ஹபராதூவவில் துப்பாக்கிச் சூடு!

ஹபராதூவ பொலிஸ் பிரிவிற்குட்பட்ட ஹருமல்கொட விகாரைக்கு அருகில் உள்ள விடுதிக்கு முன்பாக மோட்டார் சைக்கிளில் வந்த இனந்தெரியாத இருவர் , நேற்று (28) நடத்திய துப்பாக்கிச் சூட்டில் காயமடைந்த இருவர் சிகிச்சைக்காக கராப்பிட்டிய வைத்தியசாலையில் அனுமதிக்கப்பட்டுள்ளதாக ஹபராதூவ பொலிஸார் தெரிவித்தனர்.

முச்சக்கரவண்டியின் சாரதியான தெனியாகொட, ஹருமல்கொட ஹபராதூவ பிரதேசத்தை சேர்ந்த 34 வயதுடைய ஒருவரும், அங்குலகஹாவை சேர்ந்த 49 வயதான ஒருவருமே காயமடைந்துள்ளதாக பொலிஸார் தெரிவிக்கின்றனர்.

மோட்டார் சைக்கிளில் வந்த இனந்தெரியாத இருவர் ரிவோல்வர் ரக துப்பாக்கியால் , 34 வயதுடைய நபரை சுட்ட போது , குறி வைக்கப்பட்ட நபர் தப்பிச் செல்வதற்காக வீதியில் சென்று கொண்டிருந்த முச்சக்கரவண்டியில் ஏறியுள்ளதாக விசாரணைகளில் தெரியவந்துள்ளது.

துப்பாக்கிச்சூடு நடத்தியவர்கள் முச்சக்கரவண்டி மீதும் சுட்டமையால் , முச்சக்கரவண்டியின் சாரதியான அங்குலகஹாவைச் சேர்ந்த 49 வயதுடைய நபரும் காயமடைந்து வைத்தியசாலையில் அனுமதிக்கப்பட்டுள்ளார்.