் தங்காலையில் இருந்து கொழும்பு திரும்பிய பின்னர் மீண்டும் ஒருமுறை ராஜபக்ச குடும்பத்தினருக்கு தனது வீட்டில் இரவு விருந்தளிக்க திட்டமிட்டார்.

அதற்கு முன்னைய முறை போன்று அனைத்து ராஜபக்சக்களையும் அழைப்பதற்கும் நடவடிக்கை எடுத்தார்.

இதன் விளைவாக சில காலங்களுக்குப் பிறகு ராஜபக்ச குடும்பத்தின் மூத்தவர்கள் அனைவரும் ஒரே மேசையில் ஒன்றாகச் சேர்ந்து உணவை உண்டு மகிழும் வாய்ப்பு மீண்டும் ஒருமுறை கிடைத்தது. மகிந்த, சமல், பசில், நாமல், ஷசீந்திர ஆகியோர் முன்னிலையில் இருந்த நிலையில், கோட்டா மற்றும் அயோமா ஆகியோர் மாத்திரம் டின்னரில் கலந்து கொள்வில்லை.

ஆனால், இரவு விருந்தின் போது கோட்டாவின் செயலை கடுமையாக விமர்சிக்க ராஜபக்ச குடும்பத்தைச் சேர்ந்த சிலர் நடவடிக்கை எடுத்ததால், ராஜபக்ச குடும்பத்துக்குள் கோட்டாவுக்கு இருந்த எதிர்ப்பு வெளியே வந்தது.

மஹிந்தவின் பிரதமர் போர் மீண்டும் ஆரம்பம்!

எவ்வாறாயினும், மஹிந்தவை மீண்டும் பதவியில் அமர்த்துவதற்காக பொஹொட்டுவாவில் ஆரம்பிக்கப்பட்ட நடவடிக்கை பற்றிய தகவல்கள் மூன்று வாரங்களுக்கு முன்னர் வெளியானது. அது பற்றிய குறிப்பு கீழே உள்ளது.

இந்த நாட்களில் பொஹொட்டுவ (மொட்டு) மற்றுமொரு அரசியல் நடவடிக்கையை ஆரம்பித்துள்ளதாக செய்திகள் வெளியாகியுள்ளன. அதுவே முன்னாள் பிரதமர் மஹிந்த ராஜபக்ஷவை மீண்டும் பிரதமர் பதவிக்கு நியமிக்கும் நடவடிக்கையாகும். ஜனாதிபதி பதவியோ அல்லது பிரதமர் பதவியோ இல்லாமல் தேர்தல் நடத்தப்பட்டால் பொஹொட்டுவ மிகவும் ஆபத்தான கதியை சந்திக்க நேரிடும் என்பதை அக்கட்சியின் தலைவர்கள் உணர்ந்துள்ளமையே இதற்குக் காரணம். நிலைமையை ஓரளவுக்கு தணிக்க, பொஹொட்டுவாவுக்கு அரசாங்கத்தில் உயர் பதவி கிடைக்க வேண்டும் என பசில் உள்ளிட்டோர் கருத்து தெரிவித்திருந்தனர்.

ஆனால் இதற்கு முக்கிய தடையாக இருப்பது வேறு யாருமல்ல, தற்போதைய பிரதமராக இருக்கும் தினேஷ் குணவர்தனதான். தினேஸ் அரசாங்கத்தின் சிரேஷ்ட உறுப்பினர் என்பதனால் திடீரென அவ்வாறானதொரு பிரேரணையை முன்வைக்க முடியாது, ஆனால் கடந்த வாரம் ராஜபக்ச குடும்பத்தினர் உத்தியோகபூர்வமற்ற முறையில் இத்தகவலை அவருக்கு வழங்க ஏற்பாடு செய்திருந்தனர். பிரதமராக பதவியேற்க மஹிந்தவுக்கு மேலும் ஒரு சந்தர்ப்பம் வழங்கப்பட வேண்டுமென அதில் கூறப்பட்டது.

முதல் நிகழ்வாக தினேஷின் மௌனமான நிலையில், ராஜபக்ச குடும்பத்தைச் சேர்ந்த பலர் அதே செய்தியை தினேஷிடம் உத்தியோகபூர்வமற்ற முறையில் அறிவித்துள்ளனர். ஆனால் தினேஷ் அதற்கு ‘ஆம்’ அல்லது ‘இல்லை’ என பதிலழிக்கவே இல்லை. ஆனால் அந்த முயற்சியை ராஜபக்ச குடும்பத்தினர் இன்னும் கைவிடவில்லை என்றும் தெரிவிக்கப்படுகிறது.’ பிரதமருக்கான திரை மறைவு போட்டி மீண்டும் !

