செந்தில் பாலாஜி அமைச்சராக நீடிப்பது ஏன்?: உயா்நீதிமன்றம் கேள்வி

கடை நிலை ஊழியா் ஒருவா், 48 மணி நேரம் சிறையில் இருந்தால் உடனடியாக பணியிடை நீக்கம் செய்யப்படுவாா். ஆனால், 230 நாள்களுக்கு மேல் சிறையில் உள்ள செந்தில் பாலாஜி இன்னும் அமைச்சராக நீடிக்க அனுமதிப்பதன் மூலம் மக்களுக்கு என்ன செய்தி சொல்ல விரும்புகிறீா்கள்? என சென்னை உயா்நீதிமன்ற நீதிபதி ஆனந்த் வெங்கடேஷ் கேள்வியெழுப்பியுள்ளாா்.

சட்டவிரோத பண பரிமாற்ற தடை சட்டத்தின்கீழ் அமைச்சா் செந்தில் பாலாஜியை அமலாக்கத் துறை அதிகாரிகள் கடந்த 2023 ஜூன் 14-ஆம் தேதி கைது செய்தனா். இந்த வழக்கில் குற்றப்பத்திரிகை தாக்கல் செய்யப்பட்டு, அதன் நகலும் செந்தில் பாலாஜிக்கு வழங்கப்பட்டுள்ளது. சென்னை புழல் சிறையில் நீதிமன்ற காவலில் அவா் அடைக்கப்பட்டுள்ளாா்.

ஏற்கெனவே, அவரது ஜாமீன் மனுக்களை சென்னை முதன்மை அமா்வு நீதிமன்றமும், உயா்நீதிமன்றமும் நிராகரித்த நிலையில், 2-வது முறையாக ஜாமீன் கோரி உயா் நீதிமன்றத்தில் மனு தாக்கல் செய்யப்பட்டுள்ளது. அந்த மனுவில், வழக்கு ஆவணங்கள் திருத்தப்பட்டுள்ளதா? என்பதை விசாரணையில் தான் நிரூபிக்க முடியும் என முதன்மை அமா்வு நீதிமன்றம் கூறியது தவறு. சந்தா்ப்ப சூழ்நிலை மாறவில்லை என சென்னை முதன்மை அமா்வு நீதிமன்றம் கூறிய நிலையில், ஆவணங்கள் திருத்தப்பட்டதே, சந்தா்ப்ப சூழ்நிலை மாற்றமாக கருதுவதாக மனுவில் கூறியிருந்தாா்.

இந்த மனு நீதிபதி என்.ஆனந்த் வெங்கடேஷ் முன்பு செவ்வாய்க்கிழமை விசாரணைக்கு வந்தது. அப்போது, செந்தில் பாலாஜி தரப்பில் ஆஜரான மூத்த வழக்குரைஞா் ஆா்யமா சுந்தரம், ‘வழக்கின் புலன் விசாரணை முடிந்துவிட்டது. ஆவணங்கள் அமலாக்கத் துறை வசம் உள்ளது. வழக்கில் குற்றம் சாட்டப்பட்டவா் தலைமறைவாக இருக்கிறாா் எனக்கூறி ஜாமீன் மறுக்க முடியாது என உச்ச நீதிமன்றம் கூறியுள்ளது’ என வாதிட்டாா்.

ஏன் பதவியில் நீடிக்கிறாா்? அப்போது குறுக்கிட்ட நீதிபதி ஆனந்த் வெங்கடேஷ், இந்த வழக்கில் 230 நாள்களுக்கு மேல் அமைச்சா் செந்தில் பாலாஜி சிறையில் இருக்கிறாா். ஏற்கெனவே இரு நீதிபதிகள் அமா்வு, அவா் அமைச்சராக நீடிப்பது குறித்து கருத்து தெரிவித்துள்ளது. கடை நிலை ஊழியா் ஒருவா், 48 மணி நேரம் சிறையில் இருந்தால் உடனடியாக பணியிடை நீக்கம் செய்யப்படுவாா். ஆனால், 230 நாள்களுக்கு மேல் சிறையில் உள்ள செந்தில் பாலாஜி இன்னும் அமைச்சராக நீடிக்க அனுமதிப்பதன் மூலம் மக்களுக்கு என்ன செய்தி சொல்ல விரும்புகிறீா்கள்? என கேள்வி எழுப்பினாா்.

நீதிமன்றம் உத்தரவிட முடியாது! இதற்கு பதிலளித்த மூத்த வழக்குரைஞா் ஆா்யமா சுந்தரம், ‘செந்தில் பாலாஜியை அமைச்சா் பதவியில் இருந்து நீக்கக் கோரிய மனுவை உச்ச நீதிமன்றம் அண்மையில் தள்ளுபடி செய்தது. அவரை அமைச்சா் பதவியில் இருந்து நீக்குவது தொடா்பாக நீதிமன்றம் உத்தரவிட முடியாது’ என வாதிட்டாா்.

இதையடுத்து செந்தில் பாலாஜியின் ஜாமீன் மனுவுக்கு, அமலாக்கத் துறை பதிலளிக்க உத்தரவிட்டு, வழக்கின் விசாரணையை வரும் பிப்.14-ஆம் தேதிக்கு நீதிபதி ஒத்தி வைத்தாா்.

மேலதிக செய்திகள்

சாந்தன் இலங்கை வருவதற்கு உதவுங்கள் அமைச்சர் டக்ளஸ் தேவானந்தாவிடம் தாயார் வேண்டுகோள்.

புதிய நாடாளுமன்றத்தில் முதல்முறையாக உரையாற்றும் குடியரசுத் தலைவர்!