பாஜகவின் பணபலம் எடுபடவில்லை; கனவும் பலிக்கவில்லை: முதல்வர் மு.க.ஸ்டாலின்

மீண்டும் தனிப்பெரும்பான்மையுடன் ஆட்சி அமைக்க இயலாத அளவுக்கு பாஜக பின்னுக்குத் தள்ளப்பட்டுள்ளதாக முதல்வர் மு.க.ஸ்டாலின் தெரிவித்துள்ளார்.

தமிழகத்தில் தாமரை மலரவே இல்லை என சென்னையில் செய்தியாளர்களிடம் பேசியபோது அவர் குறிப்பிட்டார்.

பாஜகவின் பணபலம் இந்த தேர்தலில் அறவே எடுபடவில்லை என்றும் பணபலத்தை உடைத்து எறிந்துள்ளோம் என்றும் முதல்வர் ஸ்டாலின் கூறினார்.

தேர்தலில் வாக்களித்த அனைவருக்கும் தமது நன்றியைத் தெரிவித்துக் கொள்வதாகவும் பாசீச கொள்கையை மக்கள் வீழ்த்தி உள்ளதாகவும் முதல்வர் ஸ்டாலின் தெரிவித்தார்.

“இந்தியாவைக் காப்போம் என்ற உறுதிமொழியை வழங்கி, இண்டியா கூட்டணி வெற்றி பெற்றுள்ளது. இதற்காக கூட்டணிக் கட்சிகளின் தலைவர்களுக்கும் தொண்டர்களுக்கும் நன்றி.

“கடந்த முறை 39 தொகுதிகளில் வெற்றி பெற்றோம். இப்போது நாற்பது தொகுதிகளிலும் வெற்றி பெற்றுள்ளோம். இது மாபெரும் வெற்றி.

“தமிழகத்தில் தாமரை மலரும் என்று கூறினர். ஆனால் அவ்வாறு நிகழவில்லை. பாஜகவின் கனவும் பலிக்கவில்லை,” என்றார் மு.க.ஸ்டாலின்.

இண்டியா கூட்டணி சார்பில் பிரதமர் பதவிக்கு முன்மொழியப்படுவீர்களா? என்ற கேள்விக்கு, ‘எனது உயரம் எனக்கு தெரியும்’ என முதல்வர் மு.க.ஸ்டாலின் பதிலளித்தார்.