மினுவாங்கொடையில் உள்ள ஒரேயொரு தமிழ் மொழி கல்லூரி மாணவர்களுக்கு புவியியல் 1ம் தாள் வழங்கப்படவில்லை.

தமிழ் மொழி பாடசாலை ஊடாக GCE சாதாரண தரப் பரீட்சைக்குத் தோற்றிய, ஒரேயொரு தமிழ் பாடசாலையான மினுவாங்கொடை , கல்லொலுவ அல் அமான் கல்லூரியின் 14 மாணவர்களுக்கு நேற்று (15) இடம்பெற்ற புவியியல் பாடத்தின் முதலாம் பகுதிக்கான வினாத்தாளை வழங்காத பரீட்சை மண்டப பொறுப்பாளர் தொடர்பில் பரீட்சை திணைக்களத்தின் ஊடாக விசேட விசாரணைகள் ஆரம்பிக்கப்பட்டுள்ளன என மினுவாங்கொடை பிரதேச கல்விப் பணிப்பாளர் வஜிர ரணராஜா தெரிவித்துள்ளார்.

மூன்று மணித்தியாலங்களுக்குள் மாணவர்கள் இரண்டு வினாத்தாள்களுக்கு விடையளிக்க வேண்டும் என்றும், முதல் பகுதி வரைபடங்களுடன் , இரண்டாம் பகுதியும் ஒரே முறையில் பரீட்சார்த்திகளுக்கு வழங்கப்படும் எனத் தெரிவிக்கும் பிராந்தியக் கல்விப் பணிப்பாளர், பரீட்சை மண்டப பொறுப்பாளர் வினாத்தாளின் முதல் பகுதியை மாணவர்களுக்கு வழங்கியிருக்கவில்லை என தெரிவித்துள்ளார்.

பரீட்சை மண்டப பொறுப்பாளருக்கு கூடுதலாக, ஒரு உதவி பரீட்சை மண்டப பொறுப்பாளரையும் தேர்வுத்துறை நியமித்துள்ள சூழலில் இந்த புறக்கணிப்பு நடந்துள்ளது.

மண்டபத்தின் பொறுப்பாளர் சிங்களவராக இருந்தாலும், இந்த மண்டபத்தில் பரீட்சை கடமைகளில் ஈடுபட்டிருந்த அதே அல் அமான் பாடசாலையில் கற்பித்த ஆசிரியை ஒருவர் இருந்ததாகவும், அவர் தமிழ் தெரிந்தவர் எனவும் , தவிர பரீட்சைக்கு தோற்றிய தமிழ் மாணவர்கள், சிங்கள மொழி பேசக் கூடியவர்கள் என தெரிவிக்கும் மினுவாங்கொடை கல்வி வலய அதிகாரிகள், இது மொழிப் பிரச்சினையால் ஏற்படவில்லை, தனிப்பட்ட வேறுபாடுகளால் ஏற்பட்டது என்று சுட்டிக் சுட்டிக்காட்டுகின்றனர்.

மூன்று மணி நேரம் கடந்தும் மாணவர்கள் கூட இதைப் பற்றி புகார் செய்யவில்லை, ஒரு ஆசிரியர் இந்த புறக்கணிப்பு குறித்து கேள்வி எழுப்பியுள்ளார். தேடிப் பார்த்த போது பிரிக்கப்படாத வினாத்தாள்கள் கவருக்குள் இருந்துள்ளன.

இந்நிலையில், பரீட்சை திணைக்களம் இன்று (15) விசேட விசாரணைகளை ஆரம்பித்துள்ளது. எந்தவொரு மாணவருக்கும் அநீதி ஏற்படாத வகையில் மதிப்பெண் வழங்கும் முறையொன்றின் மூலம் அது ஈடு செய்யப்படும் என தேர்வுத்துறை தெரிவித்துள்ளது.