இலங்கை தொடர்பான ஐ.நா. அறிக்கை: வரவேற்கின்றது ஐரோப்பிய ஒன்றியம்!
ஐக்கிய நாடுகள் மனித உரிமைகள் பேரவையில் இலங்கை தொடர்பில் முன்வைக்கப்பட்ட அறிக்கையை ஏற்றுக்கொள்வதாக ஐரோப்பிய ஒன்றியம் அறிவித்துள்ளது.
ஐக்கிய நாடுகள் மனித உரிமைகள் பேரவையின் 57ஆவது கூட்டத்தொடர் சுவிட்சர்லாந்தின் ஜெனிவாவில் நேற்று ஆரம்பமானது.
இதன்போது, இலங்கை தொடர்பில் மனித உரிமைகள் உயர்ஸ்தானிகர் அலுவலகத்தால் தயாரிக்கப்பட்ட அறிக்கை தொடர்பில் கலந்துரையாடப்பட்டது.
அந்த அறிக்கையின் மூலம் சுட்டிக்காட்டப்பட்டுள்ள உண்மைகளை ஏற்றுக்கொள்வதாகவும், இலங்கையின் நல்லிணக்க செயற்பாடுகள் தொடர்பில் அவதானம் செலுத்தி வருவதாகவும் ஐரோப்பிய ஒன்றியம் தெரிவித்துள்ளது.
இது தொடர்பில் அந்த அறிக்கையில் கூறப்பட்டுள்ளதாவது:-
“கடந்த இரண்டு ஆண்டுகளில் நாடு எதிர்கொண்ட சவால்களை நாம் அங்கீகரிக்கின்றோம்.
குறிப்பாக 2022 நிதி நெருக்கடி தொடர்பாக எதிர்வரும் செப்டெம்பர் 21 ஆம் திகதி நியாயமான மற்றும் ஜனநாயக ஜனாதிபதித் தேர்தலுக்குத் தயாராகும் முயற்சிகளை நாங்கள் வரவேற்கின்றோம். மேலும், இந்தச் செயல்முறைக்கு ஆதரவளிக்கத் தயாராக இருக்கின்றோம்.
உண்மை, ஒற்றுமை மற்றும் நல்லிணக்கத்துக்கான ஆணைக்குழுவின் திட்டமிடப்பட்ட உருவாக்கத்தை நாம் நன்கு கவனிக்கும் அதேவேளையில், அதன் பணி பற்றிய தெளிவான பார்வை பெற நாங்கள் எதிர்பார்க்கின்றோம்.
பொறுப்புக்கூறல் மற்றும் உண்மையின் முன்னேற்றம் இல்லாதது குறித்து நாம் தொடர்ந்தும் கவலை கொண்டுள்ளோம்.
குடிமை இடத்தைப் பாதுகாக்க வேண்டியதன் அவசியத்தையும் நாம் வலியுறுத்துகின்றோம்.
பயங்கரவாத எதிர்ப்புச் சட்டமூலம் அல்லது நிகழ்நிலைப் பாதுகாப்புச் சட்டமூலம் போன்ற புதிய மற்றும் முன்மொழியப்பட்ட சட்டங்களின் செயற்படுத்தல் விளைவுகளை ஏற்படுத்தும்.
கருத்து மற்றும் கருத்துச் சுதந்திரத்தை நிலைநிறுத்துவதற்கும், சிவில் சமூக ஈடுபாட்டுக்கு முழு இடத்தை வழங்குவதற்கும், பொறுப்புக்கூறல் மற்றும் நல்லிணக்கத்தை முன்னெடுப்பதற்கும் இலங்கையை நாம் ஊக்குவிக்கின்றோம்.
இலங்கையில் அமைதியான, ஜனநாயகத் தேர்தலை நாங்கள் விரும்புகின்றோம்.” – என்றுள்ளது.
மேலும், ஐக்கிய நாடுகள் மனித உரிமைகள் பேரவையின் அறிக்கையை வரவேற்று பிரித்தானியாவும் நேற்று அறிக்கை ஒன்றை வெளியிட்டுள்ளது.
அதில், இலங்கையில் இடம்பெற்றதாகக் கூறப்படும் மனித உரிமை மீறல்கள் தொடர்பில் சுயாதீன விசாரணை நடத்தப்பட வேண்டும் என்று பிரித்தானியா குறிப்பிட்டுள்ளது.