அன்றைய இரவு விருந்தில் நாங்கள் சொன்ன இந்த விஷயம் மீண்டும் பேசப்பட்டதாக அறியமுடிகிறது . இதுகுறித்து தினேஷ் அவர்களுக்கு பதில் அளிக்கவில்லை, ஆனால், பிரதமர் பதவியில் எந்த மாற்றமும் நடக்காது என தினேஷ் அறிக்கை ஒன்றை வெளியிட்டார். இது தொடர்பாகவும் ராஜபக்ச குடும்பத்துக்குள் பேசப்பட்டதாகத் தெரியவருகிறது. அதாவது, ராஜபக்ஷ குடும்பத்தை மீண்டும் இணைக்கும் நடவடிக்கையின் ஊடாக மஹிந்தவை மீண்டும் பிரதமராக்குவதற்கான நடவடிக்கை நடக்கிறது என்பது வெளிவந்துள்ளதையே அதன் மூலம் காணக்கூடியதாக இருக்கிறது.

பசிலின் புதிய ஆட்டம்!

இவ்வாறானதொரு பின்னணியில் பொஹொட்டுவ தேசிய அமைப்பாளரான பசில் ராஜபக்ஷவும் தனது அரசியல் திட்டத்தில் சிறு மாற்றத்தை ஏற்படுத்தியுள்ளார்.

ஜனாதிபதிக்கு நெருக்கமான அமைச்சர்கள் குழுவொன்று மொட்டை கரைக்கும் அரசியல் நடவடிக்கையை முன்னெடுத்துள்ளதாக பசிலுக்கு தகவல் கிடைத்துள்ளமையே இதற்குக் காரணம். இந்நிலையில், அரசியல் தந்திரமாக, அமைதியாக தலையை குனிந்து கொண்டு, காலம் கனியும்வரை சில காலம் தனது பணியை தொடர பசில் முடிவு செய்துள்ளார். அரசாங்கத்திற்குள் ஆட்டம் போடுவதற்கு முதலில் ராஜபக்சக்கள் பலமாக நிமிர்ந்து இருக்க வேண்டும் என்பது பசிலின் கணக்கு.

சாதகமான ஜோதிடர்களது ஆலோசனை!

இது தவிர, ராஜபக்சவின் அரசியல் குடும்பம் என்பது ஜோதிடத்தை பெரிதும் நம்புகிறது. வெற்றி பெற்றாலும் தோல்வியடைந்தாலும் அல்லது அரசியல் வேலை செய்வதற்கு முன் ஜோதிடத்தின் படி செயற்படுவது ராஜபக்சக்களின் வழக்கம். கிடைக்கும் தகவலின்படி எதிர்வரும் மே மாதத்திற்குள் ராஜபக்சவுக்கு மீண்டும் ஆட்சியைப் பிடிக்க வாய்ப்பு இருப்பதாக ஜோதிடர்களிடமிருந்து ஆலோசனைகள் கிடைத்துள்ளன.

அதுவரை மௌனமாக இருக்க ராஜபக்ச குடும்பத்தினர் முடிவு செய்துள்ள நிலையில், ஏப்ரல் மாத இறுதிக்குள் மீண்டும் அரசியல் நடவடிக்கைகளை தீவிரமாக மேற்கொள்ள மகிந்த குடும்பத்தினர் திட்டமிட்டுள்ளனர்.

இது தவிர மே மாதத்திற்குப் பின்னர் மஹிந்த மீண்டும் பிரதமர் நாற்காலியில் அமரலாம் என்ற கணிப்பு ஒன்றையும் ஜோதிடர்கள் ராஜபக்ஷ குடும்பத்தினருக்கு தெரிவித்துள்ளதான செய்தியொன்றும் வெளியாகியுள்ளது. இந்த ஜோதிட அறிவுறுத்தல்களுடன்தான் ராஜபக்ச குடும்பத்தின் சகோதரியின் வீட்டில் இரவு உணவு தயார் செய்யப்பட்டு மீண்டும் ராஜபக்ஷ குடும்பத்தை ஒன்றிணைக்கும் நடவடிக்கை முன்னெடுக்கப்பட்டுள்ளமை விசேட நிகழ்வாகும்.

ஓட்டுக்கு என்ன செய்வது!

அரசாங்கத்தில் அங்கம் வகிக்கும் பல்வேறு கட்சிகளின் இழுபறி காரணமாக மார்ச் 9ஆம் திகதி நடைபெறவிருந்த உள்ளூராட்சித் தேர்தலை ஏப்ரல் 25ஆம் திகதி நடத்த தேர்தல்கள் ஆணைக்குழு கடந்த வாரம் தீர்மானித்தது.

அதன்படி, தேர்தலுக்கு பட்ஜெட்டில் ஒதுக்கப்பட்ட பணத்தை தடுத்து நிறுத்த நீதிமன்றம் அளித்த இடைக்காலத் தடை உத்தரவின்படி, தேர்தல் ஆணையம் கடந்த வாரம் நிதியமைச்சின் செயலாளர், முதன்மை செய்தியாளர் மற்றும் காவல்துறை மா அதிபர் ஆகியோருக்கு தேர்தல் ஆணையத்திடம் விவாதம் நடத்த  அழைப்பு விடுத்தது. 

இக்கலந்துரையாடலுக்கு அழைப்பு விடுக்கப்பட்ட செவ்வாய்க்கிழமையன்று , பாதுகாப்புச் சபையின் அவசரக் கூட்டத்தில் பங்கேற்க வேண்டும் எனக்கூறி நிதி அமைச்சின் செயலாளர் கே.மஹிந்த சிறிவர்தன கலந்துரையாடலில் பங்கேற்கவில்லை.

ஆனால் அனைத்து தபால் வாக்குச் சீட்டுகளையும் 05 நாட்களுக்குள் அச்சிடலாம் எனவும் , வாக்குச் சீட்டுகளை 20 முதல் 25 நாட்களுக்குள் சரியான நேரத்தில் அச்சிட முடியும் எனவும் அங்கிருந்த ஊடகவியலாளர்களிடம் ,  ஆணைக்குழுவிடம் அச்சக திணைக்களத்தின் தலைவர் கங்கானி லியனகே தெரிவித்தார்.

மகிந்த தேசப்பிரியாவை வைத்து போடவுள்ள ஆட்டம்!

தேர்தல் ஆணையம் தேர்தலுக்கு தயாராகி வந்தாலும், தேர்தலை நடத்த அரசு இன்னும் முடிவு செய்யவில்லை. தேர்தலை நடத்தாமல் இழுத்டிக்க , எல்லை நிர்ணய குழுவின் அறிக்கையின் ஊடாக தேர்தலை ஒத்திவைப்பதற்கு தேவையான பின்னணியை தயார்படுத்துவதே அரசாங்கத்தின் சமீபத்திய திட்டமாகும். அந்த ஆணைக்குழுவின் தலைவராக தேர்தல்கள் ஆணைக்குழுவின் முன்னாள் ஆணையாளர் மகிந்த தேசப்பிரிய செயற்படுகின்றார். இந்த அறிக்கையை மஹிந்த தேசப்பிரியவிடம் இருந்து விரைவில் பெற்று அமைச்சரவையில் நிறைவேற்றி சட்டமாக பாராளுமன்றத்தில் சமர்ப்பிப்பதே இப்போதைய அரசாங்கத்தின் திட்டம்.

ஓய்வு பெற்ற மகிந்த தேசப்பிரிய கூட ஒரு விண்ணப்பத்துள்ளார்.

மஹிந்த தேசப்பிரிய பற்றிய மற்றுமொரு புதிய தகவல் ஊடகங்களுக்கு தெரிவிக்கப்பட்டது. அதாவது 35 வருடங்களுக்கு மேலாக தேர்தல்கள் ஆணைக்குழுவில் கடமையாற்றி ஓய்வுபெற்று தனது பிள்ளைகள் மற்றும் பேரக்குழந்தைகளுடன் நேரத்தை செலவிடும் மஹிந்த தேசப்பிரிய மீண்டும் தேர்தல் ஆணைக்குழுவின் தலைவர் பதவிக்கு விண்ணப்பித்துள்ளார் என்பதே அந்த தகவலாகும். மஹிந்த தேசப்பிரியவைத் தவிர, ஆணைக்குழுவின் தற்போதைய தலைவர் நிமல் புஞ்சிஹேவாவும் அதற்கான விண்ணப்பத்தை மீண்டும் சமர்ப்பித்துள்ளார். எவ்வாறாயினும், தேர்தல் ஆணையாளராக மஹிந்த தேசப்பிரியவுக்கே அரசாங்கத்தின் ஆதரவு இருப்பதாக கிடைக்கப்பெறும் தகவல்கள் தெரிவிக்கின்றன.

மகிந்த தேசப்பிரிய  , முன்னர் பசிலோடு ! இப்போது ரணிலோடு?

பொதுவாக மஹிந்த தேசப்பிரிய கடந்த காலங்களில் பசில் மற்றும் ராஜபக்சவுக்கு நெருக்கமானவராகவே கருதப்பட்டார். ஆனால் தற்போது மகிந்த தேசப்பிரிய ஜனாதிபதி ரணில் விக்கிரமசிங்கவிற்கு மிகவும் நெருக்கமானவராகிவிட்டதை காணக்கூடியதாக உள்ளது. இதன்படி மஹிந்த தேசப்பிரியவின் வரையறுக்கப்பட்ட அறிக்கையை கூடிய விரைவில் பாராளுமன்றத்தில் நிறைவேற்றி அதன் பின்னர் தேர்தலை இரத்து செய்ய அரசாங்கம் திட்டமிட்டுள்ளது. அதனைச் செய்த பின்னர் அவர்களுக்கு நட்புறவான புதிய தேர்தல் ஆணைக்குழுவை நியமிக்க அரசாங்கம் திட்டமிட்டுள்ளதாகவே அறியமுடிகிறது.

தயாசிறிக்கு ஆப்பு?

ஸ்ரீலங்கா சுதந்திரக் கட்சிக்கு புதிய பதில் பொதுச் செயலாளரை நியமிக்க கடந்த வாரம் கட்சியின் தலைவர் மைத்திரிபால சிறிசேன நடவடிக்கை எடுத்தார்.

மத்திய மாகாணத்தின் முன்னாள் ஆளுநரான சரத் ஏக்கநாயக்க இவ்வாறு நியமிக்கப்பட்டார்.

இந்த நியமனம் குறித்து மைத்திரியிடம் ஊடகவியலாளர்கள் ‘தயாசிறியை கத்தரித்து விட்டீர்கள் இல்லையா?’ என வினவியபோது, ​​மைத்திரி சிரித்துக்கொண்டே, அப்படியெல்லாம் இல்லை என்றும், தயாசிறி வெளிநாட்டில் இருப்பதால், அதற்கான பதில் பொதுச் செயலாளர் நியமிக்கப்பட்டுள்ளார் என்றும் தெரிவித்தார்.

மைத்திரி ஆடப்போகும் ஆட்டம்!

மைத்திரி சிரித்துக் கொண்டே, கட்சிக்குள் நெருக்கடி இல்லை என்றும், ஆனால் தயாசிறி சில காலமாக மிகுந்த ஏமாற்றத்தில் இருந்ததாகவும் தெரிவிக்கப்படுகிறது. அதே அரசியல் விரக்தியுடன் மகனின் பட்டம் அளிப்பு விழாவில் கலந்து கொள்ள தயாசிறி வெளிநாடு சென்றார். தயாசிறியின் ஏமாற்றத்திற்குக் காரணம் , மைத்திரி மீண்டும் அரசாங்கத்துடன் திரைமறைவில் ஒப்பந்தம் ஒன்றை செய்து கொண்டமையேயாகும் .

அத்துடன், ஸ்ரீலங்கா சுதந்திரக் கட்சியில் இருந்து பிரிந்து அரசாங்கத்தில் இணைந்து கொண்ட துமிந்த திஸாநாயக்க மற்றும் குழுவினருடன் மைத்திரி மீண்டும் பேச்சுவார்த்தைகளை ஆரம்பித்துள்ளதாகவும், அவர்கள் அனைவருடனும் இணைந்து மீண்டும் அரசாங்கத்தில் இணைந்து கொள்ள மைத்திரி தயாராக இருப்பதாகவும் தயாசிறிக்கு தகவல் தெரிவிக்கப்பட்டிருந்தது.

ஈஸ்டர் தாக்குதலில் உயிரிழந்தவர்களுக்கு , ஒரு மில்லியன் நட்டஈடு வழங்குவது என்ற தீர்ப்பின் பின்னர் மைத்திரி மாறிவிட்டார் என தயாசிறியுடன் உரையாடிய பலர் தெரிவித்திருந்தனர். அத்துடன், மைத்திரி, ஜனாதிபதியுடன் அவ்வப்போது பேசியதாகவும், மற்றுமொரு சந்தர்ப்பத்தில் பசிலுடனும் பேசியதாகவும், அரசியல் களத்தில் தகவல் பரவியிருந்தது.

தயாசிறியின் பிடிவாதம்!

இந்நிலையில் மைத்திரி முதலில் சுதந்திர மக்கள் கூட்டமைப்புடன் இணைந்து எதிர்க்கட்சி தரப்பாக செயல்பட தயாராக இருந்த போதிலும், மைத்திரியின் இந்த மாற்றத்தை அந்தக் கூட்டணியின் பிரதிநிதிகள் தெரிவித்ததும் அவர் அந்தக் கூட்டணியில் இருந்து நீக்கப்பட்டார். ஆனால், சுதந்திரக் கூட்டமைப்பினரின் பேச்சுவார்த்தையில் தொடர்ந்தும் பங்கேற்க தயாசிறி தீர்மானித்துள்ளதாகத் தெரிவிக்கப்படுகிறது. இதன்படி தற்போது வெளிநாட்டில் இருக்கும் தயாசிறி, இலங்கைக்கு வந்த பின்னர் சில கடுமையான அரசியல் தீர்மானங்களை எடுக்க தயாராக உள்ளார் என தெரியவருகிறது.

– கபில புஞ்சிமான்ன
தமிழில் : ஜீவன்