தந்தையை கொலை செய்த சந்தேகத்தில் இரண்டு மகன்கள் உட்பட மூவர் கைது.

யாழ்ப்பாணம் கொடிகாமம் பொலிஸ் பிரிவிற்குட்பட்ட கரம்பம் பகுதியில் மிருசுவில் தந்தையை கூரிய ஆயுதங்களால் தாக்கி கொலை செய்த சந்தேகத்தின் பேரில் இரண்டு மகன்கள் உட்பட மூவர் நேற்று (01) கைது செய்யப்பட்டதாக பொலிஸார் தெரிவித்தனர்.

கடந்த 31ஆம் திகதி கூரிய ஆயுதங்களால் தாக்கப்பட்டு உயிரிழந்த இரு பிள்ளைகளின் தந்தையின் சடலம் கரம்பம் பகுதியில் உள்ள தற்காலிக வீடொன்றில் கண்டெடுக்கப்பட்டு, பிரேதப் பரிசோதனையின் பின்னர் மரணம் கொலை எனத் தெரியவந்துள்ளது என கொடிகாமம் போலீசார் தெரிவித்துள்ளனர்.

உயிரிழந்தவர் தனது குடும்பத்தைத் தவிர்த்து தற்காலிக வீட்டில் வசித்து வந்தவர் என்பதுடன், உயிரிழந்தவர் இரண்டு பிள்ளைகளின் தந்தையான 43 வயதுடைய சிவசோதி சிவகுமார் ஆவார்.

உயிரிழந்த தந்தைக்கும் அவரது இரண்டு பிள்ளைகளுக்கும் இடையில் கடந்த சில நாட்களாக வாக்குவாதம் ஏற்பட்டுள்ளதாக பொலிஸாரால் ஆரம்பிக்கப்பட்ட விசாரணைகளில் தெரியவந்துள்ளது. அதன்பின் போலீசார் நடத்திய விசாரணையின் பின் , இரு மகன்களுடன் மேலும் ஒருவரை போலீசார் கைது செய்தனர்.

17 மற்றும் 19 வயதுடைய இரண்டு பிள்ளைகளும் தந்தையின் தற்காலிக வீட்டிற்கு வந்துள்ளனர், வாக்குவாதம் முற்றி, இரு மகன்களும் கூரிய ஆயுதங்களால் தாக்கியிருக்கலாம் என பொலிஸார் சந்தேகிக்கின்றனர்.

கொலைக்கு பயன்படுத்திய கூரிய ஆயுதங்கள் சிலவற்றை அருகில் உள்ள நீர் கால்வாயில் இருந்து பொலிஸார் கண்டுபிடித்துள்ளதுடன், சந்தேக நபர்களை சாவகச்சேரி நீதிமன்றில் ஆஜர்படுத்த பொலிஸார் நடவடிக்கை எடுத்துள்ளதாக கொடிகாமம் பொலிஸார் மேலும் தெரிவித்தனர்